យោងតាមវីដេអូមួយ ដែលត្រូវបានបង្ហោះដោយអង្គការនេះបានបង្ហាញថា អង្គការរដ្ឋអ៊ីស្លាម ISIS បានប្តេជ្ញារួចជាស្រេចហើយ ក្នុងការចូលទៅវាយប្រហារនៅសហរដ្ឋអាមេរិកនិងបណ្តាប្រទេស មួយចំនួនទៀត ដែលជាសម្ព័ន្ធមិត្តរបស់សហរដ្ឋអាមេរិក ជាពិសេសគឺចូលទៅវាយប្រហារនៅកណ្តា លទីក្រុងញូយ៉កតែម្តង ដែលជាសងសឹកចំពោះចំណាត់ការខាងយោធារបស់ប្រទេសទាំងនេះ ទៅ អង្គការរដ្ឋអ៊ីស្លាម ISIS នៅប្រទេសស៊ីរី ។
ប្រធានភ្នាក់ងារស៊ើបការណ៍សម្ងាត់អាមេរិក CIA បានអះអាងថា ក្រុមអង្គការរដ្ឋអ៊ីស្លាម ទំនងជាមានរៀបចំផែនការវាយប្រហារភេរវកម្មផ្សេងទៀត ស្រដៀងនឹងការវាយប្រហារនៅក្រុងប៉ារីស កាលពីថ្ងៃសុក្រទី១៣វិច្ឆិកា។ ទន្ទឹមពេលគ្នានេះ គេឃើញមានវីដេអូមួយដែលពួកអង្គការរដ្ឋអ៊ីស្លាមគំរាមវាយប្រហារ អាមេរិកដល់ទីក្រុងវ៉ាស៊ីនតោន ។
លោក Jonh Brennan ប្រមុខភ្នាក់ងារចារកិច្ចអាមេរិក បាននិយាយទៅកាន់ក្រុមការងារមួយក្តាប់តូចនៅវ៉ាស៊ីនតោន ដោយបានបញ្ជាក់បន្ថែមទៀតថា ពួកអង្គការរដ្ឋអ៊ីស្លាម មិនស្ងប់ចិត្តនឹងសកម្មភាពវាយប្រហារយ៉ង់ឃ្នងកាប់សម្លាប់មនុស្ស នៅក្នុងប្រទេសអ៊ីរ៉ាក់ និងស៊ីរី ឬពង្រីកមនោគម វិជ្ជា សាបព្រោះអំពើហិង្សានៅតំបន់ដើមបូព៌ា អាស៊ីអាគ្នេយ៍ និងអាហ្វ្រិកទេ តែបាននិងកំពុងរៀបចំប្រតិបត្តិការនៅក្រៅតំបន់ដែនអំណាចទាំងនេះ តាមរយៈការវាយប្រហារភេរវកម្ម ធ្វើឱ្យស្លាប់ជីវិតឱ្យបានខាងតែច្រើន ។
បើតាមប្រមុខចារកិច្ចអាមេរិក ភ្នាក់ងារសន្តិសុខ និងចារកិច្ចអាមេរិក នៅពេលនេះ កំពុងធ្វើការយ៉ាងប្រញឹក និងពិចារណាលើគ្រប់ចំណុច ដើម្បីប្រមើលមើលថាតើពួកអង្គការរដ្ឋអ៊ីស្លាមអាចមានសមត្ថភាពរៀបចំផែនការភេរវកម្មលេចចេញតាមណាខ្លះ។ អាមេរិកក៏កំពុងសហការយ៉ាងជិត ស្និទ្ធិជាមួយសមភាគីបារាំង និងរុស្ស៊ី ដើម្បីប្រយុទ្ធប្រឆាំងនឹង សកម្មភាពភេរវនិយមនេះ។
