ប្រជាពលរដ្ឋរស់នៅឃុំបាស្រែ ឃុំគោកធ្លក ឃុំពាមតូល ឃុំព្រែផ្គាំ បានសង្ស័យចោទទៅលើលោក ឃឹម ប៊ុនថន ជានាយផ្នែកជលផល (ស្លែង) ស្រុកអង្គរបុរី គ្រប់គ្រងចំនួន៥ស្រុក ដែលជាអ្នកលក់បឹងនៅចំណុចពីមាត់ព្រែកស៊ឹង រហូតដល់ស្ទឹងព្រែកសណ្ដែក ទៅឲ្យជនជាតិវៀតណាមម្នាក់ឈ្មោះ ត្រ ក្នុងតម្លៃជាង៣០០០ដុល្លារ ហើយជនជាតិវៀតណាមឈ្មោះ ត្រ នេះបានដាក់ស្បៃមុងរត់ជារបាំងព្រួលញឹកកំពឹស អង្កាមក៏ចេញមិនរួចដែរ គឺរាប់ពាន់ម៉ែត្រហើយធ្វើជាស៊ងសម្រាប់ចាប់ត្រីដាក់កាត់ស្ទឹង ព្រែកជាច្រើនកន្លែងធំៗ ដែលគេហៅថា «យ៉» ចាប់ត្រី និងឧបករណ៍ល្មើសច្បាប់ជលផលជាច្រើនប្រភេទទៀតមានដូចជា ដាយ ឡូក រ៉ាវ។ល។
ចំណែកប្រជាពលរដ្ឋរស់នៅឃុំបាស្រែវិញ កំពុងខឹងសម្បារនឹងជំនាញជលផល អាជ្ញាធរស្រុក និងមេសហគមន៍បានស្រែ ឈ្មោះ ស៊ុំ ផន ផងដែរ ដោយពួកគាត់ចោទប្រកាន់ថា បានបង្កើតសហគមន៍មួយក្ដាប់តូចហើយនិយមបក្ខពួក មិនមានភាពសុក្រឹត្យហើយសហគមន៍នេះបានប្រព្រឹត្តនូវអំពើពុករលួយ និងបានប្រើឧបករណ៍ល្មើសច្បាប់ខ្នាតធំមានដូចជា យ៉ និងដាយត្រី ប្រមូលផលត្រីបានរាប់សិបតោនក្នុងមួយថ្ងៃៗ ហើយទាំងអស់គឺគេលក់ទៅឲ្យជនជាតិវៀតណាមដឹកជញ្ជូនចូលទៅប្រទេសគេទាំងអស់ ប្រជាពលរដ្ឋខ្មែរយើងគ្មាននរណាម្នាក់អាចទិញត្រីទាំងអស់នោះបានមកធ្វើប្រហុក ឬផ្អកសម្រាប់ទុកទទួលទាននោះឡើយ។ ពួកគាត់បានបន្ដថា សហគមន៍ខ្មោចសេះទាំងនោះឃោរឃៅជាងថៅកែឡូត៍ចាស់ៗទៅទៀត សូម្បីតែពលរដ្ឋក្រីក្រយើងយកមង សន្ទូច ឬបង់សំណាញ់ ក៏ត្រូវបានពួកគេហាមឃាត់ និងដេញចាប់រត់បាតជើងសព្រាតដែរ។
ចំពោះពលរដ្ឋនៅឃុំគោកធ្លក ក៏បានអះអាងដូចគ្នានេះដែរ ពួកសហគមន៍មួយក្ដាប់តូចនោះកំពុងតម្កើងឬកធ្វើបាបរាស្ដ្រស្លូតត្រង់ បន្ទាប់ពីពួកគេបានអំណាចពីជំនាញជលផល និងអាជ្ញាធរដែលបានបង្កើតសហគមន៍នេះឡើងមក គឺដើម្បីឲ្យពួកគាត់រឹតតែជួបការលំបាកខ្លាំងឡើងៗ។ ទន្ទឹមនឹងមានករណីក្ដៅគគុកនេះដែរ ប្រជាពលរដ្ឋបានសំណូមពរយ៉ាងទទូចដល់អាជ្ញាធរមូលដ្ឋានឃុំ ស្រុក ខេត្ត ពិសេសខាងនាយកដ្ឋានរដ្ឋបាលជលផលមេត្តាចុះស្រាវជ្រាវលើករណីនេះផង ថា តើការបង្កើតសហគមន៍នេសាទ និងបទល្មើសនេសាទដែលកាងដោយមន្ដ្រីជលផលឲ្យវៀតណាមធ្វើនេសាទដោយល្មើសច្បាប់ជលផលនោះ តើប៉ះពាល់យ៉ាងណា ? ហើយពលរដ្ឋប៉ុន្មានគ្រួសារដែលកំពុងរងទុក្ខលំបាកនោះ ?៕
