ប្រតិបត្តិការនេះ ធ្វើឡើងនៅក្នុងវិទ្យាល័យអន្លង់វិល ក្នុងភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ចាប់ពីម៉ោង៨:៣០នាទីព្រឹក ថ្ងៃទី៣ ខែវិច្ឆិកា ឆ្នាំ២០១៥ រហូតដល់ម៉ោង១០:៣០នាទីព្រឹកថ្ងៃដដែលទើបបញ្ចប់ ហើយធ្វើឡើងក្រោមកិច្ចសហការរបស់កម្លាំងអធិការដ្ឋាននគរបាលស្រុកសង្កែ ជាមួយកម្លាំងនគរបាលប៉ុស្តិ៍អន្លង់វិល និងកម្លាំងការិយាល័យព្រហ្មទណ្ឌកម្រិតធ្ងន់ខេត្ត ក្រោយពីបានសុំគោលការណ៍ទៅលោកព្រះរាជអាជ្ញា នួន សាន ដើម្បីឃាត់ខ្លួនមុខសញ្ញាគំរាមកំហែងទារប្រាក់ ដោយយោងតាមពាក្យបណ្ដឹងរបស់ឪពុកជនរងគ្រោះ។
យោងទៅលើពាក្យបណ្ដឹងរបស់ឈ្មោះ រស់ ឆៃលី ភេទប្រុស អាយុ៥៣ឆ្នាំ រស់នៅភូមិបញ្ញា ឃុំកំបូលព្រះ ស្រុកសង្កែ ខេត្តបាត់ដំបង ជាអាជីវករលក់សាំង ពាក់ព័ន្ធនឹងករណីគំរាមទារប្រាក់កូនប្រុសរបស់គាត់ ឈ្មោះ លី ឆាយតាក់ អាយុ១៦ឆ្នាំ រៀននៅវិទ្យាល័យអន្លង់វិល ពីសំណាក់សិស្សសាលាដូចគ្នា ដែលមានគ្នាច្រើន ព្រមទាំងគំរាមទារប្រាក់ប្រចាំថ្ងៃប្រចាំខែនោះ បានលើកឡើងថា ក្នុង១ខែៗលោកមានការបាត់បង់ប្រាក់ចាប់ពី៥០០០ដុល្លារ ទៅ ៦០០០ដុល្លារ ដោយមានចម្ងល់នៅព្រឹកថ្ងៃទី២ ខែវិច្ឆិកា ឆ្នាំ២០១៥ លោកបានឆែកហោប៉ៅកូនប្រុសរបស់លោកដើម្បីចង់ដឹងពីការបាត់ប្រាក់ទាំងនោះ ក៏ស្រាប់តែបានប្រទះឃើញនៅទឹកប្រាក់ចំនួន១៥០ដុល្លារ ដែលកូនប្រុសបានលាក់ក្នុងហោប៉ៅមុនពេលចាកចេញពីផ្ទះទៅសាលារៀន។ ពាក់ព័ន្ធនឹងចម្ងល់នេះ លោកក៏បានសួរនាំទៅកូនប្រុស ដោយកូនប្រុសបានសារភាពថា គឺយកទៅប្រគល់ឲ្យសិស្សមួយចំនួននៅក្នុងសាលារៀន ដែលបានគំរាមទារប្រាក់ ដោយសន្យាមិនរាយការណ៍ទៅប៉ាម៉ាក់ ពាក់ព័ន្ធទៅនឹងករណី ដែលខ្លួនទិញខ្សែក និងខ្សែដៃឲ្យនារីម្នាក់ឈ្មោះ គុជ ដានី អាយុ១៦ឆ្នាំ រស់នៅក្នុងមណ្ឌលកុមារកំព្រាក្នុងស្រុកសង្កែដូចគ្នា។
ដោយហេតុតែខ្លួនមានការព្រួយបារម្ភអំពីបញ្ហា ដែលពួកគេនឹងរាយការណ៍មកឪពុកម្តាយ ទើបខ្លួនចាប់ផ្ដើមលួចប្រាក់ ដែលបានពីការលក់សាំងទៅឲ្យពួកគេរាល់ខែចាប់តាំងពីអំឡុង ឆ្នាំ២០១៤មកម្ល៉េះ។
ក្នុងប្រតិបត្តិការនគរបាលស្រុកសង្កែ បានឃាត់ខ្លួនមុខសញ្ញា និងបក្ខពួកបានចំនួន៩នាក់ ទី១.ឈ្មោះ សុខ លីឆាយ ភេទប្រុស អាយុ១៧ឆ្នាំ រស់នៅភូមិបេង ឃុំអន្លង់វិល ស្រុកសង្កែ, ទី២.ឈ្មោះ ហម ស្ថាបនា ភេទប្រុស អាយុ១៨ឆ្នាំ រស់នៅភូមិអន្លង់វិល ឃុំអន្លង់វិល, ទី៣.ឈ្មោះយូរ មករា ភេទប្រុស អាយុ១៦ រស់នៅភូមិ អន្លង់វិល ឃុំអន្លង់, ទី៤.ឈ្មោះ វុន ប៊ុនរ៉ុង ភេទប្រុស អាយុ១៧ឆ្នាំ រស់នៅភូមិបេង ឃុំអន្លង់វិល, ទី៥.ឈ្មោះ រុណ សួស្តី ភេទប្រុស អាយុ១៧ឆ្នាំ រស់នៅភូមិស្វាយកង់ ឃុំអន្លង់វិល, ទី៦.ឈ្មោះ សត់ សុកន ភេទប្រុស អាយុ១៧ឆ្នាំ រស់នៅភូមិបេង ឃុំអន្លង់វិល, ទី៧.ឈ្មោះ ភីន ឆានុត ភេទប្រុស អាយុ១៥ឆ្នាំ រស់នៅភូមិបេង ឃុំអន្លង់វិល, ទី៨.ឈ្មោះ ម៉េន ស៊ីង ភេទប្រុស អាយុ១៧ឆ្នាំ រស់នៅភូមិបេង ឃុំអន្លង់វិល និងទី៩.ឈ្មោះ ហែម ស៊ីណា ភេទប្រុស អាយុ១៧ឆ្នាំ រស់នៅភូមិអន្លង់វិល ឃុំអន្លង់វិល។
បន្ទាប់ពីទទួលបានចម្លើយសារភាពរបស់ពួកគេទាំង៩នាក់នោះរួចមក បច្ចុប្បន្ននគរបាលស្រុកសង្កែ កំពុងរៀបចំសំណុំរឿង ដើម្បីបញ្ជូនពួកគេទៅកាន់សាលាដំបូងខេត្តចាត់ការតាមនីតិវិធីច្បាប់ ៕
