ដើម្បីពង្រឹងការត្រួតពិនិត្យតាមព្រំដែនខាងក្រៅ របស់សហភាពអឺរ៉ុប គណៈកម្មការអឺរ៉ុប បានប្រកាសស្នើសុំទៅសភាអឺរ៉ុប នូវវិធានការមួយចំនួនធំដូចជាការកែប្រែច្បាប់ Schengen ដើម្បីត្រួត ពិនិត្យជាស្វ័យប្រវត្តិការធ្វើដំណើរឆ្លងព្រំដែន ចេញចូលតំបន់ចរាចរណ៍សេរី។ ប៉ុន្តែអ្វីដែលប្លែក និងពិសេសជាងគេ គឺការបង្កើតកងពលឆ្មាំព្រំដែនអឺរ៉ុដែលនឹងត្រូវដាក់ពង្រាយ នៅក្នុងប្រទេសជាសមាជិកនៅជាយដែនទាំងអស់ ទោះបីជារដ្ឋនោះប្រឆាំងរឹងរូសយ៉ាងណាក៏ដោយ។
ព្រំដែនអឺរ៉ុបនឹងបិទជិតជាងមុនបន្តិច។ អឺរ៉ុបគ្រោងនឹងបង្កើតកងកម្លាំងការពារព្រំដែន ដែនទឹកនិងដី ដើម្បីប្រឈមនឹងវិបត្តិអន្តរប្រវេសន៍ដ៏ធ្ងន់ធ្ងរមិនធ្លាប់មាន។ កងកម្លាំងថ្មីនេះ អាចនឹងត្រូវពង្រាយដោយគ្មានការយល់ព្រមពីប្រទេសពាក់ព័ន្ធ។
កម្មវត្ថុចំបង គឺចង់បញ្ចៀសភាពវឹកវរ តាមព្រំដែនខាងក្រៅ មករំខានដល់សេរីភាព នៃការធ្វើដំណើរក្នុងផ្ទៃតំបន់ Schengen ដែលជាមូលដ្ឋានគ្រឹះដ៏សំខាន់បំផុតមួយរបស់អឺរ៉ុប។ បើតាមគណៈកម្មការអឺរ៉ុប បានឲ្យដឹងថា ក្នុងរយៈពេលមួយឆ្នាំ២០១៥នេះ មានអន្តោប្រវេសន៍ខុសច្បាប់ ១,៥លាននាក់ បានឆ្លងចូលព្រំដែនអឺរ៉ុបរួច និងបន្តដំណើរពេញផ្ទៃអឺរ៉ុបពីប្រទេសមួយ ទៅប្រទេសមួយ ដោយគ្មានកំណត់ត្រា ឬចុះបញ្ជីអ្វីទាំងអស់។ ស្ថានភាពនេះ បានជំរុញឲ្យប្រទេសជាច្រើន ដូចជា អាល្លឺម៉ង់ អូទ្រីស ឬ ស៊ុយអែត ដាក់ប៉ុស្តិ៍ត្រួតពិនិត្យព្រំដែនប្រទេសឡើងវិញ។
ហេតុការណ៍បែបនេះ មិនត្រូវឲ្យកើតមានជាថ្មីម្តងទៀតទេ ! និងដើម្បីកុំឲ្យ Schengen រងការគំរាមកំហែងបាន ទើបបានជាអឺរ៉ុប បានស្នើបង្កើតភ្នាក់ងារឆ្មាំព្រំដែន ដែលមានអំណាចឯករាជ្យថ្នាក់អឺរ៉ុប មានកងកម្លាំង ១៥០០នាក់ អាចប្រមូលផ្តុំបានភ្លាម ក្នុងរយៈពេលតិចជាងបីថ្ងៃ ប្រសិនបើមានស្ថានការណ៍បន្ទាន់។ ភ្នាក់ងារនេះ នឹងត្រូវដឹកនាំដោយគណៈកម្មការមួយ និងមានថវិកាប្រចាំឆ្នាំ ១១៤លានអឺរ៉ូសម្រាប់ឆ្នាំ២០១៥ រួចដំឡើងរហូតដល់ ៣២២លានអឺរ៉ូ នៅឆ្នាំ២០២០។ ប្រទេសជាសមាជិក ត្រូវបង់វិភាគទានទៅតាមសមមាត្រប្រទេស។
