ឯកឧត្តម ឃួង ស្រេង អភិបាលរងរាជធានីភ្នំពេញ បានលើកឡើងថា យើងត្រូវការពារសេចក្តីសុខរបស់បងប្អូនប្រជាពលរដ្ឋ ត្រូវចេះគិតគូរពីសុខទុក្ខរបស់ពលរដ្ឋនេះ គឺជាការងារស្នូលរបស់អាជ្ញាធរដែនដីយើង។ អញ្ចឹងការរកស៊ីរបស់បងប្អូនអាជីវកម្មឡានដឹកដីត្រូវចេះគិតគូរផងដែរ ដល់ប្រជាពលរដ្ឋ បើបងប្អូនម្ចាស់អាជីវកម្មឡានដឹកដីធ្វើស្រួលមិនប៉ះពាល់ដល់អ្នកភូមិយើងចេះតែល្អស្រួលជាមួយគ្នា។ តែបងប្អូនម្ចាស់អាជីវកម្មឡានដឹកដីធ្វើឲ្យមានការថ្នាំងថ្នាក់ជាមួយប្រជាពលរដ្ឋ មិនអាចទទួលយកបាន អញ្ចឹងយើងជាអាជ្ញាធរក៏មិនអាចទទួលយកបានដូចគ្នា។ ហេតុដូច្នេះសុំឲ្យអាជ្ញាធរសង្កាត់-ខណ្ឌ ត្រូវពិនិត្យមើលឲ្យបានមែនទែន នេះបញ្ហាជុំវិញរឿងឡានដឹកដី។
ដោយឡែកជុំវិញការកាយប្រឡាយទឹក ឯកឧត្តម ឃួង ស្រេង ក៏បានលើកសសើរផងដែរចំពោះ លោក នុត ពុធដារ៉ា អភិបាល នៃគណៈអភិបាលខណ្ឌដង្កោ ដែលយកចិត្តទុកដាក់ក្នុងសកម្មភាពរបស់លោកលើការកាយប្រឡាយទឹកស្រោចស្រប់ដំណាំស្រូវរបស់ពលរដ្ឋ។ ក្នុងនោះផងដែរ ចំពោះបញ្ហាផ្លូវលេខ២១៧ (ចំការដូង) ដែលក្រុមហ៊ុន ណឹបម៉េងគ្រុប ទទួលម៉ៅការបច្ចុប្បន្ននេះ មានការយឺតយ៉ាវដាក់ប្រព័ន្ធលូធ្វើឲ្យប៉ះពាល់ក្នុងការធ្វើដំណើរកកស្ទះចរាចរណ៍រាល់ថ្ងៃនោះ អភិបាលរងរាជធានីភ្នំពេញ ឯកឧត្តម ឃួង ស្រេង ក៏បានសន្យាថា លោកជួបជាមួយភាគីក្រុមហ៊ុនដើម្បីឲ្យក្រុមហ៊ុនពន្លឿនការស្ថាបនាផ្លូវ២១៧នេះ។
ជាមួយគ្នានេះផងដែរ ឯកឧត្តម ឃួង ស្រេង ក៏បានអំពាវនាវដល់ពលរដ្ឋដែលរស់នៅសងខាងផ្លូវ២១៧នេះ កុំសាងសង់របងផ្ទះរំលោភលើផ្លូវ ព្រោះអនាគតផ្លូវ២១៧នេះ នឹងពង្រីកទទឹងទំហំ ៤០ម៉ែត្រ ហេតុដូច្នេះអាជ្ញាធរខណ្ឌត្រូវទប់បញ្ហានេះ ៕
