រដ្ឋអ៊ីស្លាមបានអះអាងទទួលខុសត្រូវចំពោះការបំផ្ទុះគ្រាប់បែកអត្តឃាតកាលពីថ្ងៃសុក្រ នេះ រួមទាំងការបាញ់សម្លាប់ ដែលជាការបញ្ឆេះឡើងវិញនូវវិបត្តិជនភៀសខ្លួនក្នុងតំបន់អឺរ៉ុប និង អំពាវនាវឲ្យដកចេញនូវការរារាំងចំពោះជនជាតិមូស្លីមស្វែងរកសិទ្ធជ្រកកោនដ៏ច្រើនសន្ធឹកសន្ធាប់ ។
នគរបាលបារាំងបានចាប់ផ្ដើមតាមប្រមាញ់ជាអន្តរជាតិចំពោះបុរសដើមកំណើតក្នុងប្រទេសបែលហ្សិកម្នាក់ ដែលពួកគេជឿជាក់ថា ជាអ្នកជួយរៀបចំការវាយប្រហារនេះជាមួយនឹងបងប្អូនប្រុសរបស់ខ្លួនពីរនាក់ទៀត ។ ប្រភពពីតុលាការបាននិយាយថា បងប្អូនម្នាក់របស់ពួកគេស្លាប់នៅក្នុងការវាយប្រហារនេះ ខណៈពេលបងប្អូនពួកគេម្នាក់ទៀតស្ថិតក្រោមការឃុំខ្លួនក្នុងប្រទេសបែលហ្សិក ។
នគរបាលបាននិយាយថា ជនអត្តឃាតគ្រាប់បែកជនជាតិបារាំងពីរនាក់ទៀតត្រូវបានស្គាល់អត្តសញ្ញាណហើយ ខណៈដែលជនបង្កបួននាក់ទៀតដែលត្រូវបានសម្លាប់ក្នុងការប្រយុទ្ធគ្នានោះ នៅតែស្ថិតក្រោមការត្រួតពិនិត្យនៅឡើយ ។
បារាំងបានទម្លាក់គ្រាប់បែកលើទីតាំងនានារបស់រដ្ឋអ៊ីស្លាមក្នុងប្រទេសអ៊ីរ៉ាក់ និងស៊ីរីអស់រយៈពេលជាច្រើនខែ ដែលជាផ្នែកមួយនៃប្រតិបត្តិការដឹកនាំដោយសហរដ្ឋអាមេរិក ។ បន្ទាប់ពីព្រឹត្តការណ៍បង្កភាពភ័យខ្លាចកាលពីថ្ងៃសុក្រ ទីក្រុងប៉ារីសបានអំពាវនាវឲ្យកម្ទេចក្រុមរដ្ឋអ៊ីស្លាម ដែលបង្កហេតុនេះ ។ កាលពីថ្ងៃអាទិត្យ ដើម្បីគូសបញ្ជាក់ពីការតាំងចិត្តរបស់ខ្លួន យន្តហោះចម្បាំងបារាំង បានធ្វើការវាយប្រហារយ៉ាងខ្លាំងក្លាបំផុតរបស់ពួកគេក្នុងប្រទេសស៊ីរីឲ្យបានទាន់ពេលវេលា ដោយវាយប្រហារទីតាំងដ៏រឹងមាំរបស់រដ្ឋអ៊ីស្លាមក្នុងទីក្រុង Raqqa ។
ក្រសួងការពារជាតិបាននិយាយថា ការវាយប្រហារនេះ រួមទាំងយន្តហោះចម្បាំងចំនួន១០គ្រឿងរបស់អារ៉ាប់រួម និងហ្សកដង់ផងដែរ ដោយគ្រាប់បែកចំនួន២០គ្រាប់ត្រូវបានទម្លាក់ ។ ក្នុងចំណោមគោលដៅទាំងនោះគឺមានឃ្លាំងរំសេវមួយកន្លែង និងកន្លែងហ្វឹកហាត់មួយកន្លែង ។ មិនទាន់មានសេចក្ដីរាយការណ៍ពីអ្នកស្លាប់ និងរងការខូចខាតនៅឡើយទេ ៕
