ប្រភពពីប្រជាពលរដ្ឋ ដែលរស់នៅក្បែរហាងលក់ម៉ូតូទាំងអស់នោះ បាននិយាយថា កាលពីអំឡុងដើមឆ្នាំ២០១៣ គេធ្លាប់ឃើញ នគរបាលសេដ្ឋកិច្ច ចុះបង្ក្រាបទីតាំងលក់ម៉ូតូអត់ពន្ធទាំងនេះម្ដងដែរ ប៉ុន្តែបន្ទាប់ពីការបង្ក្រាបនោះ រហូតមកដល់ពេលបច្ចុប្បន្ន គេបានឃើញ ហាងលក់ម៉ូតូទាំងនោះដាក់តាំងលក់ម៉ូតូអត់ពន្ធច្រើនជាងមុនទៅទៀត ហើយមិនមានការបង្ក្រាបឡើយ ។ សេចក្ដីរាយការណ៍ បាននិយាយទៀតថា មូលហេតុ ដែលមិនមានមន្ត្រីជំនាញចុះបង្ក្រាប់ទីតាំងលក់ម៉ូតូអត់ពន្ធទាំងនោះ ត្រូវគេសង្ស័យថា មន្ត្រីជំនាញដែលមានតួនាទីបង្ក្រាបបទល្មើសទាំងនេះ អាចមានជាប់ពាក់ព័ន្ធលើរឿងអ្វីមួយ ជាមួយនឹងឈ្មួញលក់ម៉ូតូអត់ពន្ធទាំងអស់នោះហើយ ទើបមិនបង្ក្រាប ។
បើយោងតាមប្រភពពីម្ចាស់ហាងលក់ម៉ូតូមួយរូប ក្នុងក្រុងសែនមនោរម្យ បានប្រាប់អ្នកសារព័ត៌មានដោយត្រង់ថា ម៉ូតូដែលដាក់លក់សព្វថ្ងៃនេះ គឺលាយឡំគ្នា មានទាំងម៉ូតូអត់ពន្ធ និងមានពន្ធ ។ ហើយចំពោះម៉ូតូអត់ពន្ធវិញ គាត់បានទិញយកមកលក់បន្ត ពីឈ្មួញ ដោយម៉ូតូអត់ពន្ធទាំងនេះ គឺពួកឈ្មួញបាននាំចូល តាមច្រកទ្វេភាគី និងច្រករបៀងមួយចំនួន តាមបន្ទាត់ព្រំដែនក្នុងខេត្តមណ្ឌលគិរី និងស្រុកស្នួល ខេត្តក្រចេះ ។
ជុំវិញករណីនេះ លោក សំ សុវណ្ណរិទ្ធ ប្រធានសាខាគយ និងរដ្ឋាករខេត្តមណលគិរីបានឲ្យដឹងថា លោកទទួលស្គាល់ថាពិត ជាមានម៉ូតូអត់ពន្ធដាក់លក់នៅក្នុងក្រុងសែនមនោរម្យ តែលោកមិនទាន់អាចចុះបង្ក្រាបបានទេ ព្រោះតាមការណែនាំរបស់ថ្នាក់លើ តម្រូវឲ្យម្ចាស់ហាងដែលលក់ម៉ូតូអត់ពន្ធទាំងនោះ ស្ម័គ្រចិត្តយកម៉ូតូដែលអត់ពន្ធ ចូលមកបង់ពន្ធដោយខ្លួនឯង តែបើម្ចាស់ម៉ូតូអត់ពន្ធ ទាំងនោះ នៅតែមិនធ្វើតាមការណែនាំ ទើបឈានដល់ការបង្ក្រាប ។
លោកប្រធានសាខាគយ និងរដ្ឋាករខេត្តមណលគិរីបានឲ្យដឹងទៀតថា ចំពោះការនាំម៉ូតូអត់ចូលតាមច្រករបៀងនានា ក្នុងខេត្តមណ្ឌលគិរីនោះ គឺលោកមិនបានដឹងច្បាស់ទេ ព្រោះច្រករបៀង គឺនៅក្រៅដែនសមត្ថកិច្ចរបស់លោក ប៉ុន្តែនៅតាមច្រកទ្វារទ្វេភាគី ដែលមានមន្ត្រីលោកប្រចាំការមិនមានការនាំម៉ូតូគេចពន្ធចូលទេ ៕
