ឯកឧត្ដម ឧបនាយករដ្ឋមន្ត្រី បានថ្លែងដូច្នេះមកកាន់ក្រុមអ្នកយកព័ត៌មាន ក្រោយជំនួបជាមួយប្រធានបេសកកម្មការទូត និងការិយាល័យតំណាងអង្គការសហប្រជាជាតិ ប្រចាំកម្ពុជា ចំនួន៣១ នាព្រឹកថ្ងៃទី១៩ ខែវិច្ឆិកា ឆ្នាំ២០១៥ ដើម្បីជម្រាបជូនអំពីស្ថានភាពនយោបាយបច្ចុប្បន្ន នៅកម្ពុជា។
ឯកឧត្ដម ហោ ណាំហុង ថ្លែងថា កាលពីថ្ងៃទី១៧ ខែមេសា ឆ្នាំ២០០៨ នៅសារមន្ទីរជើងឯក លោក សម រង្ស៊ី បានធ្វើការបង្កាច់បង្ខូចកេរ្តិ៍ខ្ញុំ ថាជាកម្មាភិបាលខ្មែរក្រហម។ ដើម្បីការពារកិត្តិយស នៅឆ្នាំ២០០៨ ខ្ញុំបានប្រគល់សិទ្ធិទាំងស្រុង ឲ្យមេធាវី ដាក់ពាក្យបណ្ដឹងទៅតុលាការក្រុងភ្នំពេញ ប្ដឹង សម រង្ស៊ី ពីបទបរិហាកេរ្តិ៍។ តុលាការភ្នំពេញបានផ្ដន្ទាទោស សម រង្ស៊ី នៅឆ្នាំ២០១១។ បន្ទាប់មកនៅថ្ងៃទី១២ ខែមីនា ឆ្នាំ២០១៣ សាលាឧទ្ធរណ៍បានផ្ដន្ទាទោស សម រង្ស៊ី ឲ្យជាប់ពន្ធនាគារពីរឆ្នាំ និងពិន័យជាទឹកប្រាក់ចំនួន៨លានរៀល។
សាលក្រមរបស់សាលាឧទ្ធរណ៍ មានសុពលភាព រយៈពេល៥ឆ្នាំ គឺរាប់ចាប់តាំងពីឆ្នាំ២០១៣ រហូតដល់ឆ្នាំ២០១៨។ នៅក្នុងឆ្នាំ២០១៣ តាមសំណើសុំរបស់សម្ដេចតេជោ ព្រះករុណាព្រះមហាក្សត្រ បានចេញព្រះរាជក្រឹត្យ ប្រទានការលើកលែងទោសដល់ សម រង្ស៊ី ពាក់ព័ន្ធនឹងបទល្មើសចំនួនពីរ គឺទី១-ការដកតម្រុយ បង្គោលព្រំដែនលេខ១៨៥ នៅខេត្តស្វាយរៀង ដែលត្រូវបានតុលាការផ្ដន្ទាទោស នៅថ្ងៃទី១ ខែមីនា ឆ្នាំ២០១១ និងបទល្មើស ទី២-គឺការក្លែងក្លាយឯកសារសាធារណៈ និងការផ្សព្វផ្សាយព័ត៌មានមិនពិត ដែលត្រូវបាន តុលាការផ្ដន្ទាទោសនៅថ្ងៃទី២០ ខែកញ្ញា ឆ្នាំ២០១១។
ព្រះរាជក្រឹត្យលើកលែងទោសនេះ មិនគ្របដណ្ដប់លើការផ្ដន្ទាទោសក្នុងការបរិហាកេរ្តិ៍ ឯកឧត្ដមឧបនាយក រដ្ឋមន្ត្រី ហោ ណាំហុង ឡើយ។ ចំពោះការដក សម រង្ស៊ី ពីសមាជិករដ្ឋសភា ឯកឧត្ដម ឧបនាយករដ្ឋមន្ត្រីថ្លែងថា យោងតាមមាត្រា១៤ នៃ «ច្បាប់ស្ដីពីលក្ខន្តិកៈតំណាងរាស្ត្រ» ដែលត្រូវបានអនុវត្តន៍ តាំងពីឆ្នាំ២០០៦ បានចែងថា «សមាជិករដ្ឋសភាណាមួយ ដែលជាជនជាប់ទោស ដោយសាលក្រមចុងក្រោយ នឹងត្រូវបាត់បង់អភ័យឯកសិទ្ធិ និងសមាជិកភាពសភា»។ ជាកំហុសមេធាវីការពារក្ដីរបស់ សម រង្ស៊ី ដោយបញ្ឈប់ការតវ៉ាត្រឹមសាលាឧទ្ធរណ៍ និងមិនបានដាក់ពាក្យបណ្ដឹងបន្ត ទៅតុលាការកំពូល មានន័យថា ទទួលយកការសម្រេចរបស់សាលាឧទ្ធរណ៍។ គ.ជ.ប មិនបានពិនិត្យមើលជាក់ច្បាស់ នូវសាលក្រមសាលាឧទ្ធរណ៍។
