លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានបញ្ជាក់អំពីតួលេខ កាលពីម្សិលមិញ បន្ទាប់ពីតួលេខនេះ ត្រូវបានបង្ហាញជាលើកដំបូង ដោយប្រព័ន្ធផ្សព្វផ្សាយក្នុងស្រុកក្រោយពីកិច្ចប្រជុំមួយកាលពីសប្តាហ៍មុន រវាងអភិបាលរាជធានីភ្នំពេញ និងក្រុមហ៊ុនដឹកជញ្ជូនឯកជន។
អ្នកនាំពាក្យរូបនេះ បានពិចារណាពីការខាតបង់ដោយសារសំបុត្រជិះរថយន្តក្រុង មានតម្លៃទាប ដែលបច្ចុប្បន្នមានតម្លៃ ១.៥០០រៀល និងការមិនគិតថ្លៃសម្រាប់សិស្ស ជនពិការ មនុស្សចាស់ និងព្រះសង្ឃ។
លោកលើកឡើងថា ប៉ុន្តែទោះបីជាប្រាក់ចំណូលខាតបង់ខ្លាំង ក៏ដោយ ក៏រដ្ឋាភិបាលនឹងមិនបញ្ឈប់ប្រតិបត្តិការនេះទេ ប៉ុន្តែនឹងធ្វើការកែលម្អសេវានេះ ឲ្យកាន់តែប្រសើរ។
លោកបន្តថា យើងនឹងមិនគិតអំពីការខាតបង់ ឬការរកប្រាក់ចំណេញនោះទេ ប៉ុន្តែនេះនឹងផ្ដល់សេវាដឹកជញ្ជូនសាធារណៈ ដល់ប្រជាពលរដ្ឋ។
លោកលើកឡើងថា យើងនឹងព្យាយាមកែលម្អសេវានេះ តាមរយៈការធ្វើឲ្យបានកាន់តែប្រសើរជាងពេលនេះ។ សាលារាជធានីភ្នំពេញ កំពុងស្វែងរកការទិញរថយន្តក្រុងបន្ថែមទៀត នៅក្នុងពេលអនាគតដ៏ខ្លីខាងមុខនេះ។
បច្ចុប្បន្នអ្នកធ្វើដំណើរដោយរថយន្តក្រុង មានចន្លោះពី ៦.០០០នាក់ទៅ ៧.០០០នាក់ ជារៀងរាល់ថ្ងៃ ដែលមានរថយន្តក្រុងចំនួន ៥០គ្រឿងរត់នៅលើផ្លូវចំនួនបីខ្សែ។ នេះបើយោងតាមលោកឡុង ឌីម៉ង់។
លោកបញ្ជាក់ថា ចិន និងជប៉ុន សន្យាថា នឹងផ្ដល់ជំនួយក្នុងការកែលម្អសេវាកម្មរថយន្តក្រុង ប៉ុន្តែលោកមិនបានបង្ហាញព័ត៌មានលម្អិតថា នឹងធ្វើឡើងដូចម្ដេច និងនៅពេលណានោះទេ។
សាលារាជធានីភ្នំពេញបានសាកល្បងរថយន្តក្រុងលើកដំបូង កាលពីឆ្នាំ២០០១ ប៉ុន្តែកង្វះមូលនិធិ សេវានេះត្រូវបានបញ្ឈប់មួយខែក្រោយមក។
សាលារាជធានីភ្នំពេញ ដោយមានការគាំទ្រពីសមាគមសហប្រតិបត្តិការអន្តរជាតិ របស់ប្រទេសជប៉ុន(JICA) បានដំណើរការសេវានេះឡើងវិញ កាលពីដើមឆ្នាំ២០១៤។ អាជ្ញាធរក្រោយមកបានប្រគល់ប្រតិបត្តិការសេវានេះ ទៅឲ្យក្រុមហ៊ុន Global (Cambodia) Trade Development ដែលគ្រប់គ្រងដោយវិនិយោគិនជនជាតិចិន ប៉ុន្តែសេវានេះដំណើរការបានតែពីរបីខែប៉ុណ្ណោះ បន្ទាប់ពីសាលារាជធានីទទួលយកពីក្រុមហ៊ុន Global (Cambodia) Trade Development មកគ្រប់គ្រងវិញ។
លោក Lim Andre អគ្គនាយកក្រុមហ៊ុន Global (Cambodia) Trade Development បានថ្លែងថា ការខាតបង់ប្រចាំខែ គឺភាគច្រើនដោយសារតែប្រជាជនក្នុងស្រុក មិនបានជំរុញឲ្យជិះរថយន្តក្រុង ដោយសារតែខ្សែរថយន្តក្រុង នៅមានកម្រិត និងរយៈពេលរង់ចាំយូរ នៅចំណតរថយន្តក្រុង។
លោកបន្ថែមថា ប្រសិនបើខ្ញុំ ជាអ្នកដំណើរការសេវានេះ ខ្ញុំនឹងមិនធ្វើឲ្យមានការខាតបង់ប្រាក់ច្រើននោះទេ។ ខ្ញុំនឹងត្រូវតែព្យាយាមក្នុងការបង្កើតខ្សែរថយន្តក្រុងបន្ថែម និងកាត់បន្ថយពេលវេលារង់ចាំ។
លោកបញ្ជាក់ថា វាមានការពិបាក ក្នុងការកំណត់ថា ការខាតបង់នេះមានចំនួនប៉ុន្មាន ចំពោះការជិះដោយមិនគិតថ្លៃណាស់ ប៉ុន្តែលោកថ្លែងថា ក្នុងបណ្ដាប្រទេសផ្សេងទៀត គេផ្ដល់ការបញ្ចុះតម្លៃដល់ប្រជាជនមួយចំនួន។
លោក អៀ ចរិយ៉ា អ្នកឯកទេសសុវត្ថិភាពផ្លូវថ្នល់ឯករាជ្យ បានឯកភាពថាកង្វះមធ្យោបាយងាយស្រួល និងខ្សែរថយន្តមានកម្រិតគឺជាបញ្ហាដែលរដ្ឋាភិបាលចាំបាច់ត្រូវតែកែលម្អ ជាពិសេសនៅតាមផ្លូវថ្មើរជើងដែលប្រជាជនប្រើប្រាស់ដើរទៅរកចំណតរថយន្តក្រុង។
លោកថ្លែងថា ប្រជាជនយល់ថា វាពិបាកក្នុងការដើរទៅរកចំណតរថយន្តក្រុង ដោយសារយើងគ្មានចិញ្ចើមថ្នល់។ ខ្ញុំគិតថា រថយន្តសាធារណៈ ជាដំណោះស្រាយតែមួយគត់ សម្រាប់ជួយកាត់បន្ថយការកកស្ទះចរាចរណ៍ ក្នុងទីក្រុងភ្នំពេញ៕
