បុរសរងគ្រោះ ត្រូវបានគេស្គាល់ឈ្មោះ ហម គឹមហុង ភេទប្រុស អាយុ៣៨ឆ្នាំ មុខរបរបើកបរ ស្នាក់នៅសង្កាត់បឹងព្រលិត ខណ្ឌ៧មករា រងរបួសបាក់ជើង។ ចំណែកអ្នកបើកបររថយន្តដឹកឥដ្ឋមាន ឈ្មោះ សៀក ប៊ុនលី ភេទប្រុស អាយុ៣២ឆ្នាំ មុខរបរបើកបរ ស្នាក់នៅស្រុកមុខកំពូល ខេត្តកណ្តាល។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញមានរថយន្តដឹកឥដ្ឋ ១គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3B-6517 បើកបរក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏មានរថយន្តម៉ាកហ៊ីយ៉ាន់ដាយ ប្រភេទកុងតឺន័រ ពណ៌ខៀវ លាយស ពាក់ស្លាកលេខ កំពង់ធំ 3A-1587 ក្នុងទិសដៅពីជើងទៅត្បូង ស្របគ្នា ក៏ជ្រុលទៅបុកនឹងរថយន្តដឹកឥដ្ឋពីក្រោយ ពេញទំហឹង បណ្តាលឲ្យអ្នកបើកបររងរបួសបាក់ជើង ហើយត្រូវបានគេជួយដឹកយកទៅព្យាបាលនៅមន្ទីពេទ្យភ្លាមៗ ចំណែករថយន្តរងការខូចខាតផ្នែកខាងមុខ ស្ទើរតែទាំងស្រុង។ ដោយឡែកភាគីខាងរថយន្តដឹកឥដ្ឋ មិនមានអ្នករងរបួសទេ។
ក្រោយកើតហេតុ គេឃើញមាននគរបាលចរាចរណ៍ខណ្ឌសែនសុខ ចុះមកធ្វើការវាស់វែង ប៉ុន្តែដោយមានដំណាងខាងរថយន្តបង្ក ចេញមុខមកដោះស្រាយ ដោយព្រមយករថយន្តទៅជួសជុល និងព្យាបាលអ្នករបួសបាក់ជើង ដោយខ្លួនឯង ដោយពុំមានការប្តឹងផ្តល់អ្វីទេ៕
