លោកទេសរដ្ឋមន្ត្រី បានមានប្រសាសន៍ទៀតថា “ប៉ុន្តែទោះជាយ៉ាងណាក៏ដោយ អតីតបញ្ញាវន្តដែលរៀនចប់នៅក្រៅ មិនអាចពើងទ្រូងថា ខ្លួនឯងចេះជាងបញ្ញាវន្តដែលរៀននៅកម្ពុជាទេ អីចឹងត្រូវតែគោរពបញ្ញាវន្តដែលរៀននៅកម្ពុជា ព្រោះម្នាក់ៗ មានការចេះដឹង និងបទពិសោធន៍ ខុសៗគ្នាទាំងអស់ ទាំងនៅក្រៅប្រទេស ទាំងនៅក្នុងប្រទេស”។
លោករដ្ឋមន្ត្រី ស៊ុន ចាន់ថុល បានថ្លែងបន្តថា “ប្រសិនបើយើងរួមគ្នា ទាំងនិស្សិតនៅក្រៅប្រទេស និងបញ្ញាវន្តនៅកម្ពុជា ខ្ញុំជឿជាក់ថា យើងអាចកសាងប្រទេសជាតិបាន ហើយឲ្យប្រទេសជាតិយើងមានភាពរុងរឿងថែមទៀត ដើម្បីកាត់បន្ថយភាពក្រីក្ររបស់ប្រជាពលរដ្ឋ”។
ជាមួយគ្នា នោះដែរ លោក ម៉ៅ ស្រេង ស្ថានិកសន្និបាត GAC និងជាអគ្គនាយកប្រចាំប្រទេសរបស់ IDP Education មានប្រសាសន៍ថា “ GAC រីករាយយ៉ាងខ្លាំង ដែលបានដើរតួជាអ្នកប្រមូល និងដឹកនាំក្រុមបញ្ញាវ័ន្ត បណ្តាសមាគមអតីនិស្សិតទាំងឡាយ សភាពាណិជ្ជកម្ម និងបណ្តាស្ថានទូតនានា ដើម្បីលើកកម្ពស់ឱកាសទំនាក់ទនងគ្នា និងជម្រុញលើកទឹកចិត្តអោយមានវប្បធម៌ចែករំលែក ហើយជាមួយគ្នានេះដែរ ក៏ជាការបង្ហាញនូវគុណភាពអប់រំ កម្រិតពិភពលោក របស់ប្រទេសទាំងប្រាំនេះ”។
លោក ម៉ៅ ស្រេង បានថ្លែងបន្តថា IDP Education គឺជាស្ថាប័នមួយដែលធ្វើការនៅក្នុងវិស័យអប់រំ ក្នុងលក្ខណៈអន្តរជាតិជាង ២០ ឆ្នាំ នៅប្រទេសកម្ពុជា ក្នុងការបញ្ជូនសិស្ស និស្សិត ទៅសិក្សានៅបរទេស ហើយយើងឃើញថា ចំនួនអ្នកដែលទៅសិក្សានៅបរទេស ចង់បានគុណភាព នៃការអប់រំ គឺកាន់តែកើនឡើងពីមួយឆ្នាំទៅមួយឆ្នាំ ហើយពួកគាត់ បានវិលត្រឡប់មកប្រទេសកម្ពុជាវិញ។
លោកបានបន្តថា “ការបង្កើតឲ្យមានកម្មវិធី GAC (Global Alumni Convention) ក្នុងបរិបទមួយ ប្រម៉ែប្រមូលនិស្សិតដែលរៀនចប់ពីបរទេស ក៏ដូជា បញ្ញាវ័ន្តនៅក្នុងស្រុក ហើយនិងស្ថាប័នជំនួញ នៅក្នុងប្រទេសកម្ពុជា ឲ្យមកជួបគ្នា ដើម្បីប្រាស្រ័យទាក់ទងគ្នា បង្កើតជាសម្ព័ន្ធមួយ ក្នុងការអភិវឌ្ឍន៍ខ្លួនឯង ក្នុងការអភិវឌ្ឍន៍ដៃគូពាណិជ្ជកម្ម ទៅអនាគតផងដែរ”។
លោកបានបន្តថា ក្នុងឱកាសដែលចូលសមហរណកម្មអាស៊ាន នៅក្នុងចុងឆ្នាំ២០១៥នេះ GAC មានគោលបំណង ជំរុញឲ្យមានឲ្យមានអភិវឌ្ឍន៍ខ្លួនឯងនេះ ឲ្យកាន់តែប្រសើរឡើង ដើម្បីឲ្យយើងទទួលបានប្រយោជន៍កាន់តែច្រើន ពីការចូលរួមក្នុងសេដ្ឋកិច្ចអាស៊ាននេះ។ មិនត្រឹមតែបញ្ញាវន្តដែលចូលរួមពី ប្រទេសអូស្រា្តលី ណូវេលហ្សេឡង់ កាណាដា ចក្រភពអង់គ្លេស និងប្រទេសសហរដ្ឋអាមេរិក នេះទេ ក៏មាននិស្សិតដែលប្រទេសផ្សេងៗទៀតនៅក្នុងតំបន់អាស៊ី និងតំបន់សហគមន៍អឺរ៉ុបផងដែរ។ នេះជាមោទនភាពមួយ ដែលយើងអាចបង្កើតកម្មវិធីខ្នាតពិភពលោកជាលើកទី១ នៅប្រទេសកម្ពុជា នៅឆ្នាំ២០១៥ ហើយបន្ទាប់ពីឆ្នាំនេះទៅ IDP Education នឹងរៀបចំកម្មវិធីនេះ បន្តទៀតជារៀងរាល់ឆ្នាំ ដែលមានការចូលរួមពីបណ្តាប្រទេស ជាច្រើនទៀតផងដែរ។
សូមបញ្ជាក់ថា សន្និបាត Global Alumni Convention (GAC) ឆ្នាំ២០១៥នេះ គឺជាសន្និបាតដំបូងបំផុត នៃសន្និបាត ដែលនឹងត្រូវរៀបចំឡើងជាបន្តបន្ទាប់នាឆ្នាំក្រោយៗទៀត ដោយ IDP Education ដែលជាស្ថាប័នផ្តល់សេវាបញ្ជូនសិស្ស និស្សិត អោយទៅសិក្សានៅក្រៅប្រទេសធំជាងគេបំផុតលើពិភពលោក។ កាន់តែពិសេសជាងនេះទៅទៀតនោះ គឺសន្និបាតនេះត្រូវបានរៀបចំឡើងក្នុងគោលបំណង ជាចំបងដើម្បីផ្សាភ្ជាប់ឡើងវិញទៅនឹងការសិក្សា ការចែករំលែកចំណេះដឹង និងការជម្រុញលើកទឹកចិត្តដល់អតីតបញ្ញាវន្តទាំងឡាយ អោយយកអស់សមត្ថភាពក្នុងការឈានទៅសម្រេចជោគជ័យធំៗទាំងឡាយ៕
