លោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំង បានឲ្យដឹងថា៖ នៅក្នុងខ្នើតខែនេះ គឺនៅថ្ងៃទី២ និងទី៣កើត ឃើញថាត្រីប្រហុកបានចាប់ផ្តើមត្រូវនៅខាងឃុំឆ្នុកទ្រូ ស្រុកបរិបូណ៌ បានរហូតដល់ជិត២០០តោន។ ដោយឡែកនៅចំណុច៣ទៀត ដែលជាទីតាំងប្រជាកសិករចុះមកធ្វើត្រីប្រហុកដែរនោះ គឺនៅក្នុងភូមិចុងកោះ សង្កាត់កំពង់ឆ្នាំង, ភូមិតាជេស និងភូមិកំពង់ប្រសាទ ស្រុកកំពង់ត្រឡាច មិនទាន់ត្រូវត្រីប្រហុកខ្លាំងនៅឡើយទេ។ លោកបានបន្ថែមថា មកដល់ថ្ងៃទី១៤ ខែធ្នូ ឆ្នាំ២០១៥នេះ ខ័ណ្ឌរដ្ឋបាលជលផល នៅមិនទាន់ប៉ាន់ប្រមាណ លើការប្រមូលត្រីប្រហុកនៅគ្រប់ទីកន្លែងបាននៅឡើយទេ ព្រោះថាការចរាចរណ៍របស់ត្រី គឺអាស្រ័យទៅនឹងកត្តាអាកាសធាតុផងដែរ។
លោក សោម ភិរុណ បានអំពាវនាវផងដែរ ដល់ប្រជាកសិករទាំងអស់ ត្រូវត្រៀមលក្ខណៈជាស្រេច ដើម្បីចុះមកធ្វើប្រហុកទុកហូបនៅតាមទីតាំងមាត់កំពង់ទាំង៤ ព្រោះត្រីប្រហុកត្រូវតែនៅក្នុងខ្នើតតែប៉ុណ្ណោះ ហើយនៅមាត់កំពង់ដរឆ្នុកទ្រូវិញ ឃើញថាប្រជាពលរដ្ឋជាច្រើន បានចុះមកធ្វើប្រហុកហើយនៅដើមខ្នើតនេះផងដែរ៕
