សមត្ថកិច្ចប្រាប់ឲ្យដឹងថា ប្រតិបត្តិការចុះបង្ក្រាបបទល្មើសគ្រឿងញៀន នៅភូមិត្រពាំងឈូក ក្រុមទី១០ និងក្រុមទី១១ សង្កាត់ទឹកថ្លា ខណ្ឌសែនសុខ នេះដឹកនាំបញ្ជាផ្ទាល់ដោយលោកវរសេនីយ៍ឯក ម៉ក់ ហុង អធិការ នៃអធិការដ្ឋាននគរបាលខណ្ឌសែនសុខ ក្រោយពេលទទួលបានបទបញ្ជាពីគណៈបញ្ជាការឯកភាពខណ្ឌសែនសុខន សហការជាមួយកម្លាំងនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ដោយមានការសម្របសម្រួលពីព្រះរាជអាជ្ញរងអមសាលារាជធានីភ្នំពេញ។
សមត្ថកិច្ចប្រាប់បន្តឲ្យដឹងថា នៅក្នុងប្រតិបត្តិការនេះ ឃាត់បានជនសង្ស័យពាក់ព័ន្ធទៅនឹងបទល្មើសគ្រឿងញៀន ចំនួន ៤២នាក់ ក្នុងនោះ ស្រី ៤នាក់ ដកហូតវត្ថុតាងក្រាមពណ៌សថ្លា ចំនួន ៤កញ្ចប់ ដំបង កាំបិត និងសម្ភារសម្រាប់ជក់គ្រឿងញៀនមួយចំនួនទៀត នាំទៅកាន់អធិការដ្ឋាននគរបាលខណ្ឌសែនសុខ ដើម្បីចាត់ការតាមនីតិវិធី។
គួរបញ្ជាក់ឲ្យដឹងថា តំបន់ភូមិត្រពាំងឈូក ក្រុមទី១០ និងក្រុមទី១១ សង្កាត់ទឹកថ្លា ខណ្ឌសែនសុខ ដែលសមត្ថកិច្ចចុះបង្ក្រាបនេះ គឺប្រមូលផ្តុំទៅដោយក្មេងទំនើង បងតូច បងធំតែងតែមកជួបជុំគ្នា ប្រើប្រាស់គ្រឿងញៀន បើទោះបីសមត្ថកិច្ចមូលដ្ឋានខិតខំ និងព្យាយាមបង្ក្រាបជាច្រើនលើច្រើនសារយ៉ាងណាក៏ដោយ ក៏មិនចេះអស់ដែរ ហើយនេះក៏មិនមែនជាលើកទីមួយនោះដែរ ដែលគណៈបញ្ជាការឯកភាពខណ្ឌសែនសុខ សហការជាមួយកម្លាំងនគរបាលការិយាល័យប្រឆាំងគ្រឿងញៀន នៃស្នងការនគរបាលរាជធានីភ្នំពេញ ចុះបង្ក្រាបជាទ្រុងទ្រាយធំបែបនេះ ៕
