ខេត្តកំពង់ឆ្នាំងៈ ប្រសិនបើគេធ្វើដំណើរមកដល់ចំណុចមុខការិយាល័យបច្ចេកទេស នៃមន្ទីរសុខាភិបាលខេត្តកំពង់ឆ្នាំង
គេនឹងឃើញផ្ទះចំនួន៣ល្វែងដែលដាក់តាំងលក់អិវ៉ាន់លៀនលយមកលើ ចិញ្ចើមផ្លូវ
ដែលមួយល្វែងជាផ្ទះរបស់ឈ្មោះ ស៊ឹម គឹមសាន្ត និង២ល្វែងទៀត ជារបស់ឈ្មោះ
រិទ្ធ ម៉េង ទោះបីកន្លងមកអាជ្ញាធរក្រុង និងសមត្ថកិច្ចជំនាញរៀបចំសណ្តាប់ធ្នាប់
បានចុះមកពន្យល់ណែនាំជាច្រើនលើកច្រើនសារពីផលប៉ះពាល់អនាម័យ សោភ័ណភាព សណ្តាប់ធ្នាប់ក៏ដោយ
ក៏ពួកគេនៅតែលក់បានយ៉ាងរំភើយ គ្មានអើពើ និងខ្លាចច្បាប់ទម្លាប់បន្តិចណាឡើយ។
ផ្ទះទាំង៣ល្វែងខាងលើនេះ ស្ថិតនៅចំណុចទល់មុខការិយាល័យបច្ចេកទេស
នៃមន្ទីរសុខាភិបាល និងមណ្ឌលសុខភាពក្រុង ស្ថិតក្នុងភូមិឡទឹកត្រី
សង្កាត់កំពង់ឆ្នាំង ក្រុងខេត្តកំពង់ឆ្នាំង។
លោក ហៃ មនោរម្យ
អភិបាលក្រុងកំពង់ឆ្នាំង បានថ្លែងឲ្យដឹងថា ក្នុងរយៈពេល៣ខែ
គឺគិតចាប់ពីខែធ្នូ ឆ្នាំ២០១៤ រហូតមកដល់ខែកុម្ភៈ ឆ្នាំ២០១៥នេះ
គណៈកម្មការខេត្ត និងក្រុមការងាររៀបចំសណ្តាប់ធ្នាប់ អនាម័យ សោភ័ណភាពក្រុង បានជំរុញសកម្មភាពការងាររបស់ខ្លួនតាមតួនាទីភារកិច្ចដែលគណៈ
អភិបាលខេត្តប្រគល់ឲ្យនូវការគ្រប់គ្រងសំណល់រឹងរាវសេវាកម្មផ្នែក ទេសចរណ៍
និងការងារអភិវឌ្ឍន៍ក្រុងជាដើម ហើយយើងទទួលបានលទ្ធផលគួរឲ្យកត់សម្គាល់ក្នុងរយៈពេល៣ខែនេះ។
លោកបានបន្តថា
នៅក្នុងការខំប្រឹងប្រែងរបស់ក្រុមការងារ និងគណៈកម្មការខេត្ត
ក៏នៅតែមានបញ្ហាប្រឈមជាច្រើនទៀត នៅក្នុងការរៀបចំអនាម័យ សោភ័ណភាព
និងសណ្តាប់ធ្នាប់ ព្រោះប្រជាពលរដ្ឋមួយចំនួននៅតែមិនព្រមចូលរួមក្នុងការអនុវត្តតាម
ផែនការរបស់អាជ្ញាធរខេត្ត ដោយពួកគាត់បានសង់សំយ៉ាបមុខផ្ទះលៀនលយមកគ្របលើចិញ្ចើមផ្លូវខុស
បច្ចេកទេស ការតាំងលក់ទំនិញលើចិញ្ចើមផ្លូវសាធារណៈ ការទុកចោលនូវសំរាមគ្មានសណ្តាប់ធ្នាប់ជាដើម។
ទោះបីមានភាពប្រឈមយ៉ាងណាក៏ដោយ ក្រុមការងារនៅតែបន្តពន្យល់ណែនាំ ក្នុងករណីគាត់មិនព្រមធ្វើតាមផែនការណែនាំ
គឺត្រូវតែអនុវត្តទៅតាមនីតិវិធីរដ្ឋបាល។
ក្រុមគ្រូពេទ្យនៅក្នុងមណ្ឌលសុខភាពក្រុងកំពង់ឆ្នាំង
ដែលមានទីតាំងទល់មុខផ្ទះទាំង៣ល្វែងនោះ បាននិយាយថា ការយកចិញ្ចើមផ្លូវសាធារណៈមកដាក់តាំងលក់ដូរទំនិញ
ដើម្បីផលប្រយោជន៍ផ្ទាល់ខ្លួននោះ គឺខុសនឹងច្បាប់ទៅហើយ តែបញ្ហាដែលគួរឲ្យបារម្ភថែមទៀតនោះ
គឺការឈប់សំចតនៃរថយន្តធំៗ ដើម្បីទិញអីវ៉ាន់ ដែលកន្លងមកមានកើតគ្រោះថ្នាក់ចរាចរណ៍នៅទីនោះពេលយប់ជាញឹកញាប់
ម្យ៉ាងវិញទៀត ពេលអ្នកបើកបររថយន្តធំៗមកឈប់នៅទីនោះ ពួកគេតែងតែមកនោមដាក់របងមណ្ឌលសុខភាពក្រុង
ដែលនាំឲ្យមានក្លិនអាក្រក់ចូលមកក្នុងមណ្ឌលសុខភាពក្រុង ធ្វើឲ្យប៉ះពាល់យ៉ាងធ្ងន់ធ្ងរដល់សុខមាលភាពរបស់បងប្អូនប្រជាពលរដ្ឋ
ក៏ដូចជាអ្នកជំងឺដែលចូលមកសម្រាកព្យាបាលនៅទីនោះផងដែរ៕
