សៀមរាប ៖ គណៈកម្មការជំរឿន និងគ្រប់គ្រងជនបរទេសអន្តោប្រវេសន៍ របស់ក្រសួងមហាផ្ទៃ និងក្រុមការងារចម្រុះដឹកនាំដោយ លោកវរសេនីយ៍ឯក ចៅ ម៉ៅវីរៈ ស្នងការរងទទួលការងារអន្តោប្រវេសន៍ និងលោកវរសេនីយ៍ទោ ជា គឹមសាន នាយការិយាល័យនគរបាលអន្តោប្រវេសន៍ នៃស្នងការដ្ឋានគនរបាលខេត្តសៀមរាប បានសហការជាមួយកម្លាំងនគរបាលមូលដ្ឋានជាច្រើនរូបទៀត កាលពីនៅថ្ងៃទី២៩ ខែតុលា ឆ្នាំ២០១៥ បានចុះត្រួតពិនិត្យជនបរទេសអន្តោប្រវេសន៍ ដែលកំពុងស្នាក់នៅក្នុងភូមិតាច្រនៀង ឃុំកំពង់ឃ្លាំង ស្រុកសូទ្រនិគមន៍ ខេត្តសៀមរាប រកឃើញជនជាតិវៀតណាមចំនួន ១០នាក់ ស្រី៤នាក់ អនីតិជន ៤នាក់ផងដែរ ដែលបានលួចឆ្លងដែនខុសច្បាប់ និងស្នាក់នៅពុំមានឯកសារត្រឹមត្រូវ។
លោកវរសេនីយ៍ឯក ចៅ ម៉ៅវីរៈ បានបញ្ជាក់ថា ជនជាតិវៀតណាមទាំង១០នាក់ខាងលើនេះ ត្រូវបានកម្លាំងនគរបាលនាំមកកាន់ការិយាល័យជំនាញ ដើម្បីធ្វើការសាកសួរ និងកសាងសំណុំរឿង បញ្ជូនទៅអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដើម្បីចាប់បញ្ជូនទៅកាន់ប្រទេសវៀតណាមវិញ ៕
