កាលពីថ្ងៃអង្គារទី៣ ខែវិច្ឆិកា រដ្ឋមន្ត្រីក្រសួងការពារជាតិម៉ាឡេស៊ី លោក Hishammuddin Hussein បានអំពាវនាវឲ្យសមភាគីរបស់លោកទាំងអស់ក្នុងតំបន់អាស៊ីអាគ្នេយ៍ រួបរួមគ្នាជាធ្លុងមួយដើម្បីដោះស្រាយជាមួយមហាអំណាចចិន និងអាមេរិក ។ រដ្ឋមន្ត្រីក្រសួងការពារជាតិនៃប្រទេសអាស៊ានទាំង១០បានជួបប្រជុំសម្ងាត់ប្រចាំឆ្នាំ មុនកិច្ចប្រជុំនៅថ្ងៃពុធនេះជាមួយដៃគូសន្ទនារបស់ខ្លួនទាំងពីរ ចិន និងអាមេរិក ។ រដ្ឋមន្ត្រីក្រសួងការពារជាតិម៉ាឡេស៊ីបានសង្កត់ធ្ងន់ពីតួនាទីដ៏សំខាន់របស់អាស៊ាន លើបញ្ហាសន្តិសុខ និងសន្ដិភាពក្នុងតំបន់ ។
លោក Hishammuddin បាននិយាយថា ក្ដីកង្វល់ខ្លាំងបំផុតរបស់យើង គឺសន្តិសុខ ស្ថេរភាព និងសន្តិភាពក្នុងតំបន់ ហើយអ្វីដែលសំខាន់នោះថាតើយើងត្រូវធ្វើយ៉ាងដូចម្ដេចដើម្បីរួមកម្លាំងគ្នាជាក្រុម ។ ជាលក្ខណៈបុគ្គល ពួកយើងប្រហែលជាមិនមានផលប៉ះពាល់ច្រើនឡើយ ប៉ុន្តែខ្លួនខ្ញុំផ្ទាល់ ក្នុងនាមជាប្រធាន ADMM ជឿជាក់ថា ការរួបរួមកម្លាំងប្រទេសទាំង១០ អាចនឹងធ្វើឲ្យមានការផ្លាស់ប្ដូរ ។
អ្នកជំនាញការម្នាក់បាននិយាយទាក់ទងនឹងសន្តិសុខក្នុងតំបន់ថា ដោយការជំនះរបស់អាមេរិកក្នុងការបញ្ជូននាវាចម្បាំងដើម្បីល្បាតក្នុងដែនសមុទ្រចិនភាគខាងត្បូង ដើម្បីការពារសេរីភាពនៃនាវាចរណ៍ ជាសកម្មភាពមួយដែលបានបង្កកំហឹងដល់ប្រទេសចិន ដោយចាត់ទុកថា ជាការប្រឈមមុខផ្នែកយោធាដោយផ្ទាល់ ដែលជាការបង្កើននូវការលំបាកសម្រាប់អាស៊ាន ដើម្បីរក្សាជំហរអព្យាក្រឹត្យ ៕
