ខេត្តកំពង់ឆ្នាំង ៖ នៅថ្ងៃទី១៥ ខែកុម្ភៈ ឆ្នាំ២០១៥ ម៉ោងវេលា ១៩ និង១៥នាទី ប្រជាការពារ និងមន្ត្រីនគរបាលមូលដ្ឋាន បានចាប់ជនសង្ស័យម្នាក់ ពីបទចាប់រំលោភសេពសន្ថវៈ នៅក្នុងបន្ទប់ទឹក ខណៈពេលដែលនារីរងគ្រោះ ទៅចូលរួមនៅពិធីខួបកំណើតបងប្អូន ក្នុងភូមិខ្យាងត្បូង ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។
លោក ឌុច ចំរើន ប្រធានការិយាល័យនគរបាលព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្ត បានមានប្រសាសន៍ថា នារីរងគ្រោះមានអាយុ២៥ឆ្នាំ ពេលនាងទៅបត់ជើងនៅបន្ទប់ទឹក គឺជនសង្ស័យខាងលើនេះ មានចេតនាទៅចាប់នាងរំលោភតែម្តង ពេលឃើញនាងដើរចេញទៅបន្ទប់ទឹកក្រោយផ្ទះ ជនសង្ស័យរូបនោះក៏ដើរតាម ហើយពេលនាងចេញពីបន្ទប់ទឹកមកវិញ ក៏ធ្វើសកម្មភាពរុញចូលបន្ទប់ទឹកវិញ និងចាប់រំលោភតែម្តង ។ ក្រោយពេលចេញមកវិញនារីរងគ្រោះបានប្តឹងប្រជាការពារ និងបានសហការជាមួយមន្ត្រីនគរបាលមូលដ្ឋានធ្វើការចាប់ឃាត់ខ្លួនតែ ម្តង ។
ជនសង្ស័យរូបនោះត្រូវបានបញ្ជូនមកដល់ស្នងការដ្ឋាន នគរបាល ខេត្តកំពង់ឆ្នាំង នៅរសៀលថ្ងៃទី១៦ ខែកុម្ភៈ ឆ្នាំ២០១៥ ហើយត្រូវបានមន្ត្រីការិយាល័យព្រហ្មទណ្ឌកំរិតធ្ងន់ ធ្វើការសាកសួរ និងបានចម្លើយសារភាពរបស់ជនសង្ស័យរូបនោះថា រូបគេមានឈ្មោះ ប៊ុន ចាន់រ៉ូ អាយុ២៤ឆ្នាំ មានទីលំនៅភូមិឃុំកើតហេតុខាងលើ ។ នៅល្ងាចថ្ងៃទី ១៥ ខែកុម្ភៈ រូបគេត្រូវបានម្ចាស់ផ្ទះ ហៅទៅចូលរួមក្នុងពីធីខួបកំណើតកូន លុះពេលយប់បន្តិចរូបគេស្រវឹងស្រឿងៗ បានដើរមកបន្ទប់ទឹក ដើម្បីបត់ជើងតូច តែពេលរៀបចូលបន្ទប់ ស្រាប់តែឃើញនារីរងគ្រោះ ចេញពីបន្ទប់ទឹកមកវិញ និងមានស្លៀកពាក់ខ្លី រូបគេក៏មានអារម្មណ៏ ហើយបានចាប់នារីរងគ្រោះ រុញចូលបន្ទប់ទឹកវិញ និងធ្វើការចាប់រំលោភនាងរហូតបានសម្រេច ទើបចេញមកវិញ ហើយបន្តិចក្រោយមកសមត្ថកិច្ចចាប់ខ្លួនតែម្តង ។
មន្ត្រី នគរបាលការិយាល័យព្រហ្មទ័ណ្ឌកំរិតធ្ងន់ នៃស្នងការដ្ឋានខេត្តកំពង់ ឆ្នាំងបានកសាងសំណុំរឿង បញ្ជូនជនសង្ស័យទៅកានតុលាការនៅព្រឹកថ្ងៃទី១៧ ខែកុម្ភៈ ឆ្នាំ២០១៥ នេះដើម្បីផ្តន្ទាទៅ តាមច្បាប់ ៕
