ចម្លាក់ព្រហ្មបាយ័ន យកលំនាំដើមពីប្រាសាទបាយ័ន ក្នុងខេត្តសៀមរាប ដោយធ្វើអំពីថ្មភ្នំ យកពីខេត្តព្រះវិហារ កាត់ឆ្លាក់ដាប់ជាដុំៗ បន្តុបលើគ្នាមានកម្ពស់ ៩,១៨ម៉ែត្រ ទទឹង ៦,៣០ម៉ែត្រ។ រូបចម្លាក់ព្រហ្មបាយ័ន តំណាងឲ្យព្រះភ័ក្ត្ររបស់ព្រះលោកេស្វរៈ ជាព្រះពោធិសត្វ នៃពុទ្ធសាសនាមហាយាន ដែលមានមហាករុណា ចំពោះមនុស្សលោកគ្រប់ទិសទាំង៤ ដែលខ្មែរនិយមហៅថា ព្រហ្មបាយ័ន ឬ ព្រហ្មមុខ៤។
សូមជម្រាបថា ព្រហ្មបាយ័នមានព្រះភ័ក្ត្រញញឹម បែរទៅរកកូនចៅខ្មែរគ្រប់ទិសទី ប្រកបដោយព្រហ្មវិហារធម៌៤ គឺ មេត្តា ករុណា មុទិតា និងឧបេក្ខា។ ព្រហ្មវិហារធម៌ទាំង៤នេះ គឺជាមូលដ្ឋានសំខាន់ សម្រាប់ស្ថាបនានូវ សុខសន្តិភាព និងវប្បធម៌អហិង្សា ក្នុងសង្គមខ្មែរ៕
