រាជធានីភ្នំពេញ៖ ការប្រកួតកីឡាស៊ីហ្គេមលើកទី២៩ នៅទីក្រុងកូឡាឡាំពួរ ប្រទេសម៉ាឡេស៊ី បានចប់ជាស្ថាពរ កាលពីថ្ងៃទី៣០ សីហា កន្លងទៅ ដោយកម្ពុជាទទួលបានមេដាយមាស៣ ប្រាក់២ និងសំរឹទ្ធ១២ ក្នុងចំណោមកីឡាទាំង២៤ប្រភេទ ដែលកម្ពុជាឲ្យចូលរួម។ តាមរយៈជ័យជម្នះនេះ ណាហ្គាវើល ត្រូវចំណាយថវិកាប្រមាណ៥០លានរៀល សម្រាប់យុទ្ធនាការឆ្ពោះទៅរកមេដាយមាស «Go For Gold Medal» របស់ខ្លួន។ដូចការសន្យាមុនពេលចេញទៅចូលរួមប្រកួតកីឡាស៊ីហ្គេមលើកទី២៩ នៅទីក្រុងកូឡាឡាំពួរ ប្រទេសម៉ាឡេស៊ី កាលពីកន្លង ទៅនៅព្រឹកថ្ងៃទី១ កញ្ញា ណាហ្គាវើលបានរៀបចំកម្មវិធី ប្រគល់កម្មវិធីរង្វាន់លើកទឹកចិត្ត ដល់អត្តពលិកលើ៣ប្រភេទកីឡា ដែលឈ្នះមេដាយមាស។ ក្នុងនោះមេដាយមាស របស់កីឡាការិនី ស៊ន សៀវម៉ី ដែលយកឈ្នះកីឡាការិនីហ្វីលីពីន Kirstie Elaine Alo ១៣-៦ នៅវគ្គផ្តាច់ព្រ័ត្រលើវិញ្ញាសាកីឡាតេក្វាន់ដូទទួលបាន ៣ពាន់ដុល្លារ។ កីឡាករគុនខ្មែរ ឃីម ឌីម៉ា ដែលយកឈ្នះកីឡាករថៃ Chonlawit Freedasak ដោយពិន្ទុ ២៩-២៨ នៅវគ្គផ្តាច់ព្រ័ត្រ ដើម្បីឈ្នះមេដាយមាស ទទួលបាន ៣ពាន់ដុល្លារ ខណៈមេដាយមាសកីឡាការិនី កែ ឡេង និង អ៊ុក ស្រីមុំ លើវិញ្ញាសាប៉េតង់វាយគូនារី ដែលយកឈ្នះថៃ ១៣-១០ នៅវគ្គផ្តាច់ព្រ័ត្រទទួលបាន ៥ពាន់ដុល្លារ។ ដោយឡែក គណៈកម្មាធិការជាតិអូឡាំពិក ដែលណាហ្គាវើលសន្យាឧបត្ថម្ភ ៥០០ដុល្លារ សម្រាប់មេដាយមាស១លើប្រភេទកីឡានីមួយៗទទួលបាន ១,៥០០ដុល្លារ។
សរុបជារួមយុទ្ធនាការឆ្ពោះទៅរកមេដាយមាស «Go For Gold Medal» របស់ណាហ្គាវើល ត្រូវចំណាយថវិកាប្រមាណជា៥០លានរៀល៕
