ដោយឡែកទស្សនៈខ្លះវិញក៏បានបង្ហាញពីការចាប់អារម្មណ៍និងសរសើរចំណាត់ការរបស់សមត្ថកិច្ចផងដែរ ។ទីបំផុតការស្រាវជ្រាវ និងប្រើគ្រប់យុទ្ធសាស្ត្រ ពីកម្លាំងនគរបាលជំនាញរាជធានីភ្នំពេញ អស់រយៈពេលប្រមាណ ១០ថ្ងៃ នៅម៉ោង ៧និង៣០នាទី ព្រឹកថ្ងៃទី១០ ខែមីនា ឆ្នាំ២០១៥នេះ បុរសបាញ់គំរាមនគរបាល ៣៣គ្រាប់ ព្រោះរឿងផាកពិន័យរថយន្ត បើកលើសល្បឿន កំណត់ លោក ជឹង ស៊ីណាត បានចូលខ្លួនបំភ្លឺ និងទទួលទោសកំហុសរបស់ខ្លួនហើយ នៅស្នងការដ្ឋាននគរបាលរាជធានីភ្នំពេញ។
មិនឲ្យលើសនិតិវិធីឡើយ កម្លាំងការិយាល័យនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ ក្រោមការបញ្ជាពីស្នងការ លោកឧត្តមសេនីយ៍ឯក ជូន សុវណ្ណ និងស្នងការរងទទួលផែនយុត្តិធម៌ លោក ឧត្តមសេនីយ៍ត្រី ជូន ណារិន បានបញ្ជូនជនសង្ស័យដែលគេអះអាងថា ជាខ្មាន់កាំភ្លើងទៅស្នងការដ្ឋាននគរបាលខេត្តកំពង់ស្ពឺដើម្បីសាកសួរបន្ថែមនិងចាត់ការតាមច្បាប់ ។
បើតាមមន្ត្រីនគរបាលរាជធានីភ្នំពេញ បានឲ្យដឹងថា មុនពេលកើតហេតុ ជនបាញ់បោះសេរីខាងលើនេះ បាន ធ្វើដំណើរមកពីដើរលេង នៅគិរីរម្យ ហើយពេលធ្វើដំណើរមកដល់ចំណុចខាងលើ ក៏ជួបនគរបាលចរាចរណ៍ ដែលដាក់គោលដៅ ត្រួតពិនិត្យច្បាប់ចរាចរណ៍ ហើយធ្វើការផាកពិន័យ នៅពេលដែលជននេះ បើកលើសល្បឿន កំណត់ពេលនោះ បានធ្វើឲ្យឈ្មោះជឹង ស៊ីណាត ដែលស្រវឹងផងនោះ ខឹងហើយ បានដកកាំភ្លីងខ្លី បាញ់អស់ពីរបង់ ដោយបាញ់ម្តងអស់១៦គ្រាប់ ។
លោកស្នងការបន្ថែមថា ឈ្មោះជឹង ស៊ីណាត មិនមានតួនាទី ជាមន្ត្រីរាជការនោះទេ គឺជាអ្នករកស៊ីធម្មតាតែប៉ុណ្ណោះ។ មូលហេតុដែលបណ្តាលឲ្យបាញ់បោះជាច្រើនគ្រាប់គ្មានត្រាប្រណីនេះ បន្ទាប់ពី នគរបាលឃាត់ខ្លួនផាកពិន័យ និងមានជាតិស្រវឹងក្នុងខ្លួន " ។
លោក ស្នងការបានបញ្ជាក់ថា ក្រោយកើតហេតុនគរបាលបានស្រាវជ្រាវ ទោះបីមានការផ្លាស់ប្តូរកន្លែងរស់នៅក៍ដោយ។ លទ្ធផលចុងក្រោយជនសង្ស័យបានចូលខ្លួនមកសារភាព បន្ទាប់ពីមានការពន្យល់ពីនិតិវិធីច្បាប់ហើយនោះ ។
បច្ចុប្បន្នសមត្ថកិច្ច បាននិងកំពុងកសាងសំណុំរឿង ដើម្បីបញ្ជូនទៅកាន់ស្នងការដ្ឋាន នគរបាលខេត្តកំពង់ស្ពឺ ចាត់ការបន្ត។
សូមបញ្ជាក់ថា កាលពីថ្ងៃទី២៨ ខែកុម្ភៈ ឆ្នាំ២០១៥កន្លងទៅនេះ លោក ជឹង ស៊ីណាត ដែលជិះរថយន្តមែកសឺ ដេសទំនើបពណ៌ខ្មៅ ពាក់ស្លាកលេខ ភ្នំពេញ 2AD-2229 បានបាញ់ចំនួន ៣៣គ្រាប់ គំរាមនគរបាលចរាចរណ៍ ព្រោះផាកពិន័យ បើកបរលើសល្បឿនកំណត់ នៅតាមបណ្ដោយផ្លូវជាតិលេខ៤ ក្នុងសង្កាត់ សុពណ៌ទេព ក្រុងច្បារមន ខេត្ដកំពង់ស្ពឺ ។
សមត្ថកិច្ចខេត្ដកំពង់ស្ពឺ បានឱ្យដឹងថា នៅមុនពេលកើតហេតុ កម្លាំងនគរបាលចរាចរណ៍ខេត្ដកំពង់ស្ពឺ ៨នាក់ ដាក់កម្លាំងត្រួតពិនិត្យការធ្វើចរាចរណ៍នៅកន្លែងកើតហេតុ។ លុះដល់វេលាម៉ោងជាង១០ ស្រាប់តែមានរថយន្ដស៊េរីទំនើបម៉ាកមែក សឺដេស ពណ៌ខ្មៅរបស់ ជឹង ស៊ីណាត បើកបរ ក្នុងពីខេត្ដព្រះសីហនុ ឆ្ពោះមករាជធានីភ្នំពេញ ក្នុងល្បឿន ៩០គីឡូម៉ែត្រក្នុងមួយម៉ោង ។ ដោយឃើញការបើកបរ លើសល្បឿនកំណត់ ដែលក្នុងទីប្រជុំជន កំណត់ត្រឹម៣០ទៅ៤០ គីឡូម៉ែត្រ ក្នុងមួយម៉ោងនោះ មន្ដ្រីនគរបាល ចរាចរណ៍ ក៏បានចេញស្ទាក់ ហើយធ្វើការអប់រំ និងផាកពិន័យ ចំនួន ១២.០០០រៀល។ ដោយការខឹងសម្បារនឹង ការផាកពិន័យនេះ បន្ទាប់ពីបើករថយន្តចេញបានប្រមាណ ២ម៉ែត្រ មនុស្សនៅក្នុងរថយន្ត ដែលកាលនោះគេមិន ទាន់ស្គាល់អត្តសញ្ញាណថាជានរណានៅឡើយនោះ បានទាញកាំភ្លើងស៊េរីទំនើបមកបាញ់រហូតអស់ពីរបង់គឺចំនួន ៣៣គ្រាប់ ធ្វើឲ្យមានការភ្ញាក់ផ្អើលជាខ្លាំង៕
