លោក សម រង្ស៊ី ត្រូវបានចោទប្រកាន់ពីបទសមគំនិត ក្នុងអំពើក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែង និងបទញុះញង់បង្កឲ្យមានភាពវឹកវរដល់សន្តិសុខសង្គម ប្រព្រឹត្តនៅរាជធានីភ្នំពេញ កាលពីថ្ងៃទី១២ និង ទី១៣ ខែសីហា ឆ្នាំ២០១៥ តាមមាត្រា២៩ មាត្រា៦២៩ មាត្រា៦៣០ និងមាត្រា៤៩៥ នៃក្រុមព្រហ្មទណ្ឌ ។
ក្នុងដីកាបង្គាប់ឲ្យចូលខ្លួន ចុះថ្ងៃទី២០ ខែវិច្ឆិកា ឆ្នាំ២០១៥ នេះ បានសង្កត់ធ្ងន់ថា ក្នុងករណីលោក សម រង្ស៊ី មិនចូលខ្លួនតាមការកំណត់ទេ តុលាការនឹងចេញដីកាបង្គាប់ឲ្យនាំខ្លួន ឬដីកាបង្គាប់ឲ្យចាប់ខ្លួនទៅតាមច្បាប់ ។
សំណុំរឿងនេះគឺមានការទាក់ទង នឹងលោក ហុង សុខហួរ សមាជិកព្រឹទ្ធសភាដែលត្រូវដកអភ័យឯកសិទ្ធិពីបទក្លែងបន្លំឯកសារសាធារណៈ និងបទប្រើប្រាស់ឯកសារសាធារណៈក្លែង ពាក់ព័ន្ធសន្ធិសញ្ញាព្រំដែនកម្ពុជាវៀតណាម ព្រមទាំងបទញុះញង់បង្កឲ្យមានភាពវឹកវរដល់សន្តិសុខសង្គម ពេលនេះបានរាលដាលដល់លោក សម រង្ស៊ី ប្រធានគណបក្សសង្គ្រោះជាតិ ។
គួរបញ្ជាក់ថា កាលពីពេលថ្មីៗនេះ លោក សម រង្ស៊ី ទើបតែត្រូវបានតុលាការចេញដីកា បង្គាប់ឲ្យចាប់ខ្លួន ពាក់ព័ន្ធការបរិហារកេរ្តិ៍ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និង សហប្រតិបត្តិការអន្តរជាតិ។ លោក សម រង្ស៊ី បានចោទប្រកាន់លោកឧបនាយករដ្ឋមន្ត្រី ហោ ណាំហុង ថាជាមេគុកបឹងត្របែក ក្នុងរបបកម្ពុជាប្រជាធិបតេយ្យប៉ុន្តែរឿងក្តីនេះ តុលាការបានសម្រេចឲ្យលោក សម រង្ស៊ី ចាញ់ក្តី និង ផ្ដន្ទាទោសលោក សម រង្ស៊ី ដាក់ពន្ធនាគារ២ឆ្នាំ ៕
