មេដឹកនាំ​ចិន និង​ជប៉ុន បាន​ជួប​ពិភាក្សា​គ្នា ជា​សញ្ញាណ​មួយ​លុបបំបាត់​ភាព​តានតឹង​

ឥណ្ឌូនេស៊ី​: នៅ​ថ្ងៃ​ពុធ​ទី​២២ ខែ​មេសា មេដឹកនាំ​ចិន និង​ជប៉ុន​បាន​ប្រារព្ធ​កិច្ច​ពិភាក្សា​គ្នា ដែល​ទើបតែ​ជា​លើក​ទី​ពីរ​ប៉ុណ្ណោះ​តាំងពី​ឡើងកាន់ដំណែង ដើម្បី​ស្វែងរក​ការផ្សះផ្សា​ចំណងមិត្តភាព​ដែល​ត្រូវបាន​បែកបាក់​ដោយសារ​ជម្លោះ​ដែន​អធិបតេយ្យភាព និង​ប្រវត្តិ​សង្គ្រាម​ដ៏​ជូរ​ចត់ ។
​មន្ត្រី​ជប៉ុន​ម្នាក់​បាន​ប្រាប់ AFP ដោយ​មិន​បញ្ចេញ​ឈ្មោះថា ប្រធានាធិបតី​ចិន​លោក Xi Jinping និង​នាយករដ្ឋមន្ត្រី​ជប៉ុន​លោក Shinzo Abe បាន​ជួប​ពិភាក្សា​គ្នា​ក្រៅ​កិច្ចប្រជុំ​កំពូល​ក្នុងប្រទេស​ឥណ្ឌូនេស៊ី​ប្រហែល​៣០​នាទី ។ ដោយ​ការ​ចាប់ដៃគ្នា​មុន​ពេល​កិច្ចពិភាក្សា​ចាប់ផ្ដើម មេដឹកនាំ​ទាំង​ពីរ មើល​ទៅ​មាន​ភាព​ស្រស់ស្រាយ​ជាង​ពេល​កិច្ចប្រជុំ​កាលពី​ខែវិច្ឆិកា​ឆ្នាំ​មុន​នៅ​ប្រទេស​ចិន ដោយ​ការ​ចាប់ដៃ​ដែល​គ្មាន​ភាព​រាក់ទាក់​នឹង​គ្នា ៕