ឆ្មាំព្រំដែនថ្មីនេះ ត្រូវមានសមត្ថភាពចេញធ្វើអន្តរាគមន៍ និងចេះចាត់វិធានការទៅតាមស្ថាន ភាពជាក់ស្តែងនៅតាមព្រំដែន បើទោះជានៅព្រំដែននោះប្រទេសជាម្ចាស់ផ្ទះ មិនបានស្នើសុំជំនួយ ឬក៏ប្រទេសជាសមាជិកនោះយល់ថាមិនត្រូវការជំនួយអន្តរាគមន៍ក៏ដោយ។ តាមការពិត ឆ្មាំព្រំដែនអឺរ៉ុប បើតាមគោលការណ៍ មិនអាចទៅឈរជើងបំពេញបេសកកម្មទេ ប្រសិនបើគ្មានការព្រមព្រៀងពីប្រទេសជាម្ចាស់ផ្ទះ។ ប៉ុន្តែមានន័យថាសហភាពអឺរ៉ុបនឹងចាប់បង្ខំ ដោយបន្ថែមសម្ពាធ ហើយបន្ថែមទៀត លើរដ្ឋពាក់ព័ន្ធឱ្យប្រឹងធ្វើអ្វីដែលចាំបាច់ និងដែលត្រូវព្រមទទួល ដើម្បីប្រយោជន៍រួម។
តើនេះមិនមែនជាការរំលោភ ឬដំណើរបាត់បង់អធិបតេយ្យភាពរបស់រដ្ឋជា សមាជិកទេឬ ? ក្រុមអ្នកប្រឆាំងនឹងអឺរ៉ុប បានទាញសញ្ញាជួងស្រែកពេញអង្គសភាអឺរ៉ុបរួចបាត់ទៅហើយ។ ប៉ុន្តែនេះហើយជាចំណុចថ្មីស្រឡាងមួយ សម្រាប់អឺរ៉ុប។ ការបង្កើតភ្នាក់ងារឆ្មាំព្រំដែន ហាក់កំពុងនាំរដ្ឋជាសមាជិកឱ្យបោះបង់ជាបណ្តើរៗពាក្យថា អធិបតេយ្យភាពជាតិ តែការបោះបង់នេះគឺដើម្បីការពារអឺរ៉ុប។ ហើយអាចជាចំណុចល្អ ព្រោះក្នុងករណីជាក់ស្តែងប្រទេសក្រិក កំពុងក្ស័យធន អសមត្ថភាព ក្នុងការគ្រប់គ្រងព្រំដែន តែអឺរ៉ុបពាំងមុខជំនួសបាន។
ប៉ុន្តែនៅមានសំណួរមួយទៀត ថាតើកងកម្លាំងឆ្មាំអឺរ៉ុប ដែលជាស្ថាប័នថ្មីស្រឡាងនេះ មានកាតព្វកិច្ចការងារអ្វីឲ្យច្បាស់ទៅ ? នៅថ្ងៃអនាគត ឆ្មាំព្រំដែនអាចនឹងត្រូវបញ្ជូនទៅកាន់តំបន់មានសម្ពាធខ្លាំង និងមានភារៈសំខាន់មួយគឺឱ្យមានប្រសិទ្ធិភាពខ្លាំង ការបញ្ជូនញែកអន្តោប្រវេសន៍ដែលមានសិទ្ធិសុំជ្រកកោន។
គម្រោងបង្កើតឆ្មាំព្រំដែនអឺរ៉ុប គឺជាចំណែកមួយនៃវិធានការថ្មីៗផ្សេងទៀត ដែលគណៈកម្ម ការអឺរ៉ុប ដាក់បង្ហាញជូនសភាអឺរ៉ុប ។ គម្រោងថ្មីនេះក៏មានដាក់បញ្ចូលការស្នើសុំកែប្រែច្បាប់Schengen តាមសំណើដ៏ទទូចរបស់បារាំងដែរ ។ ការកែប្រែនេះមិនមែនតិចតួចធម្មតាទេ ! ដោយចាប់ពីអំណើះតទៅអឺរ៉ុបចង់ពង្រីកវិសាលភាពនៃការត្រួតពិនិត្យដោយស្វ័យប្រវត្តិនិងដោយស៊ីជម្រៅ លើរាល់រូបពលរដ្ឋអឺរ៉ុប ពេលឆ្លងចូលព្រំដែនអឺរ៉ុបSchengen។ វិធានការចុងក្រោយនេះ ត្រូវបានសម្រេចឡើង ក្រោយពីមានការវាយប្រហារភេរវកម្មនៅប៉ារីស ពីសំណាក់ជនជីហាតអ៊ីស្លាមជ្រុល និយមជាតិបន្លំខ្លួន ត្រលប់ចូលអឺរ៉ុប តាមច្រកផ្លូវរបស់ជនភៀសខ្លួន ។
