នៅក្នុងកិច្ចប្រជុំពិភាក្សាការងារ ជាមួយបណ្តាប្រធានសាលាដំបូង និងព្រះរាជអាជ្ញានៃអយ្យការអមសាលាដំបូងរាជធានី-ខេត្ត នៅទូទាំងប្រទេស នាព្រឹកថ្ងៃទី១៨ ខែធ្នូ នៅទីស្តីការក្រសួង ឯកឧត្តម អង្គវង្ស វឌ្ឍនា ថា នៅក្នុងកិច្ចប្រជុំនាពេលនេះ គឺតម្រូវឲ្យបណ្តាប្រធានសាលាដំបូង និងព្រះរាជអាជ្ញានៃអយ្យការអមសាលាដំបូងរាជធានី-ខេត្តទាំងអស់ លើកឡើងនូវបញ្ហាប្រឈមនានា និងពិនិត្យចាត់ការឲ្យម៉ឺងម៉ាត់ ចំពោះករណីសំណុំរឿងអំពើចោរប្លន់ និងគ្រឿងញៀនជាដើម ។ បន្ថែមលើនេះបញ្ហាប្រមូលទិន្នន័យអំពីសំណុំរឿងពាក់ព័ន្ធនឹងការលួច ឆក់ និងប្លន់ ព្រមទាំងទណ្ឌិតដែលត្រូវបានដោះលែងចេញ ពីពន្ធនាគារក៏នឹងត្រូវបានពិភាក្សាផងដែរ ។
នៅក្រោយកិច្ចប្រជុំនោះដែរ ឯកឧត្តម កើត រិទ្ធ រដ្ឋលេខាធិការក្រសួងយុត្តិធម៌ ថ្លែងថា រាល់លទ្ធផលដែលទទួលបាននៅក្នុងកិច្ចប្រជុំនាពេលនេះ នឹងយកទៅពិនិត្យ ពិភាក្សារួមគ្នាដោះស្រាយបញ្ហា នៅក្នុងកិច្ចប្រជុំមួយទៀតនឹងប្រព្រឹត្តិទៅនៅថ្ងៃទី២២ ខែធ្នូខាងមុខនេះ ដែលនឹងមានការចូលរួម ប្រធានសាលាដំបូង ព្រះរាជអាជ្ញានៃអយ្យការអមសាលាដំបូងរាជធានី-ខេត្ត ដើម្បីពិភាក្សាពីការសហការអនុវត្តច្បាប់ រវាងតុលាការអយ្យការនិងនគរបាលយុត្តិធម៌ ក្នុងការពង្រឹងសន្តិសុខសាធារណៈ ការបង្ការនិងបង្ក្រាបបទល្មើសព្រហ្មទណ្ឌ ។
ឯកឧត្តម កើត រិទ្ធ បន្តថា សម្រាប់កិច្ចប្រជុំនេះ គឺគេបានពិនិត្យពិភាក្សាការងាររបស់ព្រះរាជអាជ្ញាច្រើនជាង ព្រោះព្រះរាជអាជ្ញាគឺជាអ្នកបង្កើតបណ្តឹងអាជ្ញា ហើយការងារនេះព្រះរាជអាជ្ញា ក៏ជាតួអង្គមួយតំណាងឲ្យរាជរដ្ឋាភិបាល ត្រូវតាមដានរឿងក្តីនោះតាំងពីដើម រហូតសំណុំរឿងក្តីនោះចេញជាសាលក្រមស្ថាពរ ។
តាមរយៈកិច្ចប្រជុំនេះ ត្រូវបាន ឯកឧត្តម អង្គវង្ស វឌ្ឍនា រំពឹងទុកថា នឹងមានកែប្រែធំមួយនៅក្នុងស្ថាប័នតុលាការ បន្ទាប់ពីសម្តេចតេជោ ហ៊ុន សែន បានប្រតិកម្ម និងដាក់ចេញនូវបញ្ជាបង្ក្រាបចោរប្លន់ប្រដាប់អាវុធ និងគ្រឿងញៀន ៕
