ទាក់ទងនិងបញ្ហាខាងលើ លោក ឯក ឃុនឌឿន អភិបាលខណ្ឌទួលគោក បានឆ្លើយតបខ្លីថា នឹងចាត់កម្លាំងចុះធ្វើវិធានការ ក្រោយទទួលបានព័ត៌មានពីភ្នាក់ងារ តែរហូតមកដល់ពេលនេះ នៅតែបន្តការបើកទ្វារធ្វើអាជីវកម្ម គ្មានខ្លាចរអាចំពោះសមត្ថកិច្ច។
ល្បែងស៊ីសងខាងលើ ត្រូវបានប្រជាពលរដ្ឋរាយការណ៍ថា បើកលេងយ៉ាងអនាធិបតេយ្យ ២៤ម៉ោង លើ២៤ម៉ោង ជាក់ស្តែងនៅតាមផ្លូវ២២៥ ផ្លូវ២៥៥ ក្បែរស្ពានអាកាសស្ទឹងមានជ័យ ស្ថិតក្នុងសង្កាត់បឹងសាឡាង និងផ្លូវ១៩២ ផ្លូវ២៦៥ សង្កាត់ទឹកល្អក់ ក្នុងខណ្ឌទួលគោក ដែលក្នុងនោះ ប្រជាពលរដ្ឋបន្តឲ្យដឹងថា មានបង្កប់ការជួញដូរគ្រឿងញៀន ដល់អ្នកដែលទៅលេងល្បែងក្នុងទីតាំងមួយចំនួនផងដែរ ទីតាំងខ្លះជ្រកក្រោមផ្លាកហាង កាហ្វេ ឯទីតាំងខ្លះមានការបិទទ្វារកញ្ចក់ខ្មៅ ដែលមិនអាចមើលឃើញ។
ប្រជាពលរដ្ឋសំណូមពរឲ្យ លោកអភិបាលខណ្ឌទួលគោក ជួយត្រួតពិនិត្យមើលតាមទីតាំងខាងលើនេះផង ព្រោះពួកគាត់បារម្ភពីកូនចៅ ដែលតែងគេចសាលាលួចលុយកាក់ និងរបស់ទ្រព្យក្នុងផ្ទះយកទៅលក់លេងល្បែងបាញ់ត្រី ម្យ៉ាងពួកគាត់ក៏ព្រួយបារម្ភពីភាពអសន្តិសុខ ក្នុងសង្គម ដែលកើតឡើងដោយសារចោរលួច ឆក់ ប្លន់ ដែលកើតចេញពីល្បែងស៊ីសងបាញ់ត្រីនេះផងដែរ ៕
