ខេត្តកណ្តាល៖ នៅថ្ងៃទី២១ ខែកុម្ភៈ ឆ្នាំ២០១៥ វេលាម៉ោង ១៧និង១០នាទី តាមបណ្តោយផ្លូវជាតិលេខ១ ត្រង់ចន្លោះគីឡូម៉ែត្រលេខ ២២-២៣ ភ្នំពេញ-អ្នកលឿង ក្នុងភូមិដីឥដ្ឋកោះផុស ឃុំដីឥដ្ឋ ស្រុកគៀនស្វាយ ខេត្តកណ្តាល មានគ្រោះថ្នាក់ចរាចរណ៍ រវាងម៉ូតូបុកជាមួយកង់ ក្នុងទិសដៅស្របគ្នា អ្នកលឿង ភ្នំពេញ ម៉ូតូម៉ាក HONDA.C125 ពណ៌ខ្មៅ ស៊េរី២០០៧ ពាក់ផ្លាកលេខ កណ្តាល 1D.6553 ជិះគ្នាបីនាក់ បណ្តាលឲ្យរងរបួសធ្ងន់ ០៣នាក់ និងស្រាលម្នាក់ ។
សមត្ថកិច្ចនគរបាល បានឲ្យដឹងថា ជនរងគ្រោះមាន ទី១. ឈ្មោះ សុខ សីហា ភេទប្រុស អាយុ១៦ឆ្នាំ សិស្សភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្ដាល, ទី២. ឈ្មោះ អ៊ឹង ឆាយស៊ុន ភេទប្រុស អាយុ១៧ឆ្នាំ សិស្ស របួសធ្ងន់ទាំងពីរ ត្រូវរថយន្តដឹកទៅព្យាបាលនៅភ្នំពេញ និងទី៣.ពុំស្គាល់ឈ្មោះ រងរបួសស្រាល ចំណែកភាគីខាងកង់ ជិះដោយ ឈ្មោះ ទឹក លី ភេទប្រុស អាយុ៨២ឆ្នាំ រស់នៅភូមិចិនកោះ ឃុំគគីរ ស្រុកគៀនស្វាយ មុខរបរ កសិករ រងរបួសធ្ងន់ ត្រូវក្រុមគ្រួសារដឹកតាមម៉ូតូទៅព្យាបាលនៅមន្ទីរពេទ្យ ។
បច្ចុប្បន្នជនរងគ្រោះ ត្រូវយកទៅព្យាបាល នៅមន្ទីរពេទ្យ រីឯវត្ថុតាង យកមករក្សាទុក រងចាំដោះស្រាយនៅពេលក្រោយ ៕
