លោកវរសេនីយ៍ត្រី ឈន ទ្រឿន អធិការរងទទួលផ្នែកសណ្តាប់ធ្នាប់ នៃអធិការដ្ឋាននគរបាលស្រុកបាទី បានឲ្យដឹងថា មុនពេលកើតហេតុមានសាក្សី បានឃើញម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ សេរី២០១០ បើកបរដោយយុវជនម្នាក់បានជិះម៉ូតូចូលចាក់សាំង នៅស្ថានីយប្រេងឥន្ធនៈទន្លេបាទី ស្ថិតក្នុងភូមិ-ឃុំកើតហេតុ ក្រោយពីចាក់សាំងម៉ូតូរួច បានជិះម៉ូតូចេញឡើងមកលើផ្លូវជាតិលេខ២ ដើម្បីចេញដំណើរបន្តទៅទិសខាងជើង ស្របពេលនោះក៏បានបុកគ្នាជាមួយម៉ូតូមួយគ្រឿង ម៉ាកស៊ុយស៊ូគីនិច ពណ៌ស សេរី២០១៤ ពាក់ផ្លាកលេខ ភ្នំពេញ 1FK-3547 មានជិះគ្នា២នាក់ ធ្វើដំណើរមក ពីទិសខាងជើងទៅត្បូង រួចក៏ខ្ទាតអ្នកបើកបរម៉ូតូម៉ាកហុងដាសេ១២៥ ទៅប៉ះជាមួយរថយន្ត ម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ ភ្នំពេញ 1A-5259 ដែលធ្វើដំណើរមកពីទិសខាងត្បូងទៅជើង បណ្តាលឲ្យអ្នកបើកបរម៉ូតូ ម៉ាកហុងដា រងរបួសធ្ងន់ បញ្ជូនទៅព្យាបាលនៅមន្ទីរពេទ្យរាជធានីភ្នំពេញ និងអ្នកបើកបរម៉ូតូម៉ាកស៊ុយស៊ូគីនិច ដាច់ខ្យល់ស្លាប់ ពេលបញ្ជូនទៅដល់មណ្ឌលសុខភាពទន្លេបាទី រីឯអ្នករួមដំណើរជាមួយរងរបួសធ្ងន់ បញ្ជូនទៅព្យាបាលនៅមន្ទីរពេទ្យរុស្សី រាជធានីភ្នំពេញ។
ប្រភពបានបានបន្តថា អ្នកបើកបរម៉ូតូម៉ាកហុងដា សេ១២៥ ពណ៌ខ្មៅ ពាក់ផ្លាកលេខ កំពត 1D-9395 មានឈ្មោះ សុខ សុឃាង ភេទប្រុស អាយុ ១៧ឆ្នាំ ជាសិស្សសាលា រស់នៅភូមិខ្នា ឃុំក្រាំងធ្នង់ ស្រុកបាទី ខេត្តតាកែវ រងរបួសធ្ងន់។ ចំណែកអ្នកបើកបរម៉ូតូម៉ាក ស៊ុយស៊ូគីនិច មានឈ្មោះ ខៀវ សុខា ភេទប្រុស អាយុ ១៧ឆ្នាំ រស់នៅភូមិដំណាក់ពង្រ ឃុំមាន ស្រុកព្រៃឈរ ខេត្តកំពង់ចាម(ស្លាប់) និងអ្នកជិះពីក្រោយមានឈ្មោះ ណាក់ ភេទ ប្រុស អាយុ ១៨ឆ្នាំ ជាកម្មករក្រុមហ៊ុនស៊ុនទ្រី ស្នាក់នៅសង្កាត់ដង្កោ ខណ្ឌដង្កោ រាជធានីភ្នំពេញ រងរបួសធ្ងន់។ រីឯអ្នកបើកបររថយន្តមានឈ្មោះ ផាត់ តោហ៊ា ភេទប្រុស អាយុ ២២ឆ្នាំ មុខរបរបើកបររថយន្ត មានទីលំនៅភូមិព្រែកហូរ សង្កាត់ព្រែកហូរ ក្រុងតាខ្មៅ ខេត្តកណ្តាល គ្មានរបួស។
លោកអធិការរងបានបញ្ជាក់បន្ថែមថា ករណីនេះ ក្រោយពេលកើតហេតុ កម្លាំងជំនាញចរាចរណ៍ស្រុក បានចុះវាស់វែងធ្វើកំណត់ហេតុ ដកហូតវត្ថុតាងទាំងបីគ្រឿង មករក្សាទុកនៅអធិការដ្ឋាននគរបាលស្រុកបាទី ដើម្បីរង់ចាំការដោះស្រាយតាមនីតិវិធីច្បាប់ ចំណែកសាកសពបានប្រគល់ជូន ក្រុមគ្រួសារយកទៅធ្វើបុណ្យតាមប្រពៃណី៕
