សេចក្ដីជូនដំណឹងរបស់រដ្ឋាករទឹកស្វយ័តក្រុងភ្នំពេញនៅថ្ងៃទី២១ សីហា បានបញ្ជាក់ថា PPWSA គ្រោងកាត់ភ្ជាប់បំពង់មេនាំទឹកថ្មី ដែលមានទំហំ ៥០០មីលីម៉ែត្រ នៅលើផ្លូវសហព័ន្ធរុស្ស៊ី(ផ្លូវ១១០) ចាប់ពីខាងត្បូងនៃចញ្ចើមផ្លូវសហព័ន្ធរុស្ស៊ី កែងនឹងស្តុបផ្លូវ២០០៤ ។ ការកាត់ភ្ជាប់បំពង់មេនាំទឹកនេះ ត្រូវឆ្លងកាត់ផ្លូវសហព័ន្ធរុស្ស៊ី ដល់ចញ្ចើមផ្លូវ២០១១ និងចាប់ពីខាងត្បូងនៃចញ្ចើមផ្លូវសហព័ន្ធរុស្ស៊ី ដល់ខាងជើងផ្លូវសហព័ន្ធរុស្ស៊ី ស្ថិតក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
រដ្ឋាករទឹកបញ្ជាក់ទៀតថា ការងារតភ្ជាប់បំពង់មេនាំទឹកថ្មីនេះ តម្រូវឲ្យរដ្ឋាករទឹកស្វយ័តក្រុងភ្នំពេញ ផ្អាកការផ្គត់ផ្គង់ក្នុងរយៈខ្លីប្រមាណ ៧ម៉ោង ដូច្នេះសូមប្រជាពលរដ្ឋ ស្ថាប័ន រោងចក្រ សហគ្រាស ដែលមានទីលំនៅដ្ឋាន និងទីតាំងក្នុងតំបន់ខាងលើ បម្រុងទឹកសម្រាប់ប្រើប្រាស់ក្នុងរយៈពេលផ្អាកផ្គត់ផ្គង់នេះ ចៀសវាងខ្វះទឹកប្រើប្រាស់៕
