មេតុងទីនដែលរត់បាត់នោះ ត្រូវបានគេស្គាល់ឈ្មោះ ហ៊ុយ ហួច (ហៅម៉ែអាចិន) អាយុ៥៧ឆ្នាំ ប្រកបមុខរបរធ្វើជាមេតុងទីន និងចងការប្រាក់ ដែលមានប្តីឈ្មោះ លឹម ស៊ីណាត (ហៅជាង) ជាប្រធានក្រុមទៀតផង និងមានកូនក្នុងបន្ទុក៥នាក់ (ស្រី៣)។
ប្រភពពីកូនតុងទីនម្នាក់បានឲ្យដឹងថា ការដែលពួកគាត់មកប្រមូលផ្តុំនៅមុខផ្ទះមេតុងទីនជាច្រើននាក់បែបនេះ គឺព្រោះតែមេតុងទីនបានប្រមូលលុយពីពួកគាត់សរុបប្រមាណជាង២លានដុល្លារ ក្រោយពីប្រមូលលុយបានហើយមេបានរត់គេចខ្លួនបាត់ស្រមោល។
ប្រភពដដែលបានឲ្យដឹងទៀតថា តុងទីនដែលពួកគាត់លេងនោះមានច្រើនវាក់ និងច្រើនក្បាល ដោយក្នុង១ក្បាលៗ មានពី១០០ដុល្លារ ៦០ដុល្លារ ៥០ដុល្លារ ៣០ដុល្លារ ក្នុង១ខែ។ គ្រាន់តែលុយអ្នកលេងតុងទីន ដែលមេប្រមូលបាននោះក្នុងម្នាក់ៗអស់រាប់ពាន់ រាប់ម៉ឺនដុល្លារ។ ក្នុងនោះក៏មានអ្នកខ្លះបានចាញ់បោកដោយសារតែប្រាក់ចងការ ដាក់ប្លង់ដីទៅឲ្យមេតុងទីននោះដើម្បីបានការប្រាក់ និងអ្នកខ្លះទៀតបានឲ្យលុយទៅមេតុងទីនយកប្រាក់ទៅដាក់ចងការឲ្យគេ ព្រោះចង់បានការប្រាក់ស៊ីនោះ ក៏អស់រាប់ពាន់ រាប់ម៉ឺនដុល្លារដែរ។
ប្រភពពីកូនតុងទីនខ្លះបាននិយាយថា មូលហេតុដែលពួកគាត់ជឿទុកចិត្តហើយបានលេងតុងទីនជាមួយមេតុងទីនដែលរត់នោះ ព្រោះគាត់ជាមនុស្សរស់នៅក្នុងភូមិជាមួយគ្នា ហើយប្តីរបស់មេតុងទីន គឺជាប្រធានក្រុមទៀត។ ពួកគាត់ប្រាប់បន្តថា ការលេងតុងទីន និងដាក់ប្រាក់ចងការជាមួយមេតុងទីន គឺជាង១០ឆ្នាំមកហើយពុំដែលមានបញ្ហាអីកើតឡើងទេ។ ពួកគាត់បានបន្តទៀតថា មុនថ្ងៃដែលមេតុងទីនរត់នោះ គឺកាលពីថ្ងៃទី១១ ខែធ្នូ ឆ្នាំ២០១៥ មេតុងទីននោះបានដើរប្រមូលលុយពីកូនៗបានប្រមាណជាង១ម៉ឺនដុល្លារបន្ថែមទៀត ទើបរត់គេចខ្លួនបាត់។
ក្រោយពីដឹងថា មេរត់បាត់ពួកគាត់ទាំអស់ជាង២០០នាក់ បានមកប្រមូលផ្តុំនៅមុខផ្ទះមេកកកុញ និងថាថ្ងៃច័ន្ទនឹងនាំគ្នាទៅដាក់ពាក្យបណ្តឹងនៅតុលាការរាជធានីភ្នំពេញ ដើម្បីជួយអន្តរាគមន៍ក្នុងរឿងនេះ ៕
