មន្ត្រីនគរបាលព្រហ្មទណ្ឌកម្រិតធ្ងន់បានឲ្យដឹងថា ជនសង្ស័យមានឈ្មោះ ប៉ិច ពន ភេទប្រុស អាយុ ២៨ឆ្នាំ មុខរបរមិនពិតប្រាកដ មានទីលំនៅក្នុងភូមិថ្លុកត្របែក ឃុំភ្នំបាត ស្រុកពញាឮ។ ចំណែកឯជនរងគ្រោះឈ្មោះ ប៉ុន ពេជ្រ ភេទប្រុស អាយុ ១៨ឆ្នាំ មានទីលំនៅក្នុងភូមិ-ឃុំកើតហេតុ។ ជនរងគ្រោះត្រូវជនដៃដល់ជាឪពុកមាកាប់ត្រូវចំនួន៣កាំបិតផ្គាក់ បណ្តាលឲ្យស្លាប់បាត់បង់ជីវិតភ្លាមៗនៅនិងកន្លែងកើតហេតុ ។
អធិការនគរបាលស្រុកពញាឮ លោកវរសេនីយ៍ទោ ដួង តេង បានប្រាប់អ្នកយកព័ត៌មានកាសែតនគរបាលជាតិ នៅព្រឹកថ្ងៃទី២ ខែវិច្ឆិកា ឆ្នាំ២០១៥នេះថា នៅមុនពេលកើតហេតុថ្ងៃទី១ ខែវិច្ឆិកា ឆ្នាំ២០១៥ ជនដៃដល់បាននៅអង្គុយហូបបាយលើគ្រែក្រោមផ្ទះរបស់ខ្លួន គ្រានោះជនរងគ្រោះជាក្មួយប្រុសបានដើរស្រែកច្រៀងនៅក្បែរជនដៃដល់ ។ ពេលនោះជនដៃដល់បានស្រែកសួរទៅជនរងគ្រោះថា “ហ្អែងស្រែកច្រៀង និងមានន័យថាម៉េច ហើយហ្អែងចង់ម៉េច ?” ។ ឮដូច្នេះជនរងគ្រោះបានឆ្លើយតបវិញថា “អត់ចង់ម៉េចទេ ពូឯងហូបបាយដឹងតែហូបទៅ ខ្ញុំច្រៀងតែខ្ញុំទេ”។ បន្ទាប់មកជនដៃដល់ក៏បានស្ទុះចូលទៅវាយជនរងគ្រោះ៣ទៅ៤ដៃ បណ្តាលឲ្យដេកដួលសន្លប់ទៅលើដី រួចក៏ឡើងទៅហូបបាយបន្តនៅលើក្រែក្បែរជនរងគ្រោះដេកសន្លប់។
លោកវរសេនីយ៍ទោ ដួង តេង បន្តថា មួយសន្ទុះក្រោយមកជនរងគ្រោះក៏បានក្រោកពីលើដីសួរទៅជនសង្ស័យជាឪពុកមាថា “ខ្ញុំធ្វើអីខុសបានជាពូឯងវាយខ្ញុំ”។ ពេលនោះជនសង្ស័យមិនបាននិយាយអ្វីទេ ពោលគឺបានស្ទុះចូលទៅរកវាយជនរងគ្រោះបន្តទៀត ខណៈនោះជនរងគ្រោះបានរត់ទៅឲ្យជីតាឈ្មោះ ប៉ាត់ ប៉ុន ជួយគ្រាដែលជីតាកំពុងបិតឬស្សីធ្វើឈ្នាងលក់។
លោកអធិការបានបញ្ជាក់ថា ក្រោយមកជនដៃដល់បានឆក់យកកាំបិតផ្គាក់នៅក្បែរនោះកាប់ប្រហារទៅលើជនរងគ្រោះចំនួន៣កាំបិត ត្រូវចំដៃ និងខ្នងរងរបួសយ៉ាងធ្ងន់ធ្ងររហូតស្លាប់បាត់បង់ជីវិតនៅនិងកន្លែងកើតហេតុតែម្តង ៕
