ការរកឃើញនូវគ្រឿងអលង្ការ ក្រោយពីអំពើប្លន់របស់កងកម្លាំងនគរបាលខេត្តបាត់ដំបង ដោយគេមើលឃើញថាមានការខិតខំ របស់កងកម្លាំងនគរបាលខេត្តបាត់ដំបង ក្រោមការដឹកនាំបញ្ជាផ្ទាល់ របស់លោកឧត្តមសេនីយ៍ទោ ស ថេត ស្នងការនគរបាលខេត្ត បានធ្វើឡើងកាលពីរសៀល ថ្ងៃទី១៧ ខែធ្នូ ឆ្នាំ២០១៥ នៅចំណុចវាលស្រែមួយកន្លែង ស្ថិតក្នុងភូមិទួលព្រំ ឃុំកកោះ ស្រុកមោងឫស្សី ខេត្តបាត់ដំបង ។
សូមបញ្ជាក់ថាពាក់ព័ន្ធ នឹងអំពើប្លន់ក្នុងរយៈពេលចុងក្រោយនេះ ដោយកាលពីកន្លងទៅថ្មីៗ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានប្រមានបកសក្តិ និងដកតំណែងលោកស្នងការចំនួន ៣ខេត្ត បើសិនជាបង្ក្រាបក្រុមចោរប្លន់មិនបានទេនោះ ។
គ្រឿងអលង្ការដែលរកឃើញ រួមមានចិញ្ចៀនចំនួន៤៤វង់ ក្រវិល១៦គូ និងក្រវិល១៦ចំហៀង និងប្រាក់ខ្មែរចំនួន ២ម៉ឺនរៀល ។ គ្រឿងអលង្ការទាំងនោះនៅថ្ងៃដដែល ក៏ត្រូវបាននគរបាលខេត្តបាត់ដំបង ធ្វើការប្រគល់ទៅឲ្យម្ចាស់ដើមវិញផងដែរ ។
សូមរំឭកថា កាលពីល្ងាចថ្ងៃទី១២ ខែធ្នូ ឆ្នាំ២០១៥ ស្ថិតក្នុងភូមិអូរតាគាំ២ សង្កាត់ទួលតាឯក ក្រុងបាត់ដំបង ខេត្តបាត់ដំបង មានក្រុមចោរប្លន់ប្រដាប់អាវុធវែងខ្លីចំនួន២ដើម ជិះម៉ូតូ៣គ្រឿង បានធ្វើសកម្មភាពប្លន់អាជីវករអ្នកលក់មាស២នាក់ ប្តីប្រពន្ធ ដោយបាញ់គំរាមបីគ្រាប់ ហើយប្លន់យកទ្រព្យសម្បត្តិយ៉ាងសន្ធឹហសន្ធាប់បានសម្រេច ខណៈដែលអាជីវករលក់មាសពីរនាក់ប្តីប្រពន្ធ បានជិះរថយន្តចេញពីកន្លែងលក់មាសនៅផ្សារណាត់ មកដល់ចំណុចខាងមុខផ្ទះរបស់ជនរងគ្រោះ ។ ក្រោយពីប្លន់រួចហើយ ក្រុមចោរប្លន់ទាំងនោះបានរត់គេចខ្លួនបាត់ ។ នៅថ្ងៃដដែលកម្លាំងសមត្ថកិច្ចបានដាក់ពង្រាយ និងធ្វើការត្រួតពិនិត្យគ្រប់ ច្រកល្ហកដើម្បីស្វែងរកចាប់ខ្លួនក្រុមចោរប្លន់ទាំងនោះ ។ លុះបន្ទាប់មកសមាជិកក្រុមចោរប្លន់ពីរនាក់ ក៏ត្រូវបានកម្លាំងអាវុធហត្ថនិងកម្លាំងនគរបាលបង្ក្រាប ចាប់ឃាត់ខ្លួនបានជាបន្តបន្ទាប់ ។ ជនសង្ស័យពីរនាក់ជាចោរប្លន់នោះ មានទី១-ឈ្មោះ យ៉ាន់ ថា ភេទប្រុស អាយុ៥៤ឆ្នាំ រស់នៅភូមិស្តៅអែម ឃុំចំបក់ស្រុកបាទី ខេត្តតាកែវ និងទី២-ឈ្មោះ នៅ រស់ អាយុ៥៣ឆ្នាំ មានស្រុកកំណើតនៅខេត្តកោះកុង បច្ចុប្បន្នគ្មានទីលំនៅពិតប្រាកដ ជនសង្ស័យទាំងពីរនាក់សុទ្ធតែមុខសញ្ញា ទើបចេញពីពន្ធនាគារ ។ នៅពេលនោះសមត្ថកិច្ចរកឃើញដកហូតបានចិញ្ចៀន ចំនួន២៩វង់ ក្រវិលចំនួន១៦គូ ម៉ូតូ១គ្រឿង និងកាំភ្លើងខ្លីកា៥៩ មួយដើម ។
ជនសង្ស័យទាំង២នាក់នោះ មកដល់ពេលនេះ ត្រូវបានសមត្ថកិច្ចបញ្ជូនទៅកាន់តុលាការ ហើយត្រូវបានតុលាការបញ្ជាឲ្យយកទៅឃុំខ្លួន នៅពន្ធនាគារខេត្តនោះហើយ ៕
