កំពង់ឆ្នាំង៖ ដោយមើលឃើញនូវភាពអនាធិបតេយ្យ នៃការយកចិញ្ចើមផ្លូវគម្រោងចៃកាជប៉ុនដែលបានសាងសង់រួចហើយទៅតាំងលក់ដូរ និងដាក់របស់របរផ្សេងៗធ្វើឲ្យបាត់បង់សណ្តាប់ធ្នាប់ របៀបរៀបរយនោះ កាលពីរសៀលថ្ងៃទី១៦ ខែធ្នូ ឆ្នាំ២០១៥នេះ លោក កែវ ពៅ ប្រធានមន្ទីរសាធារណការខេត្តបានចេញលិខិតជូនដំណឹងមួយច្បាប់ ដើម្បីឲ្យម្ចាស់គេហដ្ឋានដែលនៅជាប់ផ្លូវគម្រោងចៃកាជប៉ុនទាំងអស់រុះរើចេញជាបន្ទាន់មុនថ្ងៃទី២៥ ខែធ្នូ ឆ្នាំ២០១៥ ។
នៅក្នុងខ្លឹមសារនៃលិខិតជូនដំណឹងនោះ លោក កែវ ពៅ ប្រធានមន្ទីរសាធារណៈការ និងដឹកជញ្ជូនខេត្តបានចែងថា៖ យោងមតិណែនាំរបស់ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង មន្ទីរសាធារណការ និងដឹកជញ្ជូនខេត្តកំពង់ឆ្នាំង សូមជម្រាបជូនឯកឧត្តម លោកជំទាវ លោក លោកស្រី មន្ទីរអង្គភាព និងប្រជាពលរដ្ឋ ដែលមានអគារ និងលំនៅឋានតាមដងផ្លូវគម្រោងចៃកាទាំងអស់ជ្រាបថា ដើម្បីរក្សាបាននូវសោភ័ណភាពផ្លូវឲ្យបានស្អាតជាប្រចាំ ម្យ៉ាងជាសំណូមពររបស់ម្ចាស់ជំនួយផងនោះ មន្ទីរសាធារណការ និងដឹកជញ្ជូនខេត្តស្នើសុំឲ្យឯកឧត្តម លោកជំទាវ លោក លោកស្រី មន្ទីរអង្គភាព និងប្រជាពលរដ្ឋទាំងអស់ ដែលស្ថិតនៅតាមដងផ្លូវដូចបានជម្រាបជូនខាងលើ ត្រូវរុះរើចេញជាបន្ទាន់នូវសម្ភារទាំងឡាយដែលមាននៅលើទ្រូងផ្លូវ និងចិញ្ចើមផ្លូវគម្រោងចៃកាជប៉ុនដូចជា កំណល់កល់រថយន្ត សម្ភារសំណង់ និងសម្ភារលក់ដូរផ្សេងៗទៀតឲ្យបានមុនថ្ងៃទី២៥ ខែធ្នូ ឆ្នាំ២០១៥ ។ បើមិនរុះរើតាមកាលកំណត់នៃលិខិតជូនដំណឹងខាងលើ មន្ទីរមិនទទួលខុសត្រូវលើការខូចខាតសម្ភារនៅពេលកម្លាំងសមត្ថកិច្ចចុះរុះរើនោះឡើយ ។
គួរបញ្ជាក់ផងដែរថា ក្រោយពីភ្នាក់ងារចៃកាជប៉ុន បានសាងសង់ប្រព័ន្ធលូ ផ្លូវ និងការរៀបការ៉ូឡាលើចិញ្ចើមផ្លូវខ្វាត់ខ្វែងបានយ៉ាងស្អាតដើម្បីបញ្ជៀសទឹកជំនន់ ការធ្វើចរាចរណ៍បានងាយស្រួល ក៍ដូចជាសោភ័ណភាពក្រុងរួចមកនោះ គេឃើញបងប្អូនពលរដ្ឋមួយចំនួននៅតាមដងផ្លូវគម្រោងចៃកាជប៉ុន បានរំលោភយកចិញ្ចើមផ្លូវមកដាក់តាំងសម្ភារៈលក់ដូរយ៉ាងអនាធិបតេយ្យ ធ្វើអោយបាត់បង់សណ្តាប់ធ្នាប់ របៀបរៀបរយ ក្នុងក្រុងកំពង់ឆ្នាំងទៅវិញ។ ចាប់ពីថ្ងៃជូនដំណឹងនេះតទៅមន្ទីរសាធារណការ និងជញ្ជូនសង្ឃឹមថា ប្រជាពលរដ្ឋ និងអ្នកពាក់ព័ន្ធចូលរួមសហការជាមួយមន្ទីរក្នុងការរៀបចំឲ្យមានសណ្តាប់ធ្នាប់ និងបរិស្ថានល្អ៕
