លោក ទៀ ច័ន្ទសារ អធិការខណ្ឌឫស្សីកែវ ក្រោយពីទទួលបានពាក្យបណ្តឹងពីជនរងគ្រោះ កម្លាំងនគរបាលអធិការដ្ឋាន និងប៉ុស្តិ៍ឫស្សីកែវ បានបើកការស្រាវជ្រាវឈានដល់កំនត់បាននូវមុខសញ្ញាប្រព្រឹត្តសកម្មភាព លុះមកដល់វេលាម៉ោង២៣យប់ ថ្ងៃទី១៧ ខែធ្នូ ឆ្នាំ២០១៥ កម្លាំងជំនាញបានធ្វើការឃាត់ខ្លួនលើមុខសញ្ញាម្នាក់ឈ្មោះ អែម អូនតូច ភេទប្រុស អាយុ១៩ឆ្នាំ ។
លោកបានបន្តថា ដោយយោងតាមចម្លើយ របស់ជនសង្ស័យបានសារភាពថា ក្រោយពីធ្វើសកម្មភាពរួច ខ្លួនបានយកទៅលក់ឲ្យឈ្មោះ សុខ ធាវិន ភេទប្រុស អាយុ៤៤ឆ្នាំ ដោយឈ្មោះនេះគឺជាមុខសញ្ញាទើបចេញពីពន្ធនាគារ សមត្ថកិច្ចក៏បានជំរុញការស្រាវជ្រាវបន្ថែម ទើបរំលេចឃើញនូវបទល្មើសថ្មីបន្ថែមជួញដូរ ផ្តល់ទីតាំង ប្រើប្រាស់គ្រឿងញៀន ។
លោកអធិការបានបន្តទៀតថា លុះមកដល់វេលាម៉ោង៩:៤០នាទី ព្រឹកថ្ងៃទី១៨ ខែធ្នូ ឆ្នាំ២០១៥ បានកំណត់មុខសញ្ញា និងទីតាំងធ្វើសកម្មភាព ពេលវេលាប្រមូលផ្តុំ សមត្ថកិច្ចក៏បានបើកកិច្ចប្រតិបត្តិការបង្ក្រាបក្នុងពេលតែមួយ ស្ថិតនៅចំនុចសំណង់មិនរៀបរយ ជួរមាត់ទន្លេ ក្រោយប៉ុស្តិ៍រដ្ឋបាលទួលសង្កែ ដោយឃាត់បានមុខសញ្ញាចំនួន ១១នាក់ ព្រមទាំងដកហូតវត្ថុតាងរួមមាន គ្រឿងញៀនចំនួន ១២កញ្ចប់, ថង់ប្លាស្ទិកសម្រាប់ច្រកគ្រឿងញៀនមួយចំនួន, ឧបករណ៍ប្រើប្រាស់គ្រឿងញៀនមួយចំនូន, ម៉ូតូ ១គ្រឿងម៉ាកC១០០កូរ៉េ ពណ៌ក្រហម, សម្ភារ និងគ្រឿងបន្លាស់ម៉ូតូមួយចំនួន, ដាវសសំម៉ូរៃចំនួន ២ដើម, កាំបិតសាំងគីមចំនួន២ដើម, ស្លាកលេខម៉ូតូចំនួន១ ។
បច្ចុប្បន្នជនសង្ស័យទាំង ១១នាក់ ត្រូវកម្លាំងនគរបាលអធិការដ្ឋានខណ្ឌឫស្សីកែវ កំពុងកសាងសំណុំរឿង ដើម្បីអនុវត្តន៍តាមនីតិវីធីច្បាប់ ៕