សូមបញ្ជាក់ថា កាលពីនៅថ្ងៃចន្ទទី១៦ខែវិច្ឆិកាកន្លងមកនេះ នាយករដ្ឋមន្ត្រីបារាំង ក៏បានទទួ លស្គាល់ដែលថា បារាំងកំពុងស្ថិតក្នុងសង្គ្រាម។ គឺជាសង្គ្រាមទល់នឹងភេរវកម្ម ដែលអាចបន្តកើតមានតទៅទៀតនាថ្ងៃខាងមុខក្នុងប្រទេសបារាំង។ ចំណែកនាយករដ្ឋមន្ត្រីអង់គ្លេស ក៏បានអះអាងថាមានការរៀបចំវាយប្រហារភេរវកម្មប្រឆាំងនឹងអង់គ្លេសដូចបារាំងដែរ។ ក្នុងរយៈពេល៦ខែកន្លងមក នេះ អង់គ្លេសកម្ចាត់ផែនការភេរវកម្មបានទាន់ពេលវេលាដល់ទៅ៧ ។
មិនដឹងដោយហេតុចៃដន្យ ឬយ៉ាងណា ការបញ្ជាក់របស់បារាំងអង់គ្លេស អាមេរិក ធ្លាក់មកជួនចំពេល ដែលមានការបង្ហោះខ្សែវីដេអូមួយ ផ្សព្វផ្សាយអំពីការគំរាមកំហែង របស់ពួកអង្គការរដ្ឋអ៊ីស្លាម ចង់វាយប្រហារភេរវកម្មលើគ្រប់បណ្តាប្រទេសក្នុងក្រុមប្រឹក្សា សម្ព័ន្ធអន្តរជាតិដែលបើកការវាយប្រហារផ្លូវអាកាសលើស៊ីរីនិង អ៊ីរ៉ាក់។ នៅក្នុងវីដេអូនោះ បានបង្ហាញថា បុរសម្នាក់បានស្បថថានឹងធ្វើការវាយប្រហារអាមេរិក ឱ្យដល់ក្រុងវ៉ាស៊ីនតោនតែម្តង។ប៉ុន្តែក្នុងពេលភ្លាមៗដូច្នេះ គេពុំទាន់អាចផ្ទៀងផ្ទាត់អំពីភាពពិតនៃខ្សែវីដេអូនេះនៅឡើយទេ។
កាលពីពេលថ្មីៗកន្លងទៅនេះ នាយករដ្ឋមន្ត្រីអង់គ្លេស លោក David Cameron បានអោយ ដឹងថា រហូតដល់ឆ្នាំ២០១៥នេះ ជនជាតិអង់គ្លេសប្រមាណជាង១៦០០នាក់ បានចុះចូលជាមួយនឹង ក្រុមអង្គការដ្ឋអ៊ីស្លាម ISIS ហើយក្រុម ISIS ដែលជាជនជាតិអង់គ្លេសប្រមាណជាង៥០០នាក់ កំពុង រស់នៅលើទឹកដីអង់គ្លេស ក្នុងការផ្តល់ព័ត៌មានទៅប្រមុខដឹកនាំ ISIS និងកំពុងរៀបចំគម្រោង វាយ ប្រហារទៅលើប្រជាពលរដ្ឋអង់គ្លេស ដែលជាទឹកដីកំណើតរបស់ខ្លួន ។
ក្នុងរយៈពេលជាងមួយទសវត្សរ៍កន្លងមកនេះ សហរដ្ឋអាមេរិករួមជាមួយនឹងបណ្តាប្រទេស ជាសម្ព័ន្ធមិត្ត បានចេញមុខធ្វើសង្គ្រាមយ៉ាងពេញទំហឹងជាមួយនឹងអង្គការភេរវកម្មពិភពលោក អាល់ កៃដា និងក្រុមអ៊ីស្លាមនិយមជ្រុលISIS នៅជុំវិញពិភពលោក ប៉ុន្តែការប្រយុទ្ធប្រឆាំងនឹងអំពើភេរវកម្ម ដែលបង្ករឡើងដោយអង្គការភេរវកម្មពិភពលោក អាល់ កៃដា និងក្រុមអ៊ីស្លាមនិយមជ្រុលISIS ពីសំ ណាក់សហរដ្ឋអាមេរិកនិងសម្ព័ន្ធមិត្ត ហាក់ដូចជាមិនមានប្រសិទ្ធភាពទេ ដោយក្រុមភេរវករទាំងនេះ នៅតែមានវត្តមាន និងធ្វើសកម្មភាពបែបភេរវកម្មនៅជុំវិញលើពិភពលោកដដែល ។
