ឧបទ្ទវហេតុគ្រោះថ្នាក់ចរាចរណ៍ខាងលើ បើតាមសេចក្តីរាយការណ៍ពីនគរបាលចរាចរ ស្រុកថ្មគោលប្រាប់ឲ្យដឹងថា ជនរងគ្រោះដែលបាត់បង់ជីវិតចំនួន២នាក់ មានឈ្មោះ ១,ហ៊ុន ម៉ាណេ ភេទស្រី អាយុ២៥ឆ្នាំ រស់នៅខេត្តព្រៃវែង ២,ហួយ ផេង ភេទប្រុស អាយុ៥៧ឆ្នាំ រស់នៅក្រុងប៉ោយប៉ែត ខេត្តបន្ទាយមានជ័យ ចំណែកអ្នករងបួសធ្ងន់ស្រាលមានចំនួន ៥នាក់ ។
បើតាមប្រភពព័ត៌មានដដែលប្រាប់ឲ្យដឹងទៀតថា មុនពេលកើតហេតុគេឃើញរថយន្ត ម៉ាកហ៊ីយ៉ាន់ដាយធុនធំដឹកខ្សាច់ ពណ៌ខៀវ ពាក់ស្លាកលេខកំពង់ធំ ៣A ១១៤២ បានឈប់ចតស្ងៀមនៅលើចិញ្ចើមថ្នល់ដើម្បីចាក់ទឹកម៉ាស៊ីន ។ លុះបន្ទាប់មកគេមិនដឹងរថយន្ត ដឹកអ្នកដំណើររបស់ក្រុមហ៊ុនមេគង្គអ៊ិចហ្វ្រេសមានបញ្ហាអ្វីនោះទេ បានបើកយ៉ាងលឿនហើយ ជ្រុលទៅបុករថយន្តដឹកខ្សាច់ពីក្រោយពេញទំហឹង បណ្តាលឲ្យអ្នកជិះក្នុងរថយន្តក្រុមហ៊ុន មេគង្គអ៊ិចហ្វ្រេសស្លាប់២នាក់ដោយសាកសពគាបជាប់ក្នុងរថយន្តចំណែកអ្នករងរបួសធ្ងន់ស្រាល៥នាក់បន្ទាប់មកត្រូវបានសមត្ថកិច្ចដឹកតាមរថយន្តសង្គ្រោះបញ្ជូនយកទៅសង្គ្រោះជីវិតនៅមន្ទីរពេទ្យ ។ សាកសពជនរងគ្រោះ២នាក់នោះក៏ត្រូវបានសមត្ថកិច្ចគាស់យកសព ហើយ ដឹកយកទៅកាន់មន្ទីរពេទ្យដើម្បីទំនាក់ទំនងក្រុមគ្រួសារមកទទួលយកទៅចាត់ចែងធ្វើបុណ្យតាមប្រពៃណី ។ ចំពោះអ្នកបើករថយន្តទាំងក្រុមហ៊ុនមេគង្គអ៊ិចហ្វ្រេស និងរថយន្តហ៊ីយ៉ានដាយដឹកខ្សាច់ទាំង២នាក់ក៏នាំគ្នារត់គេចខ្លួនរៀងៗខ្លួន ក៏ប៉ុន្តែសេចក្តីរាយការណ៍ឲ្យដឹងទៀតថា អ្នកបើករថយន្តមេគង្គអ៊ិចហ្វ្រេសរត់គេចខ្លួនទាំងទទួលរងរបួស ។
ជុំវិញបញ្ហាគ្រោះថ្នាក់ចរាចរណ៍ខាងលើនគរបាលចរាចរស្រុកថ្មគោលបានធ្វើសន្និ ដ្ឋានជាបឋមថា អាចបង្កឡើងដោយអ្នកបើករថយន្តដឹកអ្នកដំណើររបស់ក្រុមហ៊ុនមេគង្គអ៊ិចហ្វ្រេស បើកបរខ្វះការប្រុងប្រយ័ត្ន ដោយគេសង្ស័យអ្នកបើករបបើករថយន្តងងុយដេក ។ រថយន្តទាំង២គ្រឿងក្រោយពីសមត្ថកិច្ចវាស់វែងតាមជំនាញរួចរាល់ ក៏បានស្ទុចយកមករក្សាទុក នៅអធិការដ្ឋាននគរបាលស្រុកថ្មគោល ទុកចាត់ការតាមផ្លូវច្បាប់ ៕
