ស្វាយរៀង ៖ ស្នងការនគរបាលខេត្តស្វាយរៀងបានឲ្យដឹងថា ជនសង្ស័យសរសេរ និងបង្ហោះ facebook ក្លែងបន្លំឯកសារសាធារណៈ ដែលត្រូវបានឃាត់ខ្លួន ត្រូវបានបញ្ជូនទៅសាលាដំបូងខេត្តស្វាយរៀង កាលពីរសៀលថ្ងៃទី២០ ខែវិច្ឆិកា ឆ្នាំ២០១៥នេះ។
ឧត្តមសេនីយ៍ កឹង ឃន ស្នងការនគរបាលខេត្តស្វាយរៀង បានមានប្រសាសន៍ថា បន្ទាប់ពីសមត្ថកិច្ចក្រុងបាវិត បានធ្វើការឃាត់ខ្លួន និងសាកសួរជនសង្ស័យ ២ នាក់ ភេទប្រុស ពាក់ព័ន្ធករណីក្លែងឯកសារសាធារណៈ (សំបុត្របញ្ជាក់កំណើត) និងបានបំពុលបរិយាកាសសង្គម ដោយបានបង្ហោះនៅក្នុងបណ្តាញសង្គម facebook ដោយបានសរសេរបន្ថែមថា ក្រុងបាវិត ខេត្តស្វាយរៀង ស្ថិតក្នុងប្រទេសវៀតណាមទៅវិញ គឺនគរបាលបានសាកសួរ និងបំពេញនីតិវិធីចប់សព្វគ្រប់ ហើយរួចបញ្ជូនទៅតុលាការ ។
ជនសង្ស័យទាំងពីរូបនោះមាន ឈ្មោះ សុខ សំអ៊ាន អាយុ៣៨ឆ្នាំ (ជាអ្នកបង្ហោះ facebook) និងឈ្មោះ នង សារិទ្ធ អាយុ៤២ ឆ្នាំ បម្រើការងារជាក្រុមប្រឹក្សាក្រុងបាវិត (ជាអ្នកសរសេរក្លែងឯកសារ)។
ទោះជាយ៉ាងណាក៏ដោយ រហូតមកទល់ល្ងាចថ្ងៃសុក្រទី២០ ខែវិច្ឆិកានេះ គេមិនទាន់ឃើញតុលាការ បានចោទប្រកាន់ជនសង្ស័យទាំងពីរូបនោះ ពីបទល្មើសអ្វីជាផ្លូវការនៅឡើយទេ ៕
