បទបញ្ជារបស់សម្តេចអគ្គមហាសេនាបតីតេជោ ហ៊ុន សែន នេះ បានធ្វើឡើងដោយយោងលើសភាពការណ៍សន្តិសុខ នៅទូទាំងប្រទេស ជាពិសេសរយៈពេលប៉ុន្មានថ្ងៃចុងក្រោយនេះ មានអំពើប្លន់ទ្រព្យសម្បត្តិប្លន់ម៉ូតូ បានកើតឡើងយ៉ាងខ្លាំង នៅរាជធានីភ្នំពេញ និងតាមបណ្តាខេត្ត ដូចជា នៅបាត់ដំបង ពោធិ៍សាត់ និងខេត្តកណ្តាល ជាដើម។
មានប្រសាសន៍នៅក្នុងកិច្ចប្រជុំផ្សព្វផ្សាយ «ការបញ្ជ្រាបទស្សនទានសីលធម៌សាសនា ដើម្បីសុខដុមនីយកម្មនៅកម្ពុជា» ក្នុងឱកាសឧទ្ទិសចំពោះទិវាបួងសួង និងសកម្មភាពសាសនា ដើម្បីកុមារកាលពីព្រឹកថ្ងៃទី១៤ ខែធ្នូ ឆ្នាំ២០១៥ នៅសាលមហោស្រពកោះពេជ្រ សម្តេចអគ្គមហាសេនាបតីតេជោ ហ៊ុន សែន បានបញ្ជាក់ថា ត្រូវធ្វើយ៉ាងណាឲ្យប្រជាពលរដ្ឋរបស់យើង បានមិនត្រឹមតែសន្តិភាពទាំងមូលនោះទេ ក៏ប៉ុន្តែសន្តិភាពខាងផ្លូវចិត្ត វៀរចាកផុតពីអំពើប្លន់នៃពួកទុច្ចរិត។
តាមរបាការណ៍បានឲ្យដឹងថា ក្រុមឧក្រិដ្ឋជនដែលជាចោរប្លន់នោះ មុខដដែលៗ ហើយដែលក្រុមមួយនោះ បានបាញ់តដៃជាមួយកងរាជអាវុធហត្ថ កាលពីប៉ុន្មានថ្ងៃមុននេះ ដែលត្រូវអាវុធហត្ថ ប្រើសិទ្ធការពារខ្លួន ក្នុងពេលប្រតិបត្តិការ គឺមុខសញ្ញាដែលស្លាប់ពីរនាក់នោះ ទើបដោះលែងចេញពីគុក។ ទាក់ទងបញ្ហានេះ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ សូមឲ្យឯកឧត្ដម រដ្ឋមន្ត្រីក្រសួងយុត្តិធម៌ ពិនិត្យពិច័យ អ្នកដែលជាប់គុក ដោយសារប្លន់ និងគ្រឿងញៀន ត្រូវពិនិត្យឲ្យបានច្បាស់លាស់ កុំសូវដោះលែងពេក ឲ្យតែចេញមកវាប្លន់ដដែលៗ គឺមានរបាយការណ៍ករណីនេះច្រើនកន្លែងណាស់។ សម្តេចអគ្គមហាសេនាបតីតេជោ ហ៊ុន សែន ក៏បានស្នើឲ្យរដ្ឋមន្ត្រីក្រសួងយុត្តិធម៌ និងក្រសួងមហាផ្ទៃ ធ្វើការជាមួយខាងពន្ធនាគារអំពីបញ្ហានេះ ដោយហេតុថា របាយការណ៍របស់អាវុធហត្ថ និងនគរបាលឲ្យដឹងថា មុខសញ្ញាដែលធ្វើសកម្មភាពហ្នឹង គឺជាមុខសញ្ញាដែលត្រូវបានលើកលែងទោស ហើយពេលចេញមក គឺធ្វើសកម្មភាពប្លន់ទៀត លួចទៀត ជួញដូរគ្រឿងញៀនទៀត ។
សម្តេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា សម្តេចក៏បានដាក់បញ្ជាបន្ថែមរួចមកហើយ សកម្មភាពក៏ត្រូវតែបានធ្វើដោយព្រមៗគ្នា គ្រប់កម្លាំង ហើយប្រជាពលរដ្ឋចូលរួមសហការផ្ដល់ព័ត៌មាន ដើម្បីវាយបំបែកសំបុកពួកធ្វើសកម្មភាពប្លន់ប្រដាប់អាវុធទាំងនេះ។ ដូច្នេះចំណុចនេះ សូមឲ្យស្ថាប័ននៅថ្នាក់ជាតិ និងអាជ្ញាធរថ្នាក់ក្រោមជាតិ កម្លាំងប្រដាប់អាវុធគ្រប់ប្រភេទ ធ្វើសកម្មភាពព្រមៗគ្នា ជាមួយនឹងការសហការរបស់ប្រជាពលរដ្ឋរបស់យើង៕
