អគ្គស្នងការរងនគរបាលជាតិ ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានមានប្រសាសន៍ថា នៅពេលនេះ សមត្ថកិច្ចបានបំពេញនីតិវិធីរួចហើយ ជាមួយតុលាការ ដើម្បីបើកការស៊ើបអង្កេត និងបានចុះពិនិត្យកន្លែងកើតហេតុរួចរាល់ហើយ ។ ជាមួយគ្នានេះ សមត្ថកិច្ចក៏បានទទួលនូវ រូបភាព ក៏ដូចជាឯកសារនានាមួយចំនួនផងដែរ នឹងអាចឈានដល់ការកំណត់ អត្តសញ្ញាណជនសង្ស័យ ។
ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានបន្តថា ដំណើរការសាកសួរសាក្សី ដូចជាអ្នកបើកបរ និងអ្នកនៅជិត និងបានឃើញហេតុការណ៍ផ្ទាល់ ក៏កំពុងតែបន្តនីតិវិធី ។
ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានថ្លែងទៀតថា ទោះជាយ៉ាងណាក៏ដោយ សមត្ថកិច្ច សូមអំពាវនាវថែមទៀត ដល់សាធារណជន ឲ្យចូលរួមជាមួយសមត្ថកិច្ច ដូចជាការផ្តល់រូបភាព និងឯកសារផ្សេងៗ ដែលអាចជួយដល់ការកំណត់អត្តសញ្ញាណជនសង្ស័យ។
ទាក់ទងទៅនឹងការបង្ហោះរូបភាព របស់សាធារណជន នៅក្នុងបណ្តាញសង្គម និងសារព័ត៌មានជាច្រើននោះ ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានបញ្ជាក់ថា ក្នុងរយៈពេលកន្លងមកនេះ គណៈកម្មការស្រាវជ្រាវជនសង្ស័យ ដែលបង្ករបួសស្នាមលើតំណាងរាស្ត្រ ដែលបង្កើតឡើងដោយក្រសួងមហាផ្ទៃ បានពិនិត្យឃើញថា បញ្ហានេះបានធ្វើឲ្យចំណេញដល់ជសង្ស័យរត់គេចខ្លួន ហើយធ្វើឲ្យសមត្ថកិច្ចមានការលំបាក ក្នុងការនីតិវិធី ដើម្បីកំណត់អត្តសញ្ញាណ និងចាប់ខ្លួនជនសង្ស័យទាំងនោះ ដោយសារតែមានការពិបាក ក្នុងការប្រមូលយក រូបភាព និងឯកសារផ្សេងៗ តាមរយៈបណ្តាញសង្គម ក៏ដូចជាសារព័ត៌មានមួយចំនួន ដែលមិនផ្លូវការ ស្របតាមនីតិវិធីច្បាប់ ។ ហេតុដូច្នេះហើយ បានជាសមត្ថកិច្ចសូមអំពាវនាវ ដល់សាធារណជនជាថ្មីទៀត ត្រូវផ្តល់រូបភាព ឬឯកសារផ្សេងៗដោយផ្ទាល់តែម្តង មកកាន់សមត្ថកិច្ច ដែលអាចជួយដល់ក្នុងការស៊ើបអង្កេត នឹងឈានដល់ការកំណត់មុខសញ្ញា និងការចាប់ខ្លួនជនសង្ស័យតែម្តង។
គួរបញ្ជាក់ថា កាលពីថ្ងៃទី២៧ ខែតុលា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង បានសម្រេចបង្កើតគណៈកម្មការស្រាវជ្រាវមួយ ក្នុងកិច្ចប្រឹងប្រែងស្វែងរកចាប់ខ្លួន ជនសង្ស័យដែលបង្ករបួសស្នាម លើអ្នកតំណាងរាស្ត្រ ។
គណៈកម្មការស្រាវជ្រាវដែលបានបង្កើតនោះ គឺដឹកនាំដោយនាយឧត្តមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ ជាប្រធាន និងមាននាយនគរបាលជាន់ខ្ពស់មួយចំនួន ជាសមាជិក ។
ការបង្កើតគណៈកម្មការនេះឡើង គឺបន្ទាប់ពីព្រឹត្តការណ៍កាលពីថ្ងៃទី២៦ ខែតុលា មានជនមួយក្រុមមិនស្គាល់អត្តសញ្ញាណ បានប្រើអំពើហិង្សា លើអ្នកតំណាងរាស្ត្រពីររូប បណ្តាលឲ្យមានរបួស ។
ភ្លាមៗនោះដែរ ពេលរាជរដ្ឋាភិបាលកម្ពុជា បានចេញសេចក្តីថ្លែងការណ៍មួយ ដោយសម្តែងការសោកស្តាយយ៉ាងខ្លាំង ចំពោះអំពើបង្កឡើង ដោយជនមួយក្រុមតូចព្រួតគ្នា វាយតប់ទៅលើអ្នកតំណាងរាស្ត្រ ពីររូប របស់គណបក្សសង្គ្រោះជាតិ និងសូមធ្វើការថ្កោលទោសយ៉ាងម៉ឺងម៉ាត់ ចំពោះអំពើបង្ករបួសស្នាមនេះ។
តាមរយៈសេចក្តីថ្លែងការណ៍ របស់រាជរដ្ឋាភិបាលនេះ គឺបានបញ្ជាឲ្យក្រសួងមហាផ្ទៃ ធ្វើការស៊ើបអង្កេតស្រាវជ្រាវជាបន្ទាន់ ដើម្បីតាមចាប់ជនដៃដល់ មកផ្តន្ទាទោសតាមច្បាប់ និងក៏សូមអំពាវនាវដល់សាធារណជន និងស្ថប័នពាក់ព័ន្ធ ដែលបានដឹង បានឃើញ ឬមានភស្តុតាងពាក់ព័ន្ធ ករណីបង្ករបួសស្នាមខាងលើនេះ សូមផ្តល់ព័ត៌មានដល់អាជ្ញាធរ ដើម្បីជំរុញការស៊ើបអង្កេតស្រាវជ្រាវ រកយុត្តិធម៌ដល់ជនរងគ្រោះឲ្យបានឆាប់ ៕
