ប្រសាសន៍របស់សម្តេចក្រឡាហោម ស ខេង បានឲ្យដឹងនៅក្នុងកិច្ចប្រជុំប្រកាសសមាសភាពគណៈកម្មាធិការជាតិ សុវត្ថិភាពចរាចរណ៍ កាលពីព្រឹកថ្ងៃទី១៥ ខែធ្នូ ឆ្នាំ២០១៥ នៅទីស្តីការក្រសួង។
នៅក្នុងកិច្ចប្រជុំនោះដែរ សម្តេចក្រឡាហោម ស ខេង បានបញ្ជាក់ថា គ្មានការអន្តរាគមន៍ឲ្យមានលើកលែងនោះទេ ពោលគឺមន្ត្រីគ្រប់លំដាប់ថ្នាក់ កូនចៅអ្នកមានបុណ្យសក្តិយស និងប្រជាពលរដ្ឋទាំងអស់ នៅទូទាំងប្រទេស ត្រូវបានធ្វើការចាប់ឃាត់ មកអប់រំ និងមានការផាកពិន័យដោយគ្មានការលើកលែងដូចគ្នា ។
នៅទូទាំងប្រទេស មានកងកម្លាំងនគរបាលចរាចរណ៍ ប្រមាណពី ២.៨០០ ទៅ៣.០០០នាក់ សម្រាប់ចាត់វិធានការ ឲ្យប្រជាជនអ្នកធ្វើដំណើរទាំងអស់អនុវត្តច្បាប់ សម្រាប់បញ្ហានេះនៅក្នុងកិច្ចប្រជុំនោះ សម្តេចក្រឡាហោម ស ខេង បានប្រកាសថវិកាឧបត្ថម្ភបន្ថែម ៤.០០០រៀល ក្នុងមួយថ្ងៃ ជូនដល់កងកម្លាំងនគរបាលចរាចរណ៍ នៅពេលចុះបញ្ជាអនុវត្តច្បាប់ចរាចរណ៍ នៅតាមដងផ្លូវ ប៉ុន្តែគ្រប់ការផាកពិន័យ សម្តេចក្រឡាហោម បានសម្រេច ឲ្យនគរបាលដែលប្រចាំការនៅតាមដងផ្លូវ គឺត្រូវសរសេរវិក្កយបត្រជូនទៅអ្នកល្មើសច្បាប់ចរាចរណ៍ ទៅបង់ប្រាក់ផាកពិន័យនោះ នៅតាមប៉ុស្តិ៍នគរបាលរដ្ឋបាល ដែលនៅមូលដ្ឋានរបស់គេ ។ នៅក្នុងចំណុចនេះ សម្តេចក្រឡាហោម ស ខេង មិនចង់ឲ្យមានសកម្មភាពហុច ប្រគល់ទទួលប្រាក់ផាកពិន័យ ឬនៅតាមដងផ្លូវទៀតនោះទេ ។
ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ អគ្គស្នងការរងនគរបាលជាតិ រាយការណ៍ថា នៅទូទាំងឆ្នាំ២០១៥នេះ ចំនួនអ្នករងគ្រោះថ្នាក់ចរាចរណ៍មានស្លាប់ និងរបួស បានកើតមាន៩៧៧៥នាក់ ក្នុងនោះដោយសារកត្តាបើកបរក្នុងល្បឿនហួស គឺមានចំនួន៤២% ។ ស្ថានភាពនេះ ឯកឧត្តម បានធ្វើការប្រៀបធៀបថា ចំនួនអ្នករងគ្រោះថ្នាក់ គឺបានធ្លាក់ចុះ៤៤០នាក់ ស្មើនឹង៤% ក្នុងបណ្តាលឲ្យមនុស្សស្លាប់ចំនួន ២២៦៥នាក់ កើនឡើង ១១៧នាក់ ស្មើនឹង៥% ក្នុងនោះមានជនបរទេស២០នាក់ បើធៀបនឹងឆ្នាំ២០១៤កន្លងមកនេះ ហើយគិតជាមធ្យមក្នុងមួយថ្ងៃស្លាប់លើ ក្រោម ៦នាក់ និងមានរបួសលើ ក្រោម២០នាក់ ។
មូលហេតុដែលធ្វើឲ្យមានគ្រោះថ្នាក់នេះ គឺដោយសារអ្នកបើកបរ បើកហួសល្បឿនកំណត់ មិនគោរពសិទ្ធអាទិភាព មិនប្រកាន់ស្តាំ ការបើកជែង បើកបរក្រោមឥទ្ធិពលគ្រឿងស្រវឹង បត់មិនប្រយ័ត្ន និងការអ្នកបើកបរមានបញ្ហាសុខភាពជាដើម ៕