សូមរំឭកជូនបន្តិចថា ប្រមុខដឹកនាំមកពីប្រទេសជាង៥០ក្នុងតំបន់អឺរ៉ុបនិងអាហ្វ្រិក ជួបប្រជុំ គ្នានៅប្រទេសម៉ាល់តា កាលពីថ្ងៃពុធនិងព្រហស្បតិ៍ទី១២ខែវិច្ឆិកាឆ្នាំ២០១៥កន្លងទៅ ដើម្បីស្វែងរក ដំណោះស្រាយដ៏ល្អមួយ ជុំវិ ញវិបត្តិជនអន្តោប្រវេសន៏រាប់លាននាក់ ដែលបានហូរចូលទៅកាន់ សហភាពអឺរ៉ុប ចាប់តាំងពីដើម ឆ្នាំ២០១៥នេះ ។
ប្រឈមមុខនឹងចរន្តអន្តោប្រវេសន៍ដ៏គំហុកមិនធ្លាប់មាន អឺរ៉ុបនឹងស្នើសុំទៅអាហ្វ្រិក ឱ្យជួយទទួលយកអន្តោប្រវេសន៍ដែលអឺរ៉ុបបញ្ចូនទៅវិញឱ្យបានច្រើនជាងមុន ជាថ្នូរនឹងការពង្រឹងជំនួយអភិវឌ្ឍន៍ក្នុងបណ្តាប្រទេសមួយចំនួននៅអាហ្វ្រិក ។
គណៈកម្មការ អឺរ៉ុបចង់បញ្ចេញសកម្មភាពជាមួយប្រទេសដើម និងប្រទេសដែលមានជនអន្តោប្រវេសន៍ឆ្លងកាត់ ដើម្បីកុំឱ្យមានសោកនាដកម្មស្លាប់ក្នុងសមុទ្ទព្រោះតែចង់ឆ្លងទៅកាន់អឺរ៉ុប កើតឡើងមិនឈប់ឈរទៀត។ ថ្នាក់ដឹកនាំអឺរ៉ុប មានពេល២៤ម៉ោង សម្រាប់ស្វែងរកការព្រមព្រៀមពីអាហ្វ្រិក ឱ្យទទួលយកអន្តោប្រវេសន៍ត្រលប់ទៅវិញឱ្យបានច្រើនជាងមុខ។ សំណុំឯកសារលម្អិតផែនការត្រូវបានរៀបចំរួចជាស្រេចហើយ ។
អឺរ៉ុបនឹងស្នើសុំកិច្ចសហប្រតិបត្តិការពីអាហ្វ្រិក ដោយសន្យាធ្វើវិនិយោគច្រើននៅក្នុងទ្វីបនេះ ដើម្បីផ្តល់ការងារដល់យុវវ័យ និងលើកទឹកចិត្តយុវវ័យអាហ្វ្រិកធ្វើវិនិយោគក្នុងប្រទេសខ្លួន។ អឺរ៉ុបនឹងបើកផ្លូវឲ្យមានការសុំសិទ្ធិធ្វើដំណើរមកអឺរ៉ុបបានធូរ រលុងជាមុន សម្រាប់និស្សិត អ្នកស្រាវជ្រាវ ឬពលករជំនាញខ្លាំង។ ការចូលរួមចំណែកជាមួយប្រទេសអាហ្វ្រិកដែលបានទទួលយកអន្តោប្រវេស ន៍ច្រើនហើយ។ អឺរ៉ុបក៏នឹងបើកយុទ្ធនាការប្រយុទ្ធប្រឆាំងនឹងការជួញដូរមនុស្ស ហើយជាចុងក្រោយអឺរ៉ុប នឹងដាក់ឲ្យដំណើរការដោយស្របច្បាប់ ការបញ្ចូនទៅត្រលប់ទៅប្រទេសកំណើតវិញ នៅពេលណាសំណើសុំជ្រកកោនត្រូវបដិសេធ ៕
