ក្នុងសារាចរដែលចុះហត្ថលេខា ថ្ងៃទី១៧ ខែវិច្ឆិកា ឆ្នាំ២០១៥ ដោយសម្ដេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា នាពេលកន្លងមកនេះ មានប្រជាពលរដ្ឋខ្មែរមួយចំនួន បានជួលដីស្រែចំការ ឬដីលំនៅឋាន របស់ខ្លួននៅតាមតំបន់ព្រំដែន ឲ្យទៅប្រជាពលរដ្ឋនៃប្រទេសជិតខាង ដូចជា វៀតណាម ឡាវ និងថៃ ដើម្បីបង្កបង្កើនផល ឬប្រកបអាជីវកម្មផ្សេងៗ។ល។
ការជួលដីរបស់ប្រជាពលរដ្ឋខ្មែរទាំងនេះ មានករណីខ្លះពុំមានរៀបចំឯកសារគតិយុត្តិ ឬកិច្ចសន្យាជួលឲ្យបានត្រឹមត្រូវតាមផ្លូវច្បាប់ឡើយ ដែលជាហេតុធ្វើឲ្យម្ចាស់ដីជាជនជាតិខ្មែរ បាត់បង់នូវផលប្រយោជន៍ នៅពេលមានវិវាទកើតមានឡើង។
ម្យ៉ាងវិញទៀតនៅតំបន់ព្រំដែន ដែលពុំទាន់បានកំណត់ខណ្ឌសីមា និងបោះបង្គោលព្រំដែនផ្លូវការរួចរាល់ជាស្ថាពរ ការជួលដីនៅតាមខ្សែបន្ទាត់ព្រំដែន របស់ប្រជាពលរដ្ឋខ្មែរ ទៅឲ្យប្រជាពលរដ្ឋនៃ ប្រទេសជិតខាង បានបង្កឱ្យមានភាពស្មុគស្មាញដល់កិច្ចការ របស់គណៈកម្មាធិការចម្រុះកិច្ចការព្រំដែន ក្នុងការអនុវត្តការងាររបស់ខ្លួន។
ដើម្បីរក្សាការពារនូវសិទ្ធិកាន់កាប់ដីធ្លី និងផលប្រយោជន៍ស្របច្បាប់របស់ប្រជាពលរដ្ឋខ្មែរ ក៏ដូចជាការជួយជំរុញនិងលើកកម្ពស់ជីវភាពរស់នៅរបស់ប្រជាពលរដ្ឋនៅតាមតំបន់ព្រំដែន ព្រមទាំងជួយសម្រួលដល់ការងារកំណត់ខណ្ឌសីមា និងបង្គោលព្រំដែនជាមួយប្រទេសជិតខាង សំដៅរក្សាការពាឲ្យបាននូវបូរណភាពទឹកដី និងអធិតេយ្យភាពជាតិ រាជរដ្ឋាភិបាលបានដាក់ចេញនូវវិធានការមួយចំនួន ដែលក្នុងនោះរួមាន៖ ហាមប្រជាពលរដ្ឋខ្មែរមិនឱ្យលក់ ឬជួលដីស្រែដីចំការ ឬដីលំនៅឋាននៅតាមតំបន់ព្រំដែន ឲ្យទៅប្រជាពលរដ្ឋនៃប្រទេសជិតខាង ទោះបីក្នុងរូបភាពណាក៏ដោយ។ ក្នុងករណីដែលមានការជួលដីរួចហើយ តែពុំមានឯកសារគតិយុត្តិ ឬកិច្ចសន្យាត្រឹមត្រូវ អភិបាលខេត្តត្រូវចាត់ចែងណែនាំឲ្យប្រជាពលរដ្ឋខ្មែរ បញ្ឈប់លែងឲ្យមានការជួលដីនោះ ឲ្យទៅប្រជាពលរដ្ឋនៃប្រទេសជិតខាងតទៅទៀត ដោយដាក់ឱសានវាទ ក្នុងរយៈពេលកំណត់មួយជាក់លាក់ ស្របតាមស្ថានភាពជាក់ស្ដែង។
ក្នុងករណីដែលមានការជួលដីរួចហើយ តែមានឯកសារគតិយុត្តិ ឬកិច្ចសន្យាត្រឹមត្រូវ ការជួលដីនោះអាចបន្តរហូតដល់អស់សុពលភាព។ បន្ទាប់ពីបញ្ចប់សុពលភាព ហាមមិនឲ្យជួលដីនោះបន្តទៅឲ្យប្រជាពលរដ្ឋ នៃប្រទេសជិតខាងទៀតឡើយ។ អភិបាលខេត្តត្រូវចាត់ឲ្យមានការពិនិត្យឯកសារ ឬកិច្ចសន្យាដែលប្រជាពលរដ្ឋខ្មែរបានជួលដីនៅតាមតំបន់ព្រំដែន ឲ្យទៅប្រជាពលរដ្ឋនៃប្រទេសជិតខាងនាពេលកន្លងមក ដើម្បីណែនាំឲ្យប្រជាពលរដ្ឋខ្មែរ អនុវត្តន៍តាមស្មារតីចំណុចទី២ និងចំណុចទី៣ខាងលើ។ ក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធត្រូវដាក់ចេញនូវវិធានការ និងយុទ្ធសាស្ត្រសមស្រប ដើម្បីជួយជំរុញការងារបង្កបង្កើនផល និងការដាំដុះដំណាំផ្សេងៗរបស់ប្រជាពលរដ្ឋនៅតាមតំបន់ព្រំដែន ដែលជាការរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ និងជួយទប់ស្កាត់មិនឲ្យប្រជាពលរដ្ឋខ្មែរជួលដី ឲ្យទៅប្រជាពលរដ្ឋនៃប្រទេសជិតខាង។
ទទួលបានសារាចរនេះ គ្រប់ក្រសួង ស្ថាប័នពាក់ព័ន្ធ រដ្ឋបាលខេត្ត ក្រុង ស្រុក ឃុំ សង្កាត់ដែលជាប់ព្រំដែន មន្ទីរ និងអង្គភាពជំនាញជុំវិញខេត្តដែលជាប់ព្រំដែន ត្រូវចាត់ចែងអនុវត្តន៍ឱ្យមានប្រសិទ្ធភាព និងដោយស្មារតីទទួលខុសត្រូវខ្ពស់៕