ក្រុមអ្នកតាមដានព្រឹត្តិការណ៏អន្តរជាតិ បានអោយដឹងថា មូលហេតុសំខាន់ពីរយ៉ាង ដែលស ហរដ្ឋអាមេរិកនិងសម្ព័ន្ធមិត្ត មិនអាចបញ្ចប់ចលនាភេរវកម្មរបស់ក្រុមភេរវករពិភពលោកបាន គឺទី១ ដោយសារតែក្រុមភេរវករ គឺជាមនុស្សដែលសហរដ្ឋអាមេរិកបានបង្កើតនិងបង្វឹកដោយផ្ទាល់ចាប់តាំ ងពីឆ្នាំ១៩៤៥កន្លងមក ។
សូមរំឭកជូនបន្តិចដែរថា កាលពីជាង៧០ឆ្នាំមុន សហរដ្ឋអាមេរិកនិងអតីតសហភាពសូវៀត បានបង្កើតសង្គ្រាមត្រជាក់ជាមួយគ្នាយ៉ាងក្តៅគគុក ដោយព្យាយាមដណ្តើមយកទីតាំងភូមិសាស្ត្រ នយោបាយនៅជុំវិញពិភពលោក ។
នៅប្រទេសអាហ្វហ្កានិស្ថាន អតីតសហភាពសូវៀត បានគាំទ្រខាងរដ្ឋាភិបាល ប៉ុន្តែសហរដ្ឋ អាមេរិកបានបង្កើតក្រុមឧទ្ទាមមួយក្រុម ឈ្មោះថា មូចាហ៊ីឌីន ដើម្បីធ្វើសង្គ្រាមប្រយុទ្ធប្រឆាំងជាមួយ រដ្ឋាភិបាលអាហ្វហ្កានិស្ថាន ដែលគាំទ្រដោយអតីតសហភាពសូវៀត ។
សង្គ្រាមកាប់សម្លាប់គ្នា រវាងរដ្ឋាភិបាលអាហ្វហ្កានិស្ថាន ដែលគាំទ្រដោយអតីតសហភាពសូវៀត និងក្រុមឧទ្ទាម មូចាហ៊ីឌីន ដែលគាំទ្រដោយសហរដ្ឋអាមេរិក បានអូសបន្លាយរហូតដល់ឆ្នាំ១៩៨៩ ទើបអតីតសហភាពសូវៀតបានដកកងទ័ពរបស់ខ្លួនចេញពីប្រទេសអាហ្វហ្កានិស្ថាន ហើយរដ្ឋា ភិបាលអាហ្វហ្កានិស្ថាន ក៏បានចាញ់ពួកឧទ្ទាម មូចាហ៊ីឌីន ដែលមានន័យថា អតីតសហភាពសូវៀត បានចាញ់សហរដ្ឋអាមេរិក ក្នុងសង្គ្រាមនៅប្រទេសអាហ្វហ្កានិស្ថាន នៅឆ្នាំ១៩៨៩ ។
ក្រោយមកទៀត ក្រុមឧទ្ទាម មូចាហ៊ីឌីន ដែលសហរដ្ឋអាមេរិកបានបង្កើតឡើងនោះ បានប្រែ ក្លាយទៅជាអង្គការភេរវកម្មពិភពលោក អាល់កៃដា ហើយបានវាយប្រហារទៅលើសហរដ្ឋអាមេរិក កាលពីថ្ងៃទី១១ខែកញ្ញាឆ្នាំ២០០១កន្លងទៅ ដោយបើកយន្តហោះដឹកអ្នកដំណើរ ទៅបំបុកអាគារ ពាណិជ្ជកម្មពិភពលោក ។