តើសាលក្រមសាលាឧទ្ធរណ៍អនុវត្តន៍ បាន ឬមិនបាន។ យោងតាមក្រមព្រហ្មទណ្ឌ នៃព្រះរាជាណាចក្រកម្ពុជា ការមិនចាប់ខ្លួនជនជាប់ទោសលុះត្រាតែ ១-សាលក្រមនោះអស់សុពលភាព, ២-មានការលើកលែងទោស ឬ ៣-ការលុបចោលនូវការផ្ដន្ទាទោសដោយតុលាការថ្នាក់លើ។ ដូច្នេះសាលក្រមសាលាឧទ្ធរណ៍ នៅមានសុពលភាព ៣ឆ្នាំទៀត។ បច្ចុប្បន្នដោយរដ្ឋសភាទើបតែបានដឹងពីសាលក្រមសាលាឧទ្ធរណ៍លើករណីសម រង្ស៊ីនេះ រដ្ឋសភាមានកាតព្វកិច្ចអនុម័តនូវសាលក្រមនេះ ដោយសំឡេងឆ្នោត ៥០បូក១ស្របតាមមាត្រាទី១៤ នៃ«ច្បាប់ស្ដីពីលក្ខន្តិកៈតំណាងរាស្ត្រ»។
រីឯការដកតំណែង ឯកឧត្ដម កឹម សុខា ឯកឧត្ដមឧបនាយករដ្ឋមន្ត្រី ហោ ណាំហុងថ្លែងថា នៅព្រឹកថ្ងៃទី ៣០ ខែតុលា ឆ្នាំ២០១៥ សម័យប្រជុំពេញអង្គរដ្ឋសភា បានបោះឆ្នោតដោយសម្លេង៦៨/៦៨ ដកតំណែងឯកឧត្ដម កឹម សុខា ពីអនុប្រធានទី១ រដ្ឋសភា។ ឯកឧត្ដម កឹម សុខា ត្រូវបានជ្រើសតាំងជាអនុប្រធានទី១ ដោយសម្លេងឆ្នោត៥០បូក១ ដូចនេះ ក៏ត្រូវដកតំណែងនេះ ដោយសម្លេង៥០បូក១ ដូចគ្នាដែរ។
ចំពោះមូលហេតុនៃការដកតំណែងឯកឧត្ដម កឹម សុខា នោះគឺ សម្ដេចតេជោនាយករដ្ឋមន្ត្រី ផ្ដួចផ្ដើមឲ្យមាន «វប្បធម៌សន្ទនា» ដើម្បីឱ្យមានកិច្ចសហប្រតិបត្តិការល្អ និងការបំពេញការងារបានល្អរបស់រដ្ឋសភា ទើបតំណាងរាស្ត្រគណបក្សប្រជាជនកម្ពុជា បានបោះឆ្នោតគាំទ្របេក្ខភាពឯកឧត្ដម កឹម សុខា ជាអនុប្រធានទី១រដ្ឋសភា។ ធ្វើដូចនេះ រាជរដ្ឋាភិបាលសង្ឃឹមថា នឹងមានកិច្ចសហប្រតិបត្តិការល្អនិងប្រកបដោយសន្តិវិធីរបស់ គណបក្សសង្គ្រោះជាតិ ដើម្បីផលប្រយោជន៍របស់ប្រទេសជាតិ។ ក៏ប៉ុន្តែ ឯកឧត្ដម កឹម សុខា ទាំងនៅតាមបណ្ដាខេត្ត និងនៅបរទេស បានបរិហារកេរ្តិ៍ និងធ្វើការញុះញង់ប្រជាជន ឱ្យប្រឆាំងនិងរាជរដ្ឋាភិបាលកម្ពុជា។
ឯកឧត្ដមឧបនាយករដ្ឋមន្ត្រី បានរំលឹកឡើងវិញអំពីករណីហិង្សាដែលបានកើតឡើងកាលពីថ្ងៃទី២៦ ខែតុលា ២០១៥ ទៅលើតំណាងរាស្ត្ររបស់គណបក្សសង្គ្រោះជាតិ២រូបនៅក្បែររដ្ឋសភា ដោយបានគូសបញ្ជាក់ថានៅពេលនោះ សម្ដេចតេជោនាយករដ្ឋមន្ត្រីកំពុងបំពេញទស្សនកិច្ចផ្លូវការនៅប្រទេសបារាំង ហើយសម្ដេចបានបញ្ជាពីទីក្រុងប៉ារីស ឲ្យអាជ្ញាធរមានសមត្ថកិច្ចធ្វើការស៊ីបអង្កេតជាបន្ទាន់ និងចាប់ខ្លួនជនដៃដល់មកផ្ដន្ទាទោសតាមច្បាប់។ សម្ដេចបានអំពាវនាវដល់អ្នកកាសែតនិងអ្នកបង្ហោះរូបភាពតាម Facebook ឲ្យសហការជាមួយអាជ្ញាធរមានសមត្ថកិច្ច ក្នុងការស្វែងរកការចាប់ខ្លួនជនដៃដល់។
ឯកឧត្ដមបានបញ្ជាក់ថា ក្រសួងមហាផ្ទៃ បានកំណត់មុខសញ្ញាជនសង្ស័យ ហើយបន្ទាប់មកមានមនុស្ស៣នាក់បានចូលខ្លួន មកសារភាពចំពោះក្រសួងមហាផ្ទៃ ដោយពួកគេដឹងថា ក្រសួងមហាផ្ទៃបានស្គាល់ពួកគេរួចហើយ។ បច្ចុប្បន្នជនដៃដល់ទាំង៣នាក់នោះ កំពុងជាប់ឃុំនៅពន្ធនាគារ៕ AKP
