បើតាមប្រភពព័ត៌មានច្បាស់ការ នៅច្រកអន្តរជាតិដូង ឲ្យដឹងថា កាលពីជាងមួយសប្តាហ៍កន្លងទៅនេះ រថយន្តដឹកទំនិញគេចពន្ធចំនួន ៣សណ្តោង ចេញពីច្រកអន្តរជាតិដូង ទំនងឈ្មួញដឹកយកទៅរាជធានីភ្នំពេញ ត្រូវបានគយ ប្រចាំខេត្តពោធិ៍សាត់ស្ទាក់ចាប់បាន ។
ប្រភពព័ត៌មានដដែលឲ្យដឹងទៀតថា ទំនិញដែលគយបង្ក្រាបនៅខេត្តពោធិ៍សាត់នោះ មានប្រភេទប្រហិត ១សណ្តោងរថយន្ត ជារបស់ឈ្មួញឈ្មោះ ហាក់ ម៉ៅ និងទំនិញ២សណ្តោងរថយន្តទៀត ជារបស់ឈ្មួញ ឈ្មោះសុ ធារី ។
សេចក្តីរាយការណ៍ឲ្យដឹងទៀតថា បន្ទាប់ពីមានភាពមិនប្រក្រតី នៃការនាំទំនិញគេចពន្ធចូលមកប្រទេសកម្ពុជា តាមច្រកអន្តរជាតិដូងបែបនេះ លោក ឆាយ បូ ប្រធានការិយាល័យគយ និងរដ្ឋាករប្រចាំច្រកអន្តរជាតិដូង កាលពីថ្ងៃចុងសប្តាហ៍កន្លងទៅថ្មីៗនោះដែរ ក៏ត្រូវបានអគ្គនាយកគយ និងរដ្ឋាករកោះហៅទៅភ្នំពេញ ដើម្បីបំភ្លឺជុំវិញពីបញ្ហានេះផងនោះទៀត ។ ពាក់ព័ន្ធនឹងការចោទប្រកាន់ខាងលើ លោក ឆាយ បូ ប្រធានការិយាល័យគយនិងរដ្ឋាករ ប្រចាំច្រកអន្តរជាតិដូង បានប្រាប់អ្នកយកព័ត៌មាន នៅព្រឹកថ្ងៃទី៣០ ខែតុលា តាមទូរស័ព្ទឲ្យដឹងថា បញ្ហាគយចាប់បានទំនិញ នៅខេត្តពោធិ៍សាត់ ៣សណ្តោងរថយន្តនោះ លោកមិនដឹងនោះទេ ។
សូមបញ្ជាក់ថា នៅច្រកអន្តរជាតិដូង ស្រុកកំរៀង បច្ចុប្បន្នគេសង្កេតឃើញមានរថយន្តតូចធំ បានដឹកទំនិញចេញពីប្រទេសថៃ ចូលមកប្រទេសកម្ពុជាយ៉ាងគគ្រឹកគគ្រេង ហើយការដឹកជញ្ជូនរបស់ក្រុមឈ្មួញ គេសង្កេតឃើញនៅពេលព្រឹក និងរសៀលមិនសូវមាននោះទេ ។ ឈ្មួញធ្វើធ្វើឡើង ចាប់ពីល្ងាចរហូតដល់ពេលយប់ លុះដល់បិទទ្វារច្រកទើបបញ្ឆប់សកម្មភាព ។ ទំហំនៃការនាំទំនិញតាមច្រកអន្តរជាតិដូង បើតាមគេប៉ាន់ប្រមាណថា ប្រសិនមានការគ្រប់គ្រង និងមានការបង់ពន្ធឲ្យបានត្រឹមត្រូវប្រាក់ចំណូលពន្ធ និងកើនឡើងជាទ្វេរដង ៕
