លោកវរសេនីយ៍ទោ មឿង សារុន អធិការនគរបាលស្រុកសំរោង បានឲ្យដឹងថា មុនពេលកើតហេតុមានរថយន្តមួយគ្រឿង ម៉ាកហ៊ីយ៉ាន់ដាយ ពណ៌ស ពាក់ផ្លាកលេខភ្នំពេញ 3C-7696 ដោយមានដឹកស៊ីម៉ងត៍ពេញរថយន្ត បើកបរដោយយុវជនម្នាក់ ធ្វើដំណើរមកពីទិសខាងត្បូងទៅជើង ពេលធ្វើដំណើរជិតដល់ចំណុចកើតហេតុ បានបើករថយន្តជែងឡើងស្ពានយ៉ាងលឿន លុះដល់ចំណុចកើតហេតុបានបុកគ្នាយ៉ាងពេញទំហឹងជាមួយរថយន្ត ម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខភ្នំពេញ 3C-8004 ជារថយន្តរបស់ក្រុមហ៊ុនភេសជ្ជៈខារ៉ាបាវ បើកបរដោយបុរសម្នាក់ និងមានអ្នករួមដំណើរជាមួយចំនួន ៤នាក់ បណ្តាលឲ្យអ្នកបើកបររថយន្តដឹកស៊ីម៉ងត៍គៀបស្លាប់នៅក្នុងរថយន្ត ចំណែកអ្នកបើកបររថយន្តក្រុមហ៊ុនភេសជ្ជៈខារ៉ាបាវ និងអ្នករួមដំណើរ ៣នាក់ បានគៀបស្លាប់ រីឯម្នាក់ទៀតរងរបួសធ្ងន់។
លោកអធិការបានបន្តថា អ្នកបើកបររថយន្តដឹកស៊ីម៉ងត៍មានឈ្មោះ ទឹម សុខវើន ភេទប្រុស អាយុ ១៩ឆ្នាំ មុខរបរអ្នកបើកបររថយន្ត រស់នៅភូមិដូនទួត ឃុំញ៉ែងញ៉ង ស្រុកត្រាំកក់ ខេត្តតាកែវ (ស្លាប់)។ ចំណែកអ្នកបើកបររថយន្តក្រុមហ៊ុនខារ៉ាបាវ មានឈ្មោះ សុង អូន ភេទប្រុស អាយុ ៣៥ឆ្នាំ មុខរបរបើកបររថយន្ត មានទីលំនៅភូមិថ្មពេជ ឃុំថ្មពេជ ស្រុកត្បូងឃ្មុំ ខេត្តត្បូងឃ្មុំ (ស្លាប់) និងអ្នករួមដំណើរជាមួយមានគ្នា ៤នាក់៖ ទី១.ឈ្មោះ ហេង ផល្លា ភេទប្រុស អាយុ ៣៣ឆ្នាំ មុខរបរ កម្មករក្រុមហ៊ុនខារ៉ាបាវ (ស្លាប់), ទី២.ឈ្មោះ ធា ភេទប្រុស អាយុ ៣២ឆ្នាំ មុខរបរកម្មករ (ស្លាប់) អ្នកទាំងពីររស់នៅភូមិជុក ឃុំត្បូងឃ្មុំ ស្រុកត្បូងឃ្មុំ ខេត្តត្បូងឃ្មុំ, ទី៣.ឈ្មោះ ហួន ភេទប្រុស អាយុ ៣០ឆ្នាំ មុខរបរកម្មករ រស់នៅខេត្តស្វាយរៀង (ស្លាប់) និងទី៤.ឈ្មោះ ស៊ី ណាវុន ភេទប្រុស អាយុ ៣០ឆ្នាំ មុខរបរកម្មករ រស់នៅសង្កាត់ចោមចៅ ខណ្ឌចោមចៅ រាជធានីភ្នំពេញ រងរបួសធ្ងន់ បញ្ជូនទៅព្យាបាលនៅមន្ទីរពេទ្យ រាជធានីភ្នំពេញ។
ទាក់ទិននឹងករណីគ្រោះថ្នាក់ចរាចរណ៍នេះ លោកអធិការបានបញ្ជាក់ថា លោកបានដឹកនាំកម្លាំងជំនាញស្រុក ចុះធ្វើការវាស់វែង និងធ្វើកំណត់ហេតុដកហូតវត្ថុតាងរថយន្តទាំងពីរគ្រឿង មករក្សាទុកនៅអធិការដ្ឋាននគរបាលស្រុកសំរោង ដើម្បីរង់ចាំការដោះស្រាយតាមនីតិវិធីច្បាប់។ ចំណែកសាកសពជនរងគ្រោះ បានធ្វើកំណត់ហេតុប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕
