សម្តេចក្រឡាហោម ស ខេង មានប្រសាន៍បញ្ចាក់ថា ករណីចោរប្លន់បច្ចុប្បន្ននេះ បានកើតឡើងហាក់ដូចជាធ្វើសកម្មភាពប្លន់ មានអង្គការចាត់តាំង ដែលបណ្តាស្នងការនគរបាល ត្រូវមានវិធានការប្រុងប្រយ័ត្ន ក៏ត្រូវយកចិត្តទុកដាក់កាន់តែខ្លាំងឡើង លើការបង្ក្រាបបទល្មើសប្លន់ទាំងនេះ ។
សូមបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃចន្ទទី១៤ ធ្នូ ក៏បានចេញបញ្ជាជាថ្មីទៀត ឲ្យអាជ្ញាធរគ្រប់មូលដ្ឋាន យកចិត្តទុកដាក់បង្កើនការវាយបង្ក្រាប ក្រុមចោរប្រដាប់អាវុធ ដែលធ្វើសកម្មភាពប្លន់ប្រជាពលរដ្ឋ យ៉ាងសាហាវនាពេលថ្មីៗនេះ។
ក្នុងនោះសម្តេចតេជោ ហ៊ុន សែន បានមានប្រសាសន៍បញ្ជាក់ថា សូមឲ្យគ្រប់ទីកន្លែងទាំងអស់បង្កើនការប្រុងប្រយ័ត្ន និងវ៉ៃបង្ក្រាបពួកឧក្រិដ្ឋជន ប្លន់ប្រដាប់អាវុធនេះ ព្រោះក្រុមនេះ គឺជាក្រុមគ្មានសាសនាណាទាំងអស់ ព្រោះគ្មានសាសនាណាប្រដៅឲ្យពួកនេះ ប្រព្រឹត្តអំពើលួចប្លន់នោះទេ អញ្ជឹងសុំក្រៅពីអាជ្ញាធរថ្នាក់ជាតិ កម្លាំងប្រដាប់អាវុធ កម្លាំងមានសមត្ថកិច្ចថ្នាក់ជាតិ ថ្នាក់ក្រោមជាតិទាំងអស់ បង្កើននូវការប្រុងប្រយ័ត្ន ហើយបើកប្រតិបត្តិការ ដើម្បីទប់ស្កាត់ និងបង្ក្រាបចំពោះអំពើប្លន់ប្រដាប់អាវុធ និងក្រុមជនឃោរឃៅ។
ករណីចោរប្លន់ប្រដាប់អាវុធថ្មីៗនេះ គឺបានធ្វើសកម្មប្លន់អាជីវករ លក់គ្រឿងអាលង្ការ និងទីតាំងកន្លែងផ្ទេរប្រាក់ Wing ចំនួន៣កន្លែង ទៅប្រទេសកម្ពុជា ក្នុងនោះមានខេត្តបាត់ដំបង ពោធិ៍សាត់ និងកណ្តាលជាដើម។ ក្រោយមានករណីនេះ សម្តេចតេជោ ហ៊ុន សែន បានលើកឡើងថា មានរបាយការណ៍មួយចំនួន រាយការណ៍ថា ក្រុមចោរទាំងនោះ មានអ្នកខ្លះមុខដដែលៗ ដែលធ្លាប់ជាប់ពន្ធនាគាររួចទៅហើយ។
ជាមួយគ្នានេះសម្តេចតេជោ ហ៊ុន សែន ក៏បានជំរុញឲ្យក្រសួងយុត្តិធម៌ ពិនិត្យឲ្យបានល្អិតល្អន់ ចំពោះការលើកលែងទោសឲ្យទណ្ឌិត នៅក្នុងពន្ធនាគារ។ សម្តេចបន្តថា បើសិនជាទណ្ឌិតនោះ ជាចោរប្លន់ប្រដាប់អាវុធនោះ សម្តេចនឹងមិនស៊ីញ៉េ ស្នើឲ្យលើកលែងទោសនោះទេ ហើយស្នើកុំឲ្យក្រសួងយុត្តិធម៌ ដាក់បញ្ចូលឈ្មោះ ទណ្ឌិត ដែលជាចោរប្លន់ ដើម្បីឲ្យសម្តេចជួយស្នើលើកលែងទោស ៕
