លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់ឲ្យដឹងនៅថ្ងៃទី១៨ ខែធ្នូ ឆ្នាំ ២០១៥ នេះថា មកដល់ពេលនេះ ប្រជាកសិករក្នុងខេត្តបន្ទាយមានជ័យ អនុវត្តការងារបង្កបង្កើនផលដំណាំស្រូវប្រាំង បានចំនួន ២១.១០០ ហិកតា ស្មើនឹងប្រមាណ ១៧៦ភាគរយ នៃផែនការដែលបានដាក់ចុះ និងកំពុងដាំដុះបន្ត។
លោកប្រធានមន្ទីរ បានបន្តថា ការអនុវត្តលើសពីផែនការនេះ បានធ្វើឲ្យតំបន់មួយចំនួន ប្រឈមនឹងការខ្វះខាតទឹក។ ជាក់ស្តែងផ្ទៃដីចំនួន ១.៧៣៤ ហិកតា ស្ថិតក្នុងសង្កាត់ព្រះពន្លា ក្រុងសិរីសោភ័ណ និងឃុំឫស្សីក្រោក ឃុំគយម៉ែង ស្រុកមង្គលបូរី ដែលយើងបាន និងកំពុងអន្តរាគមន៍នៅពេលនេះ ។
លោក យឹម ប៊ុនរ៉ុម បន្តថា ក្នុងការងារអន្តរាគមន៍នេះ យើងប្រើប្រាស់ម៉ាស៊ីនខ្នាតមធ្យម (៦៥សេះ) សរុប ចំនួន ៥គ្រឿង បូមយកទឹកពីស្ទឹងសិរីសោភ័ណ បញ្ជូនតាមប្រឡាយមេ ១ខ្សែ ដែលមានប្រវែងជាង ១០គីឡូម៉ែត្រ ទៅសង្គ្រោះដំណាំស្រូវរបស់បងប្អូនប្រជាកសិករនៅតំបន់ទាំងនោះ ៕
