លោកវរសេនីយ៍ត្រី ឆេង អ៊ីសុខា អធិការនគរបាលស្រុកអូរជ្រៅ បានប្រាប់ឲ្យដឹងថា ជនរងគ្រោះទាំង២នាក់ ដែលស្លាប់ក្នុងហេតុការណ៍គ្រោះថ្នាក់ចរាចរណ៍នោះ គឺម្នាក់ឈ្មោះ សាន ចិត្ត ភេទប្រុសអាយុ២៥ មានទីលំនៅខេត្តបាត់ដំបង ត្រូវបានប្រគល់ឲ្យក្រុមគ្រួសារ យកទៅចាត់ចែងធ្វើបុណ្យ និងម្នាក់ទៀតឈ្មោះ វង្ស ភេទប្រុស អាយុ២០ឆ្នាំ គេពុំទាន់ដឹងពីទីលំនៅ នៅឡើយទេ មកទល់ពេលនេះ សាកសពត្រូវបានតម្កល់ទុក នៅវត្តរតនារាមសូរិយា រងចាំសាច់ញាតិមករក ហើយអ្នកស្លាប់ទាំង២នាក់នេះ គេនៅមិនទាន់ច្បាស់ថា អ្នកណាជាអ្នកបើកបរម៉ូតូនោះទេ ម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាលេខ កណ្តាល 1D.2203 ក្នុងទិសដៅពីលិចទៅកើត ចំណែករថយន្តម៉ាកការមារី ពណ៌ទឹកប្រាក់ គ្មានស្លាកលេខ បើកបរពីកើតទៅលិចបញ្ច្រាសទិសគ្នា អ្នកបើកបរមិនទាន់បានគេស្គាល់ឈ្មោះទេ ។ ព្រោះពេលដែលកើតហេតុ គេឃើញមានមនុស្សចំនួន២នាក់ បានចេញពីរត់រថយន្ត គឺម្នាក់ឈ្មោះ ប៊ុន ទ័រ ភេទប្រុស អាយុ៣១ឆ្នាំ នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ និងម្នាក់ទៀត ឈ្មោះ ប៊ុន ឈាន ភេទប្រុស អាយុ២៤ឆ្នាំ នៅភូមិចក សង្កាត់ព្រះពន្លា ក្រុងសិរីសោភ័ណ ហើយត្រូវបានប្រជាពលរដ្ឋនៅទីនោះ ចាប់ឃាត់ឲ្យសមត្ថកិច្ច តែជនទាំង២នាក់នោះ ពួកគេបានបដិសេធថា ពួកខ្លួនមិនមែនជាអ្នកបើកបរថយន្តនោះឡើយ ។
លោកអធិការបានបញ្ជាក់ថា ប៉ុន្តែជនទាំង២នាក់នេះ ដោយមានការសម្របសម្រួលពី លោក ឡុង ជាប ព្រះរាជអាជ្ញារងអមសាលាដំបូងខេត្តបន្ទាយមានជ័យ សមត្ថកិច្ចនគរបាលស្រុកឃាត់ខ្លួន ទុកនៅអធិការដ្ឋាននគរបាលស្រុកអូរជ្រៅ ដើម្បីធ្វើការសួរនាំរកមុខសញ្ញា អ្នកបើកបរឲ្យពិតប្រាកដ ។ ចំពោះមូលហេតុ ដែលបង្កឲ្យគ្រោះថ្នាក់នោះ កម្លាំងនគរបាលជំនាញ កំពុងធ្វើការស្រាវជ្រាវ រីឯវត្ថុតាងបង្កគ្រោះថ្នាក់ ម៉ូតូខូចធ្ងន់ រថយន្តខូចផ្នែកខាងមុខធ្ងន់ ត្រូវបានកម្លាំងនគរបាលជំនាញចរាចរណ៍ស្រុក យកមករក្សាទុកនៅអធិការដ្ឋាននគរបាលស្រុកផងដែរ ៕ រក្សា
