ព្យុះអាត្លង់ទិកដែលមានឥទ្ធិពលខ្លាំងបំផុត ក្នុងកំណត់ត្រាមួយនេះ ដែលជាព្យុះប្រភេទប្រាំ គឺបានវាយប្រហារឆ្នេរសមុទ្រភាគខាងជើង នៃប្រទេសPuerto Rico កាលពីយប់ថ្ងៃពុធ។
ក្រុមមន្ត្រីបាននិយាយថា កោះ St Martin ដែលជាផ្នែកមួយនៃប្រទេសបារាំង និងជារមណីយដ្ឋានដ៏ល្អប្រណីត ដែលត្រូវបានគេស្គាល់ដោយសារតែជីវិតពេលរាត្រី ដ៏រស់រវើករបស់ខ្លួន គឺបានទទួលរងការវាយប្រហារយ៉ាងពេញទំហឹង។ មនុស្សយ៉ាងហោចណាស់ប្រាំមួយនាក់ បានស្លាប់ហើយលំនៅដ្ឋាន ៩៥ភាគរយត្រូវបានបំផ្លាញ។
មន្ត្រីជាន់ខ្ពស់ក្នុងតំបន់លោក Daniel Gibbs បាននិយាយក្នុងបទសម្ភាសតាមវិទ្យុមួយថា “វាជាគ្រោះមហន្តរាយដ៏ធំសម្បើម។ កៅសិបប្រាំភាគរយនៃកោះនេះត្រូវបានបំផ្លាញ”។
ប្រធានការិយាល័យរដ្ឋបាលកោះ Guadeloupe លោក Eric Maire បានហៅស្ថានភាពនៅកោះ St Martin ថា “គួរឲ្យរំជើបរំជួល” ហើយនិយាយថា កោះដែលបែងចែករវាងប្រទេសហូឡង់ និងបារាំងមួយនេះ គឺគ្មានទឹកស្អាតផឹក ឬអគ្គិសនី ហើយបានព្រមានថា ចំនួនអ្នកស្លាប់នឹងកើនឡើង។
នៅភាគអាគ្នេយ៍ តំបន់ Barbuda ដែលជាផ្នែកមួយនៃប្រទេសកោះភ្លោះ Antigua និង Barbuda គឺបានទទួលរងនូវការបំផ្លិចបំផ្លាញយ៉ាងខ្លាំងដោយ៩៥ភាគរយនៃអចលនទ្រព្យបានរងការខូចខាត និង៣០ភាគរយត្រូវបានកម្ទេច នេះបើយោងតាមនាយករដ្ឋមន្ត្រី Gaston Browne ។
លោក Browne បាននិយាយថា “Barbuda ឥឡូវនេះក្លាយជាកម្ទេចថ្ម”។ មនុស្សម្នាក់ត្រូវបានគេដឹងថា បានស្លាប់នៅលើកោះដែលមានប្រជាពលរដ្ឋចំនួន១,៦០០នាក់មួយនេះ។
ជាងពាក់កណ្តាលនៃប្រជាជនPuerto Rico ដែលមានចំនួនសរុបបីលាននាក់ គឺគ្មានអគ្គិសនីប្រើប្រាស់ ហើយអភិបាល Ricardo Rossello បានដាក់ពង្រាយឆ្មាំជាតិ និងបើកជម្រកដែលគ្រប់គ្រាន់ ដើម្បីផ្គត់ផ្គង់ដល់មនុស្សរហូតដល់ទៅ៦២,០០០នាក់។
ប្រធានាធិបតីអាមេរិកលោក Donald Trump បានប្រកាសដាក់រដ្ឋក្នុងគ្រាអាសន្ននៅPuerto Rico ក៏ដូចជាកោះ Virgin របស់អាមេរិក និងរដ្ឋ Florida ផងដែរ។
នៅក្នុងប្រទេសគុយបា ស្ថានភាពនៃការប្រុងប្រយ័ត្ន ត្រូវបានប្រកាសនៅក្នុងខេត្តភាគខាងកើត និងភាគកណ្តាល ដែលពលរដ្ឋត្រូវបានណែនាំឲ្យទៅរស់នៅជាមួយសាច់ញាតិ ឬទៅជម្រករបស់រដ្ឋាភិបាល។
ឆ្នេរភាគខាងជើងរបស់ប្រទេសហៃទី បានប្រុងប្រយ័ត្នដោយសារខ្យល់ព្យុះនេះ បើទោះបីជាប្រជាជននៅក្នុងទីក្រុង Cap-Haitien ភាគច្រើនហាក់ដូចជាមិនដឹងពីព្យុះ ដែលកំពុងកើតមានក៏ដោយ៕
