នគរបាលក្រុងតាខ្មៅ ឃាត់ខ្លួនយុវវ័យ១ក្រុម សំងំប្រើប្រាស់គ្រឿងញៀន នៅក្នុងបន្ទប់ផ្ទះជួល

ខេត្តកណ្តាល៖ សមត្ថកិច្ចនគរបាលក្រុងតាខ្មៅ សហការជាមួយ ប៉ុស្តិ៍នគរបាលរដ្ឋបាលដើម មៀនធ្វើការឡោមព័ទ្ធចាប់ខ្លួនយុវ័យ១ក្រុមមានគ្នាចំនួន៩នាក់ កំពុងសំងំប្រើប្រាស់គ្រឿងញៀននៅក្នុងបន្ទប់ផ្ទះជួល កាលពីវេលាម៉ោង១៤ និង៣០នាទី ថ្ងៃទី០៦ ខែកុម្ភៈ ឆ្នាំ២០១៥ ស្ថិតក្នុងភូមិដើមគ សង្កាត់ដើមមៀន ក្រុងតាខ្មៅ ខេត្តកណ្តាល ។

ក្នុងកិច្ចប្រតិបត្តិការបង្រ្កាបខាងលើនេះសមត្ថកិច្ចបាន ធ្វើការដកហូត ឧបករណ៍សម្រាប់សេពគ្រឿងញៀនមួយចំនួន តែពុំបានដកហូតថ្នាំញៀនឡើយ ព្រោះក្រុមយុវ័យខាងលើនេះបាននាំគ្នាសេពអស់ទៅហើយ ។
មន្ត្រីនគរបាលព្រហ្មទណ្ឌក្រុងតាខ្មៅបានឲ្យដឹងថា ក្រុមយុវវ័យដែលត្រូវបានចាប់ខ្លួននោះមានគ្នាចំនួន៩នាក់ ទី១-ឈ្មោះ ធី ប៊ុនឈូ ភេទប្រុស អាយុ២០ឆ្នាំ មុខរបរ កម្មករសំណង់ ទី២-ឈ្មោះ សំអាត សុខសោភា ភេទប្រុស អាយុ១៧ឆ្នាំ មុខរបរ សិស្សទី១០ នៃវិទ្យាល័យហ៊ុនសែនចាក់អង្រែ ទី៣-ឈ្មោះ ឡេង សេងហួ ភេទប្រុស អាយុ១៤ឆ្នាំ មុខរបរ បុគ្គលិកក្លឹបបាសាក់ផាលេស ទី៤-ឈ្មោះ គុជ ប៉ាក់ស័រ ភេទប្រុស អាយុ១៧ឆ្នាំ មុខរបរ សិស្សទី១១នៃវិទ្យាល័យហ៊ុនសែនចាក់អង្រែ ទី៥-ឈ្មោះ តុង លី ភេទប្រុស អាយុ១៧ឆ្នាំ សិស្សទី១១នៃវិទ្យាល័យហ៊ុនសែនចាក់អង្រែ ទី៦-ឈ្មោះ ហេង ទីសិច ភេទប្រុស អាយុ១៧ឆ្នាំ សិស្សទី១១នៃវិទ្យាល័យហ៊ុនសែនចាក់អង្រែ ទី៧-ឈ្មោះ សំអាត សោភ័ណ្ឌ ភេទប្រុស អាយុ១៤ឆ្នាំ មុខរបរ នៅផ្ទះ ។ យុវជនទាំង៧នាក់ខាងលើនេះបច្ចុប្បន្នស្នាក់នៅ បន្ទប់ផ្ទះជួលចំណុចចាប់ខ្លួនខាងលើ ទី៨-ឈ្មោះសុំ ផាន់ណា ភេទស្រី អាយុ១៤ឆ្នាំ មុខរបរ នៅផ្ទះ រស់នៅភូមិព្រែហូរលិច១ សង្កាត់ព្រែកហូរ ក្រុងតាខ្មៅ និងទី៩-ឈ្មោះ អេម ប្រាសា្នរីតា ភេទស្រី អាយុ១៧ឆ្នាំ មុខរបរ នៅផ្ទះ រស់នៅភូមិអំពៅព្រៃ ឃុំអំពៅព្រៃ ស្រុកកណ្តាលស្ទឹង ខេត្តកណ្តាល ។
នគរបាលក្រុងតាខ្មៅបានបន្តថា នៅមុនពេលបើកប្រតិបត្តការបង្រ្កាបខាងលើនេះសមត្ថកិច្ចនគរបាល ជំនាញបានធ្វើការស្រាវជ្រាវយ៉ាងយកចិត្តទុកដាក់ ដើម្បីក្តាប់សកម្មភាពរបស់ក្រុមជនសង្ស័យធ្វើសកម្មភាព ។ បន្ទាប់ពីក្តាប់បានសកម្មភាពក្រុមជនសង្ស័យហើយនោះសមត្ថកិច្ចនគរបាលជំនាញ យុត្តិធម៌ក្រុងតាខ្មៅ សហការជាមួយនគរបាលប៉ុស្តិ៍រដ្ឋបាលដើមមៀន ចុះធ្វើការឡោមព័ទ្ធចូលទៅច្បាមមុខសញ្ញាជនសង្ស័យដល់ក្នុងបន្ទប់ជួល ឆែកឆេររកឃើញមាន ឧបករណ៍សម្រាប់សេពគ្រឿងញៀនមួយចំនួន ដែលក្រុមជនសង្ស័យទើបប្រើប្រាស់ហើយថ្មីៗ ។ ដោយឡែកសមត្ថកិច្ចពុំបានធ្វើការដកហូតថ្នាំញៀនទេ ពោលគឺក្រុមជនសង្ស័យបាននាំគ្នាប្រើប្រាស់អស់បាត់ទៅហើយ ។
បច្ចុប្បន្នជនសង្ស័យទាំង៩នាក់ខាងលើនេះសមត្ថកិច្ចនគរបាលជំនាញយុត្តិធម៌បាន បញ្ជូនខ្លួនទៅកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងចាត់ការតាមច្បាប់ ៕