ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ ដែលមិនមានឯកសារ ឬដែលធ្លាប់ជាពលករស្របច្បាប់ ប៉ុន្តែបានផ្លាស់ប្ដូរ ឬមិនបានបំពេញនីតិវិធីនានា របស់ភាគីថៃ ហើយក្លាយទៅជាពលករមិនស្របច្បាប់ ត្រូវរួសរាន់មកបំពេញនីតិវិធីតាមដំណាក់កាលដែលបានកំណត់ទុក។
ដំណាក់កាលទី១-ចាប់ពីថ្ងៃទី២៤ កក្កដា ដល់ថ្ងៃទី៧ សីហា គឺជាដំណាក់កាលដែលពលករត្រូវព្យាយាមពន្យល់ថៅកែ ឲ្យចុះឈ្មោះខ្លួន នៅការិយាល័យស្រង់ទិន្នន័យពលករបរទេស របស់ក្រសួងការងារថៃ ទាំង៩៧ការិយាល័យ, ដំណាក់កាលទី២-ចាប់ពីថ្ងៃទី៨ សីហា ដល់ថ្ងៃទី៩ កញ្ញា គឺជារយៈពេលដែលពលករត្រូវទៅបង្ហាញខ្លួន នៅការិយាល័យណាមួយ នៃការិយាល័យទាំង៩៧ការិយាល័យ និងដំណាក់កាលទី៣-គឺចាប់ពីថ្ងៃទី១០ កញ្ញា ដល់ថ្ងៃទី៣១ ធ្នូ គឺជារយៈពេលដែលពលករត្រូវស្នាក់នៅ និងរង់ចាំធ្វើការបញ្ជាក់អត្តសញ្ញាណ ពីគណៈកម្មការផ្ដល់ភាពស្របច្បាប់ ក៏ដូចជាស្នើសុំការអនុញ្ញាតឲ្យរស់នៅ និងធ្វើការ ពីមន្ត្រីអន្តោប្រវេសន៍ថៃ និងក្រសួងការងារថៃ។
បញ្ជាក់៖ ពលករខ្មែរអាចទំនាក់ទំនងមកលេខទូរស័ព្ទ +៦៦ ៨៦ ៧៩៩ ៩៩៥៧ ឬ +៦៦ ៩៤ ០៩២ ៥៩០៥ ដើម្បីសាកសួរបន្ថែម៕
