តាមពិតទៅហ្វីលីពីនបានទទួលសិទ្ធិធ្វើម្ចាស់ផ្ទះកីឡាSea Games ឆ្នាំ២០១៩ ក្រោយឈ្នះការបោះឆ្នោតកាលពីឆ្នាំ ២០១៥ ប៉ុន្តែក្រោយមករដ្ឋាភិបាលនៃប្រទេសនេះ បានសម្រេចមិនធ្វើជាម្ចាស់ផ្ទះការប្រកួតកីឡានេះវិញ ដោយសារបច្ចុប្បន្នកំពុងមានជម្លោះជាមួយក្រុមភេរវជននៅទីក្រុង Marawi ដែលស្ថិតនៅលើកោះ Mindanao ប្រទេសហ្វីលីពីន។
ដោយសារហេតុផលខាងលើនេះហើយ ទើបហ្វីលីពីនដកខ្លួន និងចង់ឲ្យ ថៃ ឬឥណ្ឌូណេស៊ី ធ្វើជាម្ចាស់ផ្ទះការប្រកួតកីឡាប្រចាំតំបន់អាស៊ី ឆ្នាំ២០១៩ ជំនួសវិញ។ មួយវិញទៀតថវិការដែលត្រៀមរៀបចំព្រឹត្តិការណ៍នេះ នឹងត្រូវយកទៅជួយដល់ប្រជាជន និងកសាងហេដ្ឋារចនាសម្ព័ន្ធនៅទីក្រុង Marawi វិញ។
សម្រាប់ភាគីថៃ និងឥណ្ឌូណេស៊ី ដែលត្រូវបានគេចាត់ទុកថាជាបេក្ខភាពល្អជាងគេ ដើម្បីជំនួសតំណែងនេះ ត្រូវបញ្ជូនការដេញថ្លៃរៀងៗខ្លួន ទៅកាន់សហព័ន្ធកីឡាស៊ីហ្គេមមុនពេលពិធីបិទការប្រកួតកីឡា Sea Games លើកទី២៩ ដែលនឹងប្រព្រឹត្តទៅនៅទីក្រុងគូឡាឡាំពួ ប្រទេសម៉ាឡេស៊ី ពីថ្ងៃទី ១៩ ដល់ ៣១ ខែសីហា ឆ្នាំ២០១៧ ខាងមុខនេះ។
សូមបញ្ជាក់ថា ថៃបានធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេមលើកចុងក្រោយនៅឆ្នាំ២០០៧ ខណៈឥណ្ឌូណេស៊ីធ្វើម្ចាស់ផ្ទះលើកចុងក្រោយឆ្នាំ២០១១។ លើសពីនេះឥណ្ឌូណេស៊ីនឹងត្រូវមានភារកិច្ចធ្វើជាម្ចាស់ផ្ទះកីឡាអាស៊ី Asian Games លើកទី១៨ នៅឆ្នាំក្រោយថែមទៀតផង៕
