ចិន៖ ប្រមូលផ្តុំគ្នារាប់រយ
នាក់ ហ្វូងទស្សនិកជនបាននាំគ្នាចោមរោមមើលជុំវិញ ខណៈដែលឆ្កែពីរក្បាលត្រូវបានបង្ខំឲ្យប្រយុទ្ធគ្នារហូតទាល់តែងាប់
នៅក្នុងទ្រុងដ៏យង់ខ្នង។
ទិដ្ឋភាពគួរឲ្យ
តក់ស្លត់ពីចិនភាគខាងជើងទាំងនេះបាននាំឲ្យមានកំហឹងកើតចេញពី ក្រុមសកម្មជនការពារសិទ្ធិសត្វក្នុងប្រទេសនេះ
ដែលបានអំពាវនាវឲ្យមានការកែប្រែច្បាប់ ដើម្បីការពារឆ្កែទាំងនេះ។ នេះបើយោងតាមវេបសាយដេលីមែលកាលពីថ្ងៃទី
៣ ខែមីនា។
ប៉ុន្តែអ្នកភូមិក្នុងស្រុកដែលរៀបចំព្រឹត្តិការណ៍នេះបានការពារល្បែង
ឆ្កែប្រយុទ្ធគ្នានេះថាជា "ការកម្សាន្ត" ដ៏ចាំបាច់មួយនៅផ្នែកដ៏ដាច់ស្រយាលមួយនៃប្រទេសចិន។
ល្បែងឆ្កែប្រយុទ្ធគ្នា
ដែលមានរយៈពេលរាប់ថ្ងៃ ត្រូវបានរៀបចំឡើងដោយអ្នកភូមិ ៦
នាក់នៅក្នុងភូមិសានជាវ នៅទីក្រុងជីសាន ភាគខាងជើងខេត្តសានស៊ីរបស់ចិន ដើម្បីជាការបិទឆាកចុងក្រោយនៃការអបអរបុណ្យចូលឆ្នាំចិន។
ការប្រកួតនេះបើកទូលាយចំពោះមនុស្សគ្រប់គ្នាដែលបានយកឆ្កែមកជាមួយ
ហើយជ័យលាភីនៃការប្រកួតនីមួយៗនឹងទទួលបានបារីមួយកញ្ចប់ និងពែងចិនមួយ។
អ្នករៀបចំម្នាក់
ឈ្មោះ ស៊ី ផាន អាយុ៤៥ឆ្នាំ បានលើកឡើងថា ដោយសារភូមិនេះស្ថិតក្នុងតំបន់ដាច់ស្រយាលក្រីក្រ
ដូច្នេះអ្នកស្រុកមានតែសម្រេចចិត្តបង្កើតការកម្សាន្តដោយខ្លួនឯង។
លោកបាននិយាយថា "មនុស្សក្នុងទីក្រុងនេះ បានរិះគន់ល្បែងឆ្កែប្រយុទ្ធគ្នារបស់យើង
ប៉ុន្តែពួកគេមានលុយសម្រាប់ការកម្សាន្តគ្រប់ប្រភេទ ដែលយើងពុំមានដូច។ ដូច្នេះយើងត្រូវតែរៀបចំអ្វីមួយដើម្បីផ្តល់ការកម្សាន្តដល់ខ្លួនយើង
"។
ខណៈត្រូវបានហាមឃាត់ក្នុងប្រទេស
មួយចំនួន ល្បែងឆ្កែប្រយុទ្ធគ្នាគឺជាការទាក់ទាញទូទៅមួយនៅចិនភាគខាងជើង ដែលរៀបចំពិធីបុណ្យផ្សេងៗជាង
១០០រៀងរាល់ឆ្នាំ ដោយបានទាក់ទាញអ្នកទស្សនាមកពីបណ្តាខេត្តជុំវិញ និងភ្ញៀវទេសចរផងដែរ។
ប៉ូលិសបាននិយាយថា
ព្រឹត្តិការណ៍នេះពុំបានល្មើសទៅនឹងច្បាប់អ្វីនោះទេ ដូចនេះហើយគ្មានបណ្តឹងផ្លូវការណាមួយដាក់ប្តឹងនោះទេ។
ប៉ូលិសបានបន្ថែមថា មនុស្សមួយចំនួន ដែលបង្ហាញមុខនៅកន្លែងឆ្កែប្រយុទ្ធគ្នា តាមការឲ្យដឹងបានកញ្ឆក់យកឆ្កែឥតម្ចាស់តាមដងផ្លូវ
និងអះអាងថាឆ្កែទាំងនោះគឺជាឆ្កែចិញ្ចឹមរបស់ខ្លួនទៀតផង៕