ដោយសារតែអង្គការភេរវកម្មពិភពលោក អាល់កៃដា គឺជាក្រុមឧទ្ទាម មូចាហ៊ីឌីន ដែលសហ រដ្ឋអាមេរិកបានបង្កើតឡើងនិងបង្វឹកគ្រប់ជំនាញហើយនោះ ទើបរហូតមកដល់ពេលនេះ ទាំងសហ រដ្ឋអាមេរិកនិងសម្ព័ន្ធមិត្ត មិនអាចបញ្ចប់រចនាសម្ព័ន្ធរបស់អង្គការភេរវកម្មបាន ។
កត្តាមួយទៀត ដែលសហរដ្ឋអាមេរិកនិងសម្ព័ន្ធមិត្ត មិនអាចបញ្ចប់រចនាសម្ព័ន្ធរបស់អង្គការ ភេរវកម្មពិភពលោកបាននោះ គឺដោយសារតែអង្គការនេះ មិនមានរូបរាងច្បាស់លាស់ ដែលជាការ ងាយស្រួលក្នុងការវាយប្រហារ ។
ពាក្យថាគ្មានរូបរាងច្បាស់លាស់ មានន័យថា អង្គការភរវកម្ម មិនមានទីតាំងច្បាស់លាស់ និង មិនមានចំនួនសមាជិក, កងទ័ព ឫចំនួនក្រុមសកម្មប្រយុទ្ធច្បាស់លាស់នោះទេ ដោយមានតែឈ្មោះ សកម្មភាព និងរចនាសម្ព័ន្ធតែប៉ុណ្ណោះ ដែលនេះ ក៏ជាមូលហេតុដែលនាំអោយសហរដ្ឋអាមេរិកនិង សម្ព័ន្ធមិត្ត ពិបាកបំផុតក្នុងការវាយប្រហារ ឫបិទបញ្ចប់រចនាសម្ព័ន្ធរបស់ក្រុមភេរវកម្មមួយនេះ ។
ទាក់ទិនទៅនឹងអំពើភេរវកម្មនៅទីក្រុង ប៉ារីស ប្រទេសបារាំង អត្តសញ្ញាណរបស់អត្តឃាត ជនពីរនាក់ថ្មីបន្ថែមទៀត ត្រូវបានបង្ហាញ ក្នុងនោះមានម្នាក់គឺជាអ្នកចុចបំផ្ទុះភេរវកម្មអត្តឃាត ក្បែរស្តាត ដែលមានលិខិតឆ្លងដែនស៊ីរីជាប់នឹងខ្លួន។ ប៉ូលិសបារាំងបានរកឃើញអត្តសញ្ញាណភេរវជនពីរនាក់ដែរ និងបានចេញដីកាអន្តរជាតិតាមចាប់ខ្លួនភេរវជនម្នាក់ ដែលទំនងជាអ្នកស្ថិតក្នុងក្រុមបាញ់រះតាមផ្លូវ ឈ្មោះ Salah Abdeslam ជាសរុបប៉ូលិសបារាំងបានកំណត់អត្តសញ្ញាណភេរវជនបាន៥នាក់ហើយ ក្នុងចំណោមអ្នកស្លាប់ទាំង៧នាក់ ។
ភេវរករទាំងនោះ មាន Ahmed Almohammad , Samy Amimour ,Ismaïl Omar Mostefaï , Bilal HadfiនិងIbrahim Abdeslam ហើយបើតាមក្រុមអ្នកអង្កេតបានអោយដឹងថា Salah Abdeslam ជាមេកើយធំ ជាអ្នកបញ្ជានិងរៀបចំផែនការធ្វើភេរវកម្មនៅប៉ារីស។ មានអាយុ២៦ឆ្នាំ Salah Abdeslam កម្ពស់១ម៧៥ កើតនៅក្រុងព្រុចសែល ប្រទេសបែលហ្សិក កំពុងរត់គេចខ្លួនមិនដឹងនៅទីណា។ Salah Abdeslam ជាអ្នកចេញឈ្មោះទៅជួលឡានម៉ាកពីរគ្រឿង សម្រាប់យកមកធ្វើភេរវកម្មនៅប៉ារីស កាលពីយប់ថ្ងៃសុក្រ ៕
