ការដាក់ដំណើរការកម្មវិធី សុវត្ថិភាពចំណីអាហារ នៅចុងសប្តាហ៍មុន នៅក្នុងរដ្ឋធានីហាណូយ លោកឧបនាយករដ្ឋមន្ត្រី បានស្នើឲ្យរដ្ឋបាលក្រុងហាណូយ ពិចារណាបញ្ហាសុវត្ថិភាពចំណីអាហារជាគោលនយោបាយអាទិភាពបន្ទាន់ និងចាំបាច់បំផុត ហើយក៏ត្រូវផ្តោតលើគ្រប់ធនធានហិរញ្ញវត្ថុ និងធនធានមនុស្ស និងគ្រឿងសម្ភារផ្សេងទៀត ដើម្បីធានាលុបបំបាត់ឲ្យបានបញ្ហាចំណីអាហារ ដែលគ្មានសុវត្ថិភាព ។
កម្មវិធីដែលទើបតែដាក់ដំណើរដោយរដ្ឋាភិបាលវៀតណាម ត្រូវបានផ្តួចផ្តើមដោយរដ្ឋបាលសុខាភិបាលរដ្ឋធានី និងស្ថាប័នកសិកម្ម និងពាណិជ្ជកម្ម ដែលកម្មវិធីគោលនយោបាយសុវត្ថិភាពចំណីអាហារនេះ ត្រូវអនុវត្តពីឆ្នាំ២០១៧ ដល់ឆ្នាំ២០២០ ក្នុងគោលដៅដាស់តឿន និងបង្កើនការទទួលខុសត្រូវទាំងបុគ្គល គ្រួសារ និងសហគមន៍ទាំងមូល ទៅលើសុវត្ថិភាពអាហារដែលទទួលទានរាល់ថ្ងៃ។
ជាងនេះទៅទៀតនោះ ដើម្បីធ្វើឲ្យគោលនយោបាយកាន់តែមានប្រសិទ្ធភាព លោកឧបនាយករដ្ឋមន្ត្រី បានទទូចឲ្យមានការសហការគ្នារវាងភាគីប្រាំ រួមមាន រដ្ឋាភិបាល អ្នកវិទ្យាសាស្ត្រ អ្នកកាសែត សហគ្រិន និងអ្នកទទួលទានតែម្តង។ ការសហការជិតស្និទ្ធរវាងភាគីពាក់ព័ន្ធ មិនត្រឹមតែជួយកំណត់ពីអាហារមិនមានសុវត្ថិភាពប៉ុណ្ណោះនោះទេ ថែមទាំងជួយដោះស្រាយផលលំបាក ក្នុងការគ្រប់គ្រងគុណភាពចំណីអាហារទៀតផង៕
