យោងតាមមាត្រា២១៨ និងមាត្រា៤១១ នៃក្រមព្រហ្មទណ្ឌ ឃើញថា ជនដៃដល់ទាំង៣នាក់ អាចប្រឈមមុខនឹងការជាប់ពន្ធនាគារពី៤ឆ្នាំទៅ១០ឆ្នាំ និងពិន័យជាប្រាក់ពី៨លានរៀល ដល់២០លានរៀល។
យោងតាមសេចក្តីប្រកាសព័ត៌មានពីក្រសួងមហាផ្ទៃ បានឲ្យដឹងថា ជនសារភាពទាំង៣នាក់នោះ ទី១.ឈ្មោះ ចាយ សារិទ្ធ អាយុ៣៣ឆ្នាំ មានទីលំនៅសង្កាត់តាខ្មៅ ក្រុងតាខ្មៅ ខេត្តកណ្តាល, ទី២.ឈ្មោះ ម៉ៅ ហឿន អាយុ៣៤ឆ្នាំ មានទីលំនៅឃុំព្រែកខ្សាយ ស្រុកពាមរក៍ ខេត្តព្រៃវែង និងទី៣.ឈ្មោះ សុត វណ្ណនី អាយុ៤៥ឆ្នាំ មានទីលំនៅសង្កាត់កំពង់សំណាញ់ ក្រុងតាខ្មៅ ខេត្តកណ្តាល។
គួររំឭកថា លោក គង់ សុភា និងលោក ញ៉យ ចំរើន តំណាងរាស្ត្រគណបក្សសង្គ្រោះជាតិ ត្រូវបានជនដៃដល់វាយតប់ ឲ្យរងរបួសធ្ងន់ និងសន្លប់ នៅក្រៅវិមានរដ្ឋសភា កាលពីវេលាថ្ងៃត្រង់ ថ្ងៃទី២៦ ខែតុលា ឆ្នាំ២០១៥ នៅពេលអ្នកទាំងពីរ ជិះរថយន្តបម្រុងនឹងចេញពីរដ្ឋសភា ហើយបច្ចុប្បន្ននេះ តំណាងរាស្ត្រទាំងពីរនាក់នេះ កំពុងសម្រាកព្យាបាលជំងឺ នៅមន្ទីរពេទ្យនាទីក្រុងបាងកក ប្រទេសថៃ។
ពាក់ព័ន្ធករណីនេះ ត្រូវបានប្រភពព័ត៌មានច្បាស់ការណ៍ បង្ហើបឲ្យដឹងថា ជនដៃដល់ទាំង៣នាក់នេះ បានសារភាពប្រហាក់ប្រហែលគ្នាប្រាប់តុលាការ ថា កាលពីព្រឹកថ្ងៃទី២៦ ខែតុលា ឆ្នាំ២០១៥ ពួកគេទាំង៣នាក់ បានអង្គុយផឹកកាហ្វេនៅម្តុំវិមានឯករាជ្យ ស្រាប់តែទទួលបានព័ត៌មានថា មានបាតុកម្មមុខរដ្ឋសភា ទាមទារឲ្យទម្លាក់លោក កឹម សុខា ចេញពីតំណែងអនុប្រធានរដ្ឋសភា។ ពេលនោះពួកគេក៏ធ្វើដំណើរមកខាងមុខរដ្ឋសភា ហើយចូលក្នុងហ្វូងបាតុករ ដើម្បីក្តាប់សភាពការណ៍អំពីរឿងហេតុនេះ។ លុះពេលបាតុកម្មត្រូវបានបញ្ចប់ ហើយបាតុករបានរំសាយជាបណ្តើរៗនោះ ពួកគេពុំទាន់ទៅណាទេ ពោលគឺនៅរង់ចាំចេញក្រោយគេបង្អស់ ព្រោះពួកគេមិនមែនជាក្រុមបាតុករ។ បន្ទាប់មកតំណាងរាស្ត្រគណបក្សសង្គ្រោះចំនួន២រូប បានជិះរថយន្តចេញមក ហើយបើកកញ្ចក់រថយន្តស្រែកជេរថា“ពួកអាយ៉ងយួន” ទើបធ្វើឲ្យពួកគេមានកំហឹងក៏វាយលើតំណាងរាស្ត្រនោះតែម្តង ៕